Karthika Vanabhojanalu 2024 : ఆటపాటలతో సందడిచేసే గార్డెన్ పార్టీని నిర్వహించేందుకు ముందస్తుగా ప్లాన్ వేసుకుంటాం. చెట్ల నీడన సరదాగా కలిసి భోజనం చేయడం, ఆటవిడుపుగా ఓరోజు హితులు, ఇరుగుపొరుగుతో గడిపే వనభోజనాలంటే ఇష్టపడని వారెవరుంటారు చెప్పండి? అందుకే కార్తిక మాసంతోనే పరిమితం కాకుండా. డిసెంబరు నెల చివరి వరకు పిక్నిక్లు జరుగుతూనే ఉంటాయి. ఈ వనభోజనాల్లో ఎన్నో సాంస్కృతిక, సామాజిక, శాస్త్రీయ, వైజ్ఞానిక అంశాలు ఉంటాయి.
శాస్త్రం ఏం చెబుతోందంటే : రకరకాల ఫల, పుష్ప, వృక్ష జాతులున్నటువంటి తోటలను వనభోజనాల కోసం ఎంచుకోవాలి. అక్కడ ఉసిరి చెట్టు తప్పనిసరిగా ఉండాలి. దానికి సమీపంలోనే ఆహార పదార్థాలు వండుకోవాలి. ఉసిరి చెట్టుకింద కార్తిక దామోదరునికి పూజలు నిర్వహించాలి. ఆ తర్వాత పనస ఆకులో ఆహారాన్ని తీసుకోవాలి. ఇది శాస్త్రం చెప్పినటువంటి ప్రక్రియ.
ఆరోగ్య ప్రయోజనాలివే : వనభోజనం విందు తోటలో చేయడమే అనుకుంటే పొరపాటే. ఈ ఆచారం వెనుక ఆరోగ్యకరమైన ఓ పద్దతి కూడా ఉంది. ఆయుర్వేద గుణాలున్నటువంటి మొక్కల నుంచి వచ్చేగాలి అనేక వ్యాధుల నుంచి ఉపశమనాన్ని కలిగిస్తుంది. ఉసిరి చెట్టుకింద కూర్చొని భోజనం చేసే క్రమంలో పీల్చే గాలితో పైత్యప్రకోపం తగ్గుతుంది. ఉసిరికి ఉండే విటమిన్ సి రక్తప్రసరణలోని ఇబ్బందులు, ఎసీడీటీ వంటి రుగ్మతలకు మందు అవుతుంది. జీర్ణక్రియ సక్రమంగా పనిచేస్తుంది.
వానలు తగ్గి చలి అందుకొనే సంధికాలం కార్తిక మాసం. ఈ సమయంలో శ్వాస సంబంధిత వ్యాధులు ఇబ్బంది పెడుతుంటాయి. వనభోజనం కారణంగా ఎదులాబాద్ రంగనాయకస్వామి ఆలయం గాలి ఔషధంలా పనిచేస్తుంది.
కార్తిక మాసం వచ్చిందంటే చాలు మేడ్చల్ నియోజకవర్గంలో ఇళ్లకంటే తోటలే ఎక్కువ సందడిగా ఉంటాయి. వనం నీడన జనం ఆత్మీయ వాహినిలా సాగిపోతుంది. వర్గాతీత బంధాలనేవి పెనవేసుకుంటాయి. వనభోజనం విందు అనే ఒకేఒక్క కార్యక్రమంతో అనాదిగా ఉన్న ఈ ఆచారంలో భక్తి భావం ఉన్నా మెండుగా ఆరోగ్యం స్నేహభావం ఇమిడి ఉన్నాయి.
మేడ్చల్ నియోజక వర్గంలో : కార్తిక మాసంలో మేడ్చల్ నియోజకవర్గంలో వనభోజనాల విందుల సందడి ఎక్కువగా ఉంటుంది. నగరానికి అతి సమీపంలో ఉండటంతో అక్కడి నుంచి చిన్నపెద్ద అనే తారతమ్యం లేకుండా కుటుంబ సభ్యులు భారీగా తరలివస్తుంటారు. నారపల్లిలోని భాగ్యనగర్ నందనవనం పార్కు, మేడిపల్లి, చెంగిచర్లలోని అటవీ శాఖకు చెందినటువంటి పార్కులు, కీసరలోని రామలింగేశ్వర స్వామి ఆలయం వనాల వద్ద, శామీర్పేట, మేడ్చల్, గుండ్లపోచంపల్లి. ఆటవీ ప్రాంతాలలోని పార్కులలో వనభోజనాల సందడి ఎక్కువగా ఉంటుంది.
ఆదివారం, ఇతర సెలవుల్లో కొంచెం రద్దీగా ఉంటాయి. ఆయా ' ప్రాంతాల నుంచి వచ్చే వారికి దిల్సుఖ్నగర్, ఉప్పల్, తార్నాక, సికింద్రాబాద్, కూకట్పల్లి, తదితర ప్రాంతాల నుంచి ఆర్టీసీ బస్సులు రాకపోకలు సాగిస్తాయి.
