మీ మొబైల్​ ఫోన్​ జర భద్రం - ఒకవేళ పోయినా అలా చేస్తే దొరుకుతుంది !

ఫోన్లు అసాంఘిక శక్తుల చేతుల్లోకి వెళ్తే ఎన్నో ప్రమాదాలు - ఉమ్మడి మహబూబ్‌నగర్‌ జిల్లాలో పోయిన ఫోన్లు 15,337 -పోలీసులు రికవరీ చేసినవి 4,412 - ఫోన్ల విషయంలో ఎలాంటి జాగ్రత్తలు తీసుకోవాలంటే ?

Mahabubnagar Police Recovered lost Mobile Phones : మన జీవనంలో మొబైల్​ ఫోన్​ విడదీయరాని భాగమైపోయింది. ఫోన్​ లేకపోతే రోజు గడవదన్న స్థాయికి చేరుకున్నాం. వ్యక్తిగతమైన సమాచారం ఉండే ఫోన్​ పోయి అసాంఘిక శక్తులు, సైబర్‌ క్రైమ్‌ నేరగాళ్ల చేతిలో పడితే ఇబ్బందులే కాకుండా తీవ్రంగా నష్టపోయే ప్రమాదం కూడా ఉంది. కేసులు విచారణలు సైతం కొన్నిసార్లు ఎదుర్కోవాల్సి వస్తుంది. ఇలా పోయిన మొబైల్​ ఫోన్లను పోలీసులు అత్యాధునిక టెక్నాలజీతో రికవరీ చేస్తూ బాధితులకు అందించటంతో వారికి ఎంతో ఊరటగా మారింది. ఈ నేపథ్యంలో మొబైల్​ ఫోన్ల రికవరీలో జడ్చర్ల పోలీస్​ స్టేషన్​ రాష్ట్రంలోనే 6వ స్థానంలో ఉంది. ఈ సందర్భంగా ఫోన్ల విషయంలో తీసుకోవాల్సిన జాగ్రత్తలు, పలు ఆసక్తికర విషయాలతో ఈటీవీ భారత్​ ప్రత్యేత కథనం.

ఉమ్మడి మహబూబ్‌నగర్‌ జిల్లావ్యాప్తంగా నిత్యం ఎంతోమంది తమ మొబైల్​ ఫోన్లను పోగొట్టుకుంటున్నారు. మరికొందరి ఫోన్లు మార్కెట్లో చోరీకి గురవుతున్నాయి. వారు పోగొట్టుకుంటున్న ఫోన్లు సుమారు రూ.10 వేల నుంచి రూ.20 వేల విలువే కాదు, ఎంతో కీలకమైన వ్యక్తిగత సమాచారాన్ని సైతం కోల్పోతున్నారు. బంధువులు, అత్మీయులు, తెలిసిన వారి ఫోన్​ నంబర్లు, కుటుంబానికి చెందిన ఫొటోలు, బ్యాంకు లావాదేవీలు చేసే యాప్స్​, కీలకమైన పత్రాలు ఇలా ఎన్నో ముఖ్యమైన వివరాలు అందులోని భద్రపరుస్తున్నాం. అందుకే ఫోన్​ పోయిన వెంటనే బాధితులు పోలీస్ స్టేషన్​కు వెళ్లి ఫిర్యాదు చేస్తున్నారు.

మహబూబ్ నగర్ జిల్లా పోలీసులు CEIR (Central Equipment Identity Register) పోర్టల్ ద్వారా 112 మొబైల్ ఫోన్లను జిల్లా IT cell సిబ్బంది సహకారంతో చేసి ఈ రోజు జిల్లా పోలీస్ కవాతు మైదానము నందు వాటిని సంబంధిత యజమానులకు తిరిగి అప్పగించడం జరిగింది.
Read More...https://t.co/5v7VQsveec pic.twitter.com/BLGqvf5lRD

