మెయిన్స్​కు ముందు 'టెస్ట్​' చేసుకుంటే బెటర్ - గ్రూప్స్‌ అభ్యర్థులకు భారంగా నమూనా పరీక్షలు - Groups Aspirants Problems

Groups Aspirants Problems : రాష్ట్రంలో గ్రూప్​ సర్వీసు ఉద్యోగాలకు సిద్ధమవుతున్న అభ్యర్థులపై టెస్ట్​ సిరీస్​ ఫీజు​ భారంగా మారుతోంది. పరీక్షలకు ప్రిపేర్ అవుతున్న వారు ఒకవైపు సబ్జెక్టుతో పాటు టెస్ట్​ సిరీస్​కు ప్రాధాన్యం ఇస్తున్నారు. ఈ పరీక్షలు రాస్తే లోపాలు తెలుసుకుని సరిదిద్దుకునే అవకాశం ఉండడంతో రాస్తున్నారు.

Groups Aspirants Problems In Telangana : రాష్ట్రంలో గ్రూప్​ సర్వీసు ఉద్యోగాలకు సన్నద్ధమవుతున్న అభ్యర్థులకు నమూన పరీక్షలు (టెస్ట్​ ఎగ్జామ్స్) ఆర్థిక భారంగా మారుతున్నాయి. కొన్ని ప్రైవేట్ శిక్షణ సంస్థలు నిర్వహిస్తున్న ఈ ఎగ్జామ్స్​కు ఫీజులు రూ.వేలల్లో వసూలు చేస్తున్నాయి. గ్రూప్​-1 ప్రధాన పరీక్ష, గ్రూప్​-2 పరీక్షల కోసం నగరానికి వచ్చి ప్రిపేర్ అవుతున్న అభ్యర్థులకు ప్రభుత్వ పరంగా ఏర్పాట్లు లేవు.

నెల జీతం ముందే పూచీకత్తు : గ్రూప్​-1 ప్రిలిమినరీ పరీక్షలో ప్రతిభ చూపినప్పటికీ, ప్రధాన పరీక్షలకు సన్నద్ధమయ్యేందుకు తిప్పలు తప్పడం లేదని వాపోతున్నారు. శిక్షణ సంస్థలు నిర్వహిస్తున్న టెస్ట్​ సిరీస్​కు కేటగిరీ వారీగా రూ.15 వేల నుంచి రూ.25 వేల వరకు ఫీజు తీసుకుంటున్నారు. కొన్ని సంస్థలు ఈ ఫీజులతో పాటు అభ్యర్థులు ప్రభుత్వ ఉద్యోగం సాధిస్తే, నెల జీతం ఇచ్చేలా వారి నుంచి పూచీకత్తు తీసుకుంటున్నారు. అభ్యర్థులకు ఈ విధంగా ఫీజులు భారంగా మారుతున్నాయి.

అక్టోబరు 21 నుంచి గ్రూప్​-1 ప్రధాన పరీక్షలు జరగనున్నాయి. ప్రిలిమినరీ పరీక్షకు 3 లక్షల మంది పోటీపడగా, మెయిన్స్​కు 31,382 మంది ఎంపికయ్యారు. వారు ఒకవైపు సబ్జెక్టుల వారీగా ప్రిపేర్​ అవుతూనే, టెస్ట్​ సిరీస్​కు ప్రాధాన్యం ఇస్తున్నారు. వాటిని రాస్తే తమ లోపాలు తెలుస్తాయని, వాటిని సరిదిద్దుకునే వీలుంటుందని అభిప్రాయపడుతున్నారు. ఈ నేపథ్యంలో ప్రైవేటు శిక్షణ సంస్థలు వారానికో టెస్ట్​ సిరీస్​ చొప్పున పెడుతున్నాయి.

అద్దె భవనాల్లో స్టడీ హాళ్లు : పోటీ పరీక్షలకు సన్నద్ధమయ్యే అభ్యర్థుల కోసం ప్రైవేటు స్టడీ హాళ్లు విపరీతంగా పెరుగుతున్నాయి. గ్రూప్​-2 పరీక్ష తేదీలు ఖరారు కావడంతో ఈ పరీక్ష కోసం దాదాపు 5 లక్షల మంది అభ్యర్థులు ప్రిపేర్ అవుతున్నారు. నిరుద్యోగ అభ్యర్థుల తాకిడి నేపథ్యంలో ఇప్పటి వరకు శిక్షణ ఇచ్చిన సంస్థలు ఆయా కేంద్రాలను స్టడీ హాళ్లుగా మార్చుతున్నాయి.

కొంతమంది అద్దెకు భవనాలు తీసుకుని మరీ స్టడీ హాళ్లు నిర్వహిస్తున్నారు. ఒక్కో స్టడీ హాల్​లో దాదాపు 200 మందికి పైగా ఉంటున్నారు. అందులోనూ ఏసీ, నాన్​ ఏసీ హాళ్లను పెడుతున్నారు. గ్రూప్​-2 పరీక్ష ముగిసే వరకు మూడు నెలల సమయం ఉంది. స్టడీ హాల్​ ఉపయోగించుకునేందుకు రూ.15 వేలు ఫీజు​ తీసుకుంటున్నారు. సౌకర్యాలు కూడా కొన్నింటిలో అంతంత మాత్రమే. ఈ ఫీజుల్లో భాగంగా వారానికి ఒకసారి టెస్ట్​ సిరీస్​ నిర్వాహిస్తామని నిర్వాహకులు చెబుతున్నారు.

కొరవైన ప్రభుత్వ సదుపాయాలు : గ్రూప్స్ పరీక్షలకు హాజరయ్యే అభ్యర్థులకు ప్రభుత్వ ఆధ్వర్యంలో ఇంకా ఎలాంటి ఏర్పాట్లు చేయలేదు. సంక్షేమ శాఖల వారీగా జిల్లాకో స్టడీ సర్కిల్ ఏర్పాటు చేస్తామన్న ప్రతిపాదనలు ఇంకా కార్యరూపం దాల్చలేదు. హైదరాబాద్ కేంద్రంగా సంక్షేమ శాఖలు శిక్షణా ఇస్తున్నా, టెస్ట్​ సిరీస్​పై ఇంకా ఎలాంటి నిర్ణయాలు తీసుకోలేదు. గిరిజన సంక్షేమ శాఖ 45 రోజుల పాటు హైదరాబాద్​, హనుమకొండ, ఆదిలాబాద్​ స్టడీ కేంద్రాల్లో వంద మంది చొప్పున 300 మందికి టెస్ట్​ సరీస్​కు ఏర్పాట్లు చేసినా, ఇంకా ఆ ప్రతిపాదన ఆమోదం పొందలేదు.

ఎస్సీ, బీసీ సంక్షేమ శాఖల పరిధిలోని స్టడీ సర్కిళ్లలో ప్రవేశాలు పొందిన వారికి మాత్రమే టెస్ట్​ సిరీస్​కు హాజరయ్యే అవకాశముంది. అయితే గతంలో పోలీసు, ఇతర పరీక్షల కోసం అన్ని జిల్లాల్లో సంక్షేమ శాఖల వారీగా టెస్ట్​ సిరీస్​ నిర్వహించారు. ప్రభుత్వం అనుమతిస్తే జిల్లాల వారీగా కలెక్టర్ల ఆధ్వర్యంలో టెస్ట్​ సిరీస్​కు ఏర్పాట్లు చేయాలని అధికారులు యోచిస్తున్నారు.