WPL 2024 Shreyanka Patil: సుదీర్ఘ నిరీక్షణకు తెరపడింది. గత 16ఏళ్లుగా ట్రోఫీ కోసం యుద్ధం చేస్తున్న రాయల్ ఛాలెంజర్స్ బెంగుళూరు ఎట్టకేలకు విజేతగా నిలిచింది. ఆర్సీబీ పురుషులకు సాధ్యం కాని టైటిల్ ను మహిళలు అందుకుని చూపించారు. డబ్యూపీఎల్ 2024 ఫైనల