— Mahbubnagar District Police (@MBNRpolice) November 6, 2024

అప్రమత్తత అవసరం : ఈ క్రమంలో పోలీసులు అత్యాధునిక టెక్నాలజీతో ఫోన్లు రికవరీ చేసి బాధితులకు అందిస్తుంటే వారు నమ్మలేకపోతున్నారు. రద్దీగా ఉండే ప్రాంతాల్లోనే మొబైల్​ ఫోన్లు ఎక్కువగా పోతున్నాయి. నంద్యాల జిల్లా డోన్​ ప్రాంతానికి చెందిన కొందురు ఫోన్ల చోరీలో అరితేరారు. వారు నెలలో ఒక రెండు సార్లు వచ్చి పట్టణాల్లో రద్దీగా ఉండే ప్రాంతాల్లో చోరీలు చేస్తారు. ఇలా మహబూబ్‌నగర్‌లోని మార్కెట్​లో, గడియారం కూడలి, పాన్​ చౌరస్తా ప్రాంతాల్లో చేతివాటం ప్రదర్శిస్తున్నారు. అంతేకాకుండా మార్కెట్లో, బస్సులు, రైళ్లల్లో చోరీలు ఎక్కువగానే జరుగుతున్నాయి. చోక్కా జేబులో పెట్టుకుంటున్న ఫోన్లే ఎక్కువగా చోరీకి గురువుతున్నాయి. రద్దీ ప్రాంతాల్లోకి వెళ్లేటప్పుడు ఇతరులను గమనిస్తూ అప్రమత్తంగా ఉండాలి.

మహబూబూబ్‌నగర్‌ జిల్లాలోనే అత్యధికం : ఉమ్మడి పాలమూరులో ఎక్కువ చరవాణుల రికవరీ చేసిన జిల్లాగా మహబూబ్‌నగర్‌ ప్రథమ స్థానంలో నిలిచింది. ఆ తర్వాత స్థానంలో జోగులాంబ గద్వాల జిల్లా ఉంది. ఉమ్మడి మహబూబ్‌నగర్‌ జిల్లా వ్యాప్తంగా గతేడాది నుంచి దాదాపు 4,412 మొబైల్​ ఫోన్లను రికవరీ చేశారు. వాటి విలువ సుమారు రూ.4.41కోట్లు ఉంటుందని అంచనా. రాష్ట్రంలో ఎక్కువగా ఫోన్లను రికవరీ చేసిన 10 పోలీసు స్టేషన్లు గుర్తించగా జడ్చర్ల ఠాణా ఆరో స్థానంలో ఉంది.

మహబూబ్‌నగర్‌ పోలీస్​ స్టేషన్​లో 216, బాలానగర్‌ ఠాణాలో 114 చొప్పున ఫోన్లను రికవరీ చేశారు. జోగులాంబ గద్వాల జిల్లా అయిజ ఠాణాలో 263, గద్వాల ఠాణాలో 170 చొప్పున ఫోన్లను రికవరీ చేశారు. నాగర్‌కర్నూల్‌ జిల్లాలోని నాగర్‌కర్నూల్‌ స్టేషన్​లో ఎక్కువగా 262, అచ్చంపేట ఠాణాలో 131, కల్వకుర్తి ఠాణాలో 106 ఫోన్లను రికవరీ చేశారు. వనపర్తి జిల్లాలో పెబ్బేరు ఠాణాలో 180, పాన్‌గల్‌ స్టేషన్​లో 135, నారాయణపేట జిల్లాలో ఎక్కువగా కోస్గి స్టేషన్​లో 101, నారాయణపేట ఠాణాలో 79, మక్తల్​ స్టేషన్​లో 67 చోప్పున మొబైల్​ ఫోన్లను రికవరీ చేశారు.

సీఈఐఆర్‌ పోర్టల్‌లో దరఖాస్తు చేయండిలా : ఎవరైనా తమ ఫోన్​ కోల్పోతే వెంటనే www.ceir.gov.in అనే కేంద్ర సమాచార మంత్రిత్వ శాఖకు చెందిన సెంట్రల్‌ ఎక్విప్‌మెంట్‌ ఐడింటిటీ రిజిస్టర్‌ పోర్టల్‌లో వెళ్లి వివరాలు, ఫోన్​ ఐఎంఈఐ నంబర్​ నమోదు చేయాలి. అనంతరం ఆ వివరాలను ప్రింట్​ తీసుకుని స్థానిక పోలీస్​ స్టేషన్​లో ఇవ్వాలి.