వివాహ వేడుకలో అనుకోని అతిథి ప్రత్యక్షం - భయంతో బంధుమిత్రుల పరుగో పరుగు

పెళ్లి మండపంలో హల్​చల్​​ చేసిన ఏడు అడుగుల కొండచిలువ - కొండచిలువను చూసి భయంతో పరుగులు తీసిన పెళ్లివారు - కొండచిలువను పట్టుకొని తీసుకెళ్లిన అటవీశాఖ సిబ్బంది

Python at Wedding Ceremony : ఓ ఫంక్షన్​ హాలులో వివాహం జరుగుతోంది. అంతలోనే ఆ వివాహ వేదిక వద్దకు ఓ అనుకోని అతిథి విచ్చేశారు. ఆ అతిథిని చూసిన అక్కడి వారంతా భయంతో కేకలు వేస్తూ పరుగులు తీశారు. అదేంటి? అందరూ భయంతో పరుగులు తీస్తున్నారంటే అది ఏదో పులో, సింహమో అనుకుంటే పొరపాటే. అక్కడకు వచ్చిన ఆ అనుకొని అతిథి కొండచిలువ. దాని పొడవు 7 అడుగులు. అంత పెద్ద కొండచిలువను చూసిన వారంతా భయంతో పరుగందుకున్నారు. ఇంతకీ అది ఎక్కడ జరిగిందంటే?

స్థానికులు తెలిపిన వివరాల ప్రకారం, ఆంధ్రప్రదేశ్​లోని పశ్చిమ గోదావరి జిల్లాలోని కొవ్వూరులో కాశీ విశ్వేశ్వర స్వామి పంచాయతన శివాలయ మండపం ఉంది. అక్కడి గోదావరి గట్టుపై సుబ్రహ్మణ్యేశ్వర స్నానఘాట్​లోని పై అంతస్తులో శివాలయం ఉండగా, కింది భాగంలో కల్యాణ మండపం, వేదిక ఉన్నాయి. ప్రస్తుతం పెళ్లిళ్ల సీజన్ నడుస్తుండటంతో ఇక్కడి కల్యాణ మండపంలోనూ పెళ్లిళ్లు జరుగుతున్నాయి. అలాగే బుధవారం రాత్రి కూడా ఓ జంట వివాహం జరుగుతుంది. అంతా పెళ్లి బిజీలో ఉత్సాహంగా ఉన్నారు. అంతలో ఒకతనికి గోడ పక్కగా ఏదో మెరుస్తూ, కదులుతున్నట్లు కనిపించింది. ఏంటా అని దగ్గరు వెళ్లి చూశాడు.

తీరా అక్కడ ఉన్నది చూస్తే సుమారు 7 అడుగుల పొడవున్న కొండచిలువ. అది అటూ ఇటూ తిరుగుతోంది. దీంతో ఒక్కసారిగా ఉలిక్కిపడి పాము.. పాము.. కొండ చిలువ అంటూ బిగ్గరగా కేకలు వేశాడు. ఆ అరుపులతో పెళ్లి మండపంలోని వారంతా భయంతో పరుగులు తీశారు. ఆ గుంపులో ఎవరో స్థానిక పట్టణ పోలీసులకు పెళ్లి మండపంలో కొండచిలువ వచ్చిందని సమాచారం అందించారు. వెంటనే పోలీసులు అక్కడికి హుటాహుటిన చేరుకున్నారు.

గంట సేపు కదలకుండా ఉన్న కొండచిలువ : వారందరినీ చూసిన కొండ చిలువ భయంతో ఎటూ కదలకుండా అక్కడే చాలాసేపు ఉండిపోయింది. సుమారు గంట సమయం తర్వాత కొండచిలువ కల్యాణ మండపం గేటు పక్క నుంచి గోదావరి వైపు వెళ్లిపోయింది. దీంతో అక్కడి వారంతా ఊపిరి పీల్చుకున్నారు. అనంతరం మండపంలో ఓ వైపు చివరికి చేరి వివాహ తంతును పూర్తి చేశారు. ఇంతలోనే అక్కడికి చేరుకున్న అటవీ శాఖ అధికారులు, గోదావరి ఒడ్డుకు చేరిన కొండచిలువను పట్టుకొని తీసుకెళ్లారు. దీంతో అంతా ఊపిరి పీల్చుకున్నారు.