IT Raids On Dil Raju Home offices : ప్రముఖ నిర్మాత, తెలంగాణ ఫిల్మ్ డెవలప్మెంట్ కార్పొరేషన్ (ఎఫ్‌డీసీ) ఛైర్మన్‌ దిల్ రాజు కార్యాలయాలు, నివాసాల్లో ఐటీ అధికారులు సోదాలు నిర్వహిస్తున్నారు. ఈ తెల్లవారుజాము నుంచి తనిఖీలు కొనసాగుతున్నట్లు ఐటీ (ఆదాయపు పన్ను శాఖ) వర్గాలు వెల్లడించాయి. మరోవైపు మైత్రీ మూవీస్ కార్యాలయంతో పాటు, పుష్ప-2 చిత్ర నిర్మాత నవీన్ యెర్నేని నివాసంలో కూడా ఆదాయపు పన్ను శాఖ అధికారులు సోదాలు నిర్వహిస్తున్నారు.
55 బృందాలతో ఐటీ సోదాలు : ఇటీవల కాలంలో ఎన్నడూ లేనంతగా ఏకంగా 55 ఐటీ బృందాలతో సోదాలు నిర్వహిస్తున్నారు. ప్రాథమిక సమాచారం మేరకు కేసు నమోదు చేసిన ఐటీ అధికారులు ఇవాళ సోదాలు నిర్వహిస్తున్నట్లుగా తెలుస్తోంది. ఈ సినిమాలు భారీ బడ్జెట్‌తో నిర్మించడం, వాటికి వస్తున్న రిటర్న్‌లు కూడా భారీగా ఉండటంతో వీరు చెల్లించిన ఆదాయపు పన్నుకు, వీరికి వస్తున్న రాబడులకు పొంతన లేకపోవడంతో ఈ తనిఖీలు నిర్వహిస్తున్నట్లు ఐటీ వర్గాలు చెబుతున్నాయి.
ఐటీ రిటర్న్స్లో వీరు చూపించిన మొత్తానికి వ్యత్యాసం ఉన్నట్లు తెలుస్తోంది. అదేవిధంగా ఈ చిత్రాల నిర్మాణాలకు అయిన ఖర్చులు, వస్తున్న ఆదాయాలు తరచూ మీడియాలో కూడా వస్తుండటంతో వీటన్నింటిని పరిగణనలోకి తీసుకుని, ఐటీ శాఖ అధికారులు తనిఖీలు నిర్వహిస్తున్నారు. తనిఖీలు ముగిసిన తరువాత ఈ ఐటీ బృందాలు స్వాధీనం చేసుకునే పత్రాలు, ఇతరత్ర పరిశీలన తర్వాతే ఐటీ ఎగవేత జరిగిందా? లేదా? అన్నది వెల్లడవుతుందని సంబంధిత వర్గాలు చెబుతున్నాయి.
