Deputy CM Bhatti Visit Ramagundam Thermal Power Plant : రామగుండంలో మూతపడ్డ బీ పవర్ హౌస్ 62.5 మెగావాట్ల విద్యుత్ ప్లాంట్ స్థానంలో 800 మెగావాట్ల పవర్ ప్రాజెక్టును నిర్మించనున్నట్లు డిప్యూటీ సీఎం భట్టి విక్రమార్క స్పష్టం చేశారు. పవర్ ప్రాజెక్టుపై ప్రభుత్వం విధానపరమైన నిర్ణయం తీసుకుందని తెలిపారు. ఈ మేరకు రామగుండంలో మంత్రులు శ్రీధర్ బాబు, పొన్నం ప్రభాకర్తో కలిసి పర్యటించిన ఉపముఖ్యమంత్రి భట్టి విక్రమార్క బీ పవర్ హౌస్ను సందర్శించి పరిశీలించారు. పవర్ పాయింట్ ప్రజెంటేషన్ ద్వారా అధికారులు బి పవర్ హౌస్ గురించి వివరించారు. ఉపముఖ్యమంత్రి భట్టి విక్రమార్క పలు అభివృద్ధి పనులకు శంకుస్థాపన చేశారు.
అనంతరం ఉపముఖ్యమంత్రి భట్టి విక్రమార్క మాట్లాడుతూ, చారిత్రాత్మకమైన పవర్ ప్రాజెక్టు 50 ఏళ్ల క్రితం ఏర్పడి ఈ ప్రాంతానికి వెలుగునిచ్చిందని తెలిపారు. సాగునీటిని కూడా తీసుకువచ్చిన ప్రాజెక్టు, కాలం చెల్లడంతో మూసివేసే పరిస్థితికి వచ్చిందని అన్నారు. భావోద్వేగమైన పరిస్థితులతో ముడిపడి ఉన్న పవర్ ప్రాజెక్టుపై సీఎం రేవంత్ రెడ్డితో ఉమ్మడి జిల్లాల ప్రతినిధులు చర్చించామని పేర్కొన్నారు. ఈ క్రమంలో 800 మెగావాట్ల విద్యుత్ పవర్ ప్లాంట్ను ఏర్పాటు చేయాలని నిర్ణయానికి వచ్చామని స్పష్టం చేశారు.
సింగరేణి, జెన్కో సంయుక్త వెంచర్ : ఇందుకు సంబంధించి కొద్ది రోజుల్లోనే సానుకూల నిర్ణయం తీసుకుంటామని ఉపముఖ్యమంత్రి భట్టి విక్రమార్క వివరించారు. సింగరేణి, జెన్కో సంయుక్త వెంచర్గా పవర్ ప్రాజెక్టు ప్రారంభించే దిశగా చర్యలు తీసుకుంటామని అన్నారు. అందరి కోరిక మేరకు అతి త్వరలోనే పవర్ ప్రాజెక్టు టెండర్లు పిలుస్తామని హామీ ఇచ్చారు. భూసేకరణపై ప్రతిపాదన త్వరగా పంపించాలని అధికారులను కోరారు. ఇందిరమ్మ రాజ్యం, ప్రజా ప్రభుత్వం ఏర్పడిందని డిప్యూటీ సీఎం భట్టి విక్రమార్క చెప్పారు. ఈ కార్యక్రమంలో ఎమ్మెల్సీ జీవన్ రెడ్డి, ఎమ్మెల్యేలు, ఉన్నతాధికారులు, పార్టీ శ్రేణులు పాల్గొన్నారు.
"రామగుండంలో 800 మెగావాట్ల పవర్ ప్లాంట్ను ఏర్పాటు చేస్తాం. కొద్ది రోజుల్లోనే పవర్ ప్రాజెక్టుపై విధానపరమైన నిర్ణయం తీసుకున్నాం. సింగరేణి, జెన్కో జాయింట్గా పవర్ ప్రాజెక్టు ప్రారంభించే దిశగా చర్యలు చేపడతాం. అతి త్వరలోనే పవర్ ప్రాజెక్టు టెండర్లు పిలుస్తాం. భూసేకరణపై ప్రతిపాదన త్వరగా పంపించాలని అధికారులను కోరాం." - భట్టి విక్రమార్క, ఉపముఖ్యమంత్రి
రామగుండం విద్యుత్ కేంద్రం ఆధునికీకరణకు డిమాండ్ - కొత్త ప్లాంటు ఏర్పాటుకు ప్రతిపాదన!
