Satya Sai District SP On Gang Rape Case : ఆంధ్రప్రదేశ్లోని శ్రీ సత్యసాయి జిల్లాలో జరిగిన సామూహిక అత్యాచార ఘటన విచారణలో పోలీసులు పురోగతి సాధించారు. తరచూ దోపిడీలు, అత్యాచారాలకు పాల్పడే వ్యక్తులే ఈ ఘటనలో కూడా నిందితులని పోలీసులు తెలిపారు. ఈ కేసులో ప్రధాన నిందితులు నాగేంద్ర, ప్రవీణ్‌తో పాటు మరో ముగ్గురు మైనర్లను అరెస్టు చేసినట్లు సత్యసాయి జిల్లా ఎస్పీ రత్న తెలిపారు.
ఐదుగురు నిందితుల అరెస్టు : రెండ్రోజుల క్రితం నిర్మాణంలో ఉన్న ఓ ఫ్యాక్టరీ వాచ్‌మెన్‌ ఇంటికి వచ్చి బయట ఉన్న తండ్రీ, కొడుకులను బెదిరించి, ఇంట్లోకి ప్రవేశించి అత్తా కోడళ్లపై గ్యాంగ్ రేప్ చేశారు. అనంతరం ఇంట్లో ఉన్న 5 వేల 200 రూపాయల నగదును దోచుకెళ్లినట్లు ఎస్పీ తెలిపారు. ఈ ఘటనలో మొత్తం ఆరుగురు నిందితులు పాల్గొనగా ఇప్పటివరకు ఐదుగురిని అరెస్ట్ చేశారు. ఈ కేసులో మరో నిందితుడు పరారీలో ఉన్నాడని, అతని కోసం గాలిస్తున్నామని ఎస్పీ రత్న తెలిపారు.
పొట్టకూటికోసం వలస వచ్చి : అత్యాచారానికి గురైన బాధితులు కర్ణాటకలోని బళ్లారికి చెందిన ఒకే కుటుంబానికి చెందిన వారు. వీరంతా ఉపాధి నిమిత్తం శ్రీ సత్యసాయి జిల్లా చిలమత్తూరు పోలీస్ స్టేషన్ పరిధిలో ఉన్న ఓ పేపర్ మిల్లులో వాచ్మెన్గా పనిచేస్తున్నారు. ఎప్పటిలాగే విధులు ముంగించుకొని శుక్రవారం రాత్రి నిద్రకు ఉపక్రమించారు. శనివారం తెల్లవారుజామున ఆరుగురు వ్యక్తులు రెండు ద్విచక్ర వాహనాలపై వచ్చారు. నిర్మాణం వద్ద నివాసం ఉంటున్న అత్త, కోడలిని కత్తులతో బెదిరించి నిందితులు సామూహిక అత్యాచారానికి పాల్పడ్డారు.
రాష్ట్రవ్యాప్తంగా ఈ ఘటన సంచలనం సృష్టించింది. ఈ ఘటనపై ఏపీ ముఖ్యమంత్రి చంద్రబాబు నాయుడు స్పందించారు. నిందితులను వెంటనే అరెస్ట్ చేయాలని ఆదేశించారు. రంగంలోకి దిగిన పోలీసులు 48 గంటల్లో నిందితులను అరెస్ట్ చేశారు.
'నిందితుల్లోని ముగ్గురు మైనర్లకు తండ్రులు లేరు. వీరు టైల్స్ కంపెనీలో పనులు చేసేవారు. ప్రధాన నిందితులు నాగేంద్ర వీరిని అసాంఘీక కార్యకలాపాలు చేసేందుకు శిక్షణ అందించారు. వీరితో ఇటువంటి పనులు చేయిస్తున్నారు' - రత్న, పుట్టపర్తి ఎస్పీ
నిందితులకు వేగంగా శిక్ష పడేందుకు ఈ కేసును ప్రత్యేక కోర్టుకు అప్పగిస్తున్నట్లు ఏపీ హోంమంత్రి అనిత తెలిపారు. రాబోయే రోజుల్లో ఇలాంటి ఘటనలు మళ్లీ జరగకుండా తగిన చర్యలు చేపడతామన్నారు.
