'సాషా'కి ఘనంగా సీమంతమంట - సూసేకి ఊరంతా వచ్చెనంట!

ఖమ్మం జిల్లాలో పిల్లికి సీమంతం - హర్షం వ్యక్తం చేస్తున్న జంతు ప్రేమికులు

Seemantham Celebration To Cat In Khammam : మహిళకు సీమంతం జరిగే సమయంలో ఆమెకు చాలా ఆనందంగా ఉంటుంది. స్త్రీ మాతృత్వపు మాధుర్యాన్ని పొందే కొద్ది నెలల ముందు జరిగే ఈ వేడుకలో అందరూ వచ్చి ఆశీర్వదిస్తే ఆమెకు ఆ ఆనందమే వేరు. ఇలాగే ఖమ్మం జిల్లాలో ఓ ఇంట్లో సీమంతం ఘనంగా జరిగింది. దీంట్లో వింతేముంది అనుకోకండి. సీమంతం చేసింది ఎవరికో తెలిస్తే ఆశ్చర్యపోతారు. వారు తమ ఇంట్లో పెంపుడు పిల్లికి సీమంతం చేశారు.

పిల్లికి సీమంతం : ఖమ్మం జిల్లా మధిర సీపీఎస్​ రోడ్​లోని అల్లూరి నాగభూషణం, పద్మావతి దంపతులు ఒక పెంపుడు పిల్లిని పెంచుకుంటున్నారు. ఆ పిల్లి పేరు సాషా. అయితే ఆ పిల్లి కడుపుతో ఉండగా, దాని మీద ఉన్న అభిమానంతో దానికి సీమంతం వేడుక చేసి తమ అభిమానాన్ని చాటుకున్నారు. ఈ కార్యక్రమానికి హాజరైన బంధుమిత్రులు పిల్లిని అందంగా తయారు చేసి, గాజులు తొడిగి సాంప్రదాయంగా సీమంతం జరిపించారు. ఇరుగు పొరుగు వారు పండ్లు, ఫలహారాలు ఇచ్చారు. పిల్లికి సీమంతం జరిపించడం చాలా ఆనందంగా ఉందని దంపతులు తెలిపారు. ఈ కార్యక్రమాన్ని వీక్షించిన జంతు ప్రేమికులు హర్షం వ్యక్తం చేస్తున్నారు.