నేడే మంత్రిమండలి సమావేశం - రుణమాఫీ, రైతు భరోసా సహా కీలక అంశాలపై నిర్ణయాలు! - Ministers Discuss on Rythu Runamafi

Telangana Cabinet Meeting 2024 : ముఖ్యమంత్రి రేవంత్​ రెడ్డి అధ్యక్షతన ఇవాళ మంత్రి వర్గ సమావేశం జరగనుంది. రైతు రుణమాఫీతో పాటు పలు కీలక అంశాలపై చర్చించనున్నారు. బడ్జెట్​ పద్దులపై కూడా చర్చించే అవకాశం ఉందని సమాచారం.

Telangana Cabinet Meeting 2024 : రాష్ట్ర మంత్రివర్గ సమావేశం ఇవాళ సాయంత్రం 4 గంటలకు జరగనుంది. సచివాలయంలో ముఖ్యమంత్రి రేవంత్ రెడ్డి అధ్యక్షతన జరగనున్న కేబినెట్ భేటీలో రైతు రుణమాఫీతో పాటు కీలక అంశాలపై చర్చ జరగనుంది. ప్రధానంగా రైతు రుణమాఫీపై మంత్రివర్గం కీలక నిర్ణయాలు తీసుకునే అవకాశం ఉంది. కిసాన్ సమ్మాన్ నిధి అర్హతలనే ప్రాతిపదికగా తీసుకోవడం సహా ప్రత్యేక కార్పొరేషన్ ఏర్పాటు చేసే ఆలోచనలో ప్రభుత్వం ఉన్నట్లు తెలుస్తోంది.

Telangana Ministers Decisions Cabinet Meeting : రైతు భరోసా, రైతు బీమా, పంటల బీమాకు కూడా కిసాన్ సమ్మాన్ నిధి అర్హతలను ఖరారు చేయాలని ప్రభుత్వం భావిస్తోంది. వీటన్నింటిపై కేబినెట్​లో చర్చించి తుది నిర్ణయం తీసుకోనున్నారు. రాష్ట్రం ఏర్పడి 10 సంవత్సరాలు ముగిసినందున ఇప్పటివరకు ఉమ్మడి రాజధానిగా ఉన్న హైదరాబాద్ ఏపీ విభజన చట్టం ప్రకారం తెలంగాణకు సొంతమైంది. దీనివల్ల హైదరాబాద్​లోని ఏపీ ఆస్తులతో పాటు రెండు రాష్ట్రాలకు సంబంధించిన అంశాలు మంత్రులు చర్చించనున్నారని సమాచారం. లోక్​సభ ఎన్నికల దృష్ట్యా తాత్కాలిక బడ్జెట్​ను ప్రవేశపెట్టిన ప్రభుత్వం, ప్రస్తుతం పూర్తి బడ్జెట్ పద్దులపై కసరత్తు చేస్తోంది. ఈ అంశాలు కూడా సమావేశంలో చర్చించే అవకాశం ఉంది.