Sabarimala Pilgrims Insurance : కేరళలోని శబరిమల ఆలయాన్ని పర్యవేక్షించే ట్రావెన్కోర్ దేవస్వం బోర్డు యాత్రికుల కోసం ఉచిత ప్రమాద బీమా పథకాన్ని తీసుకొచ్చింది. ఇటీవల జరిగిన వివిధ రోడ్డు ప్రమాదాల్లో దురదృష్టవశాత్తు పలువురు అయ్యప్ప భక్తులు మరణించడం వల్ల ఆ నిర్ణయం తీసుకుంది. తద్వారా ప్రమాదంలో మరణించిన వారి కుటుంబాలకు రూ.5 లక్షల పరిహారం అందించనుంది.
మండల- మకరవిళక్కు సీజన్ మరికొద్ది రోజుల్లో ముగియనున్న వేళ ట్రావెన్కోర్ దేవస్వం బోర్డు ఆ ప్రమాద బీమా పథకాన్ని ప్రారంభించింది. పథనంతిట్ట, కొల్లాం, అలప్పుజ, ఇడుక్కి జిల్లాల్లో ప్రమాదం జరిగితే ప్రాణాలు కోల్పోయిన యాత్రికుల కుటుంబసభ్యులకు రూ.5 లక్షల పరిహారం అందించనుంది. అందుకు గాను యాత్రికుల నుంచి ఎటువంటి రుసుము వసూలు చేయడం లేదు.
వర్చువల్ క్యూ పద్ధతి లేదా స్పాట్ బుకింగ్‌ ద్వారా బుక్ చేసుకున్న అందరి యాత్రికులకు ప్రమాద బీమా పథకం వర్తిస్తుంది. అందుకు గాను ట్రావెన్కోర్ దేవస్వం బోర్డు యునైటెడ్ ఇండియా ఇన్సూరెన్స్ కంపెనీతో ఒప్పందం కుదుర్చుకుంది. అదనపు జిల్లాలకు కూడా బీమా పథక కవరేజీని విస్తరించే అంశంపై చర్చలు జరుపుతున్నట్లు దేవస్వం బోర్డు అధ్యక్షుడు పీఎస్ ప్రశాంత్ తెలిపారు.
కార్మికుల కోసం మరో పథకం
శబరిమలలో పనిచేసే కార్మికుల కోసం మరో బీమా పథకాన్ని ప్రారంభించింది దేవస్వం బోర్డు. శబరిమలను శుభ్రపరిచే 'విశుధి' కార్మికులు, పంపా నుంచి సన్నిధానం వరకు భక్తులను తీసుకుని వెళ్లే డోలీ కార్మికులకు కూడా ఆ పథకం వర్తిస్తుంది. ప్రమాదవశాత్తు మరణించినప్పుడు లేదా పూర్తిగా వైకల్యం సంభవించినప్పుడు రూ.10 లక్షలు, పాక్షిక వైకల్యానికి రూ. 5 లక్షలు పరిహారాన్ని ఇండియా పోస్టల్ పేమెంట్స్ బ్యాంక్ సహకారంతో అందించనుంది.
బీమా కోసం కార్మికులు రూ.499ను ప్రీమియం రూపంలో చెల్లించాల్సి ఉంటుంది. ఆ పథకంలో చేరిన వారి పిల్లలకు ఉచిత వైద్య బీమా, విద్యతోపాటు మరిన్ని ప్రయోజనాలను అందించడానికి చర్చలు కొనసాగుతున్నాయి. యాత్రికులు, కార్మికుల కుటుంబాలకు ఆర్థిక భద్రతను కల్పించే ప్రయత్నంలో భాగంగా ట్రావెన్కోర్ దేవస్వం బోర్డు ఈ బీమా పథకాలను ప్రారంభించిందని సంబంధిత వర్గాలు తెలిపాయి.
శబరిమల భక్తుల కోసం 'స్వామి' AI చాట్‌బాట్‌- ఇకపై ఏ విషయంలోనూ నో ప్రాబ్లమ్!
దయచేసి వినండి - ట్రైన్లలో అలా చేయకండి : శబరిమల వెళ్లే భక్తులకు రైల్వే కీలక విజ్ఞప్తి
