Hair Care Tips For Women : రోజురోజుకు పెరిగిపోతున్న పర్యావరణ కాలుష్యం, మారుతున్న జీవన శైలి ప్రభావం కూడా కురులపై ఉంటోంది. అందుకే జుట్టు ఊడిపోవడం, పలుచనగా మారడం లాంటి సమస్యలు తలెత్తుతున్నాయి. వీటికి తోడు స్త్టెలింగ్ కోసం ఉపయోగించే ఉత్పత్తులు కూడా హెయిర్ను నిర్జీవంగా మార్చేస్తున్నాయి. మరి, వీటికి పరిష్కారమార్గం ఏమిటి? ఈ సమస్యల నుంచి ఉపశమనం పొందేందుకు ఎలాంటి జాగ్రత్తలు పాటించాలి? చక్కటి జుట్టును సొంతం చేసుకోవడం ఎలా?
రసాయన పదార్థాలకు దూరంగా ఉండండి : జుట్టు పటిష్ఠంగా పెరిగేందుకు అవసరమయ్యే పోషకాలను ఎప్పటికప్పుడు ఆహారం ద్వారానే కాకుండా బయట నుంచి కూడా అందిస్తూ ఉండాలి. అలాగే హెయిర్ శుభ్రంగా ఉండేవిధంగా చూసుకోవడం కూడా తప్పనిసరి. అంటే జుట్టుపై దుమ్ము, ధూళి, చుండ్రు ఇలాంటివేవీ దరిచేరకుండా జాగ్రత్తపడాలి. తల స్నానం చేసేటప్పుడు కూడా ఎంతమేరకు షాంపూ అవసరమో అంతమాత్రమే వినియోగించాలి. వీటిలో సల్ఫేట్ లేకుండా చూసుకోవాలి. అవసరానికి మించి షాంపూ ఉపయోగిస్తే ఆ ప్రభావం జుట్టు మీద తప్పకుండా కనిపిస్తుంది. అందుకే రసాయనాలు ఎక్కువగా ఉండే ప్రొడక్టులను ఎంత తక్కువ వాడితే అంత శ్రేయస్కరం.
జుట్టు త్వరగా ఆరాలని డ్రయర్లు వాడుతున్నారా? : ఆఫీసుకు వెళ్లేందుకు టైం అవుతోందనో, కాలేజీ బస్సు మిస్సవుతుందనో జుట్టు త్వరత్వరగా ఆరిపోవాలని ఈ మధ్య కాలంలో హెయిర్ డ్రయర్లు వాడుతూ ఉంటాం. అయితే వీటివల్ల అప్పటికప్పుడు జుట్టు ఆరిపోయి సమస్య పరిష్కారం అయినప్పటికీ అవి కొత్త సమస్యలు తెచ్చిపెడతాయి. అలాంటి ఉత్పత్తుల ద్వారా విడుదలయ్యే వేడి హెయిర్ను మరింత బలహీనపరుస్తుంది. ఫలితంగా తల దువ్వేటప్పుడు వెంట్రుకలు సగంలో తెగిపోవడం లేదా మొత్తానికి ఊడిపోతుండటం లాంటివి జరుగుతుంది. కాబట్టి డ్రయర్లు, కర్లర్స్, స్ట్రెయిటనర్స్ మొదలైన ఉత్పత్తులకు ఎంత దూరంగా ఉంటే అంత మంచిదంటున్నారు నిపుణులు.
పోనీటెయిల్స్ వేసుకోకపోవడమే ఉత్తమం : కళాశాలకు వెళ్లే అమ్మాయిలు లేదా ఆఫీసుకు వెళ్లే మహిళలు స్త్టెల్‌గా కనిపించడానికో లేక తక్కువ సమయం ఉందనో ఎక్కువగా పోనీటెయిల్స్ వేసుకుంటూ ఉంటారు. కానీ జుట్టంతా అలా బిగుతుగా లాగి బ్యాండ్ పెట్టడం వల్ల కుదుళ్లు బలహీనపడే అవకాశం ఉంది. హెయిర్పై ఒత్తిడి పెరిగి తెగిపోతుంది. కాబట్టి జుట్టును సాధ్యమైనంత వరకు వదులుగానే ఉంచడం మంచిది. అలా వదులుగా ఉండే హెయిర్‌స్త్టెల్స్ ప్రయత్నించడమే బెటర్.
జుట్టు చివర్లు ట్రిమ్ చేయాలి : జుట్టు చివర్లను ఎప్పటికప్పుడు ట్రిమ్ చేసుకుంటుండాలి. ఇలా చేయడం వల్ల కురుల చివర్లు ఆరోగ్యంగా ఉంటాయి. జుట్టుకు అవసరమయ్యే పోషణ సులభంగా అంది, హెయిర్ ఎదుగుదల బాగుంటుంది.
