Ex CM KCR Drive a Car on the Road : పైన ఉన్న చిత్రం చూస్తే మీకు ఏదో డౌట్ వచ్చే ఉంటుందే. అదే కారు డ్రైవింగ్ చేస్తున్న వ్యక్తి మాజీ సీఎం కేసీఆర్ అని? అసలు బీఆర్ఎస్ అధినేత కేసీఆర్ ఏంటి? కారు నడపడం ఏంటని ఆశ్చర్యపోతున్నారా? ఎప్పుడూ సభలు, సమావేశాలు అంటూ రాజకీయాల్లో బిజీబిజీగా ఉండి ప్రత్యర్థులపై విరుచుకుపడే కేసీఆర్నే చూశాం.
కానీ ఇప్పుడు అందుకు భిన్నంగా ఎప్పుడూ చూడని సన్నివేశం చూస్తున్నాం. అదే బీఆర్ఎస్ అధినేత కేసీఆర్ ఓమ్నీ వ్యాన్ నడపడం. ఓమ్నీ వ్యాన్ స్టీరింగ్ను తన చేతుల్లోకి తీసుకుని కేసీఆర్నే స్వయంగా డ్రైవింగ్ చేశారు. ఇప్పుడు ఈ ఫొటో సోషల్ మీడియాలో వైరల్గా మారింది. కాలు ఆపరేషన్ తర్వాత కర్ర సహాయంతో కాకుండా మ్యానువల్ కారు నడిపి చూడాలని డాక్టర్లు సూచించారు. ఈ క్రమంలో మాజీ సీఎం ఇలా తన పాత కారు ఓమ్నీ కారును నడిపి అందరినీ ఆశ్చర్యపరిచారు.
KCR Drive Omni Car : గతేడాది డిసెంబరు 8వ తేదీన అర్ధరాత్రి కేసీఆర్ కాలు జారి ఎర్రవల్లిలోని తన ఫాంహౌస్లో పడ్డ సంగతి తెలిసిందే. వెంటనే కుటుంబ సభ్యులు కేసీఆర్ను సోమాజిగూడలోని యశోదా ఆసుపత్రికి తరలించారు. అనంతరం మాజీ సీఎం కేసీఆర్కు చికిత్స చేయించారు. అదే రోజు పలు పరీక్షలు చేసిన ఆసుపత్రి వైద్యులు ఎముక విరిగిందని తెలిపారు. డిసెంబరు 9వ తేదీన కేసీఆర్కు తుంటి ఎముక మార్పిడి శస్త్రచికిత్స చేశారు. అది విజయవంతమైంది. అనంతరం వైద్యుల సూచన మేరకు తనకు కేటాయించిన గదిలో వైద్యుల పర్యవేక్షణలో వాకర్ సాయంతో మెల్లగా అడుగులు వేస్తూ నడిచారు. ఆ వీడియోను ఎక్స్ వేదికగా బీఆర్ఎస్ విడుదల చేసింది. ఆయనను కలిసేందుకు సీఎం రేవంత్ రెడ్డి, ఏపీ సీఎం చంద్రబాబు, చిరంజీవి ప్రముఖులు వెళ్లి పరామర్శించారు.
యశోద ఆసుపత్రిలోనే నాలుగు రోజుల పాటు చికిత్స పొందిన అనంతరం కాస్త ఆరోగ్యం కుదిటపడిన అనంతరం డిసెంబరు 13వ తేదీన డిశ్చార్జ్ ఇచ్చి జూబ్లీహిల్స్లోని నందినగర్ నివాసానికి తీసుకెళ్లారు. అక్కడి నుంచే పార్టీ కార్యకలాపాల్లో పాల్గొన్నారు. బీఆర్ఎస్ శ్రేణులకు దిశానిర్దేశం చేశారు. కొద్ది రోజుల తర్వాత కర్ర సాయంతో కేసీఆర్ నడవడం ప్రారంభించారు. లోక్సభ ఎన్నికల సమయంలో కూడా కర్ర పట్టుకుని పార్టీ కార్యకలాపాల్లో పాల్గొన్నారు. ప్రచార కార్యక్రమాల్లో పాల్గొన్నారు. ఆ తర్వాత కేసీఆర్ కొంతమేర కోలుకోవడంతో గత కొద్ది రోజులుగా కర్ర సాయం లేకుండానే నడవడం ప్రారంభించారు. రెండు రోజుల క్రితం బీఆర్ఎస్ ఎమ్మెల్యేలతో సమావేశమయ్యారు. ఈ క్రమంలో ఇంకా ఆరోగ్యం మెరుగుపడటానికి మ్యానువల్ కారు నడపాలని డాక్టర్లు సూచించారు. దీంతో తన పాత ఓమ్నీ వ్యాన్ను కేసీఆర్ గురువారం నడిపారు. ఇప్పుడు ఈ ఫొటోలు వైరల్గా మారాయి.
వాకర్ సాయంతో కేసీఆర్ అడుగులు - ఆరోగ్యం కాస్త మెరుగుపడిందన్న వైద్యులు
యశోద ఆసుపత్రి నుంచి కేసీఆర్ డిశ్చార్జ్ - నందినగర్ నివాసానికి తీసుకెళ్లిన కేటీఆర్, హరీశ్రావు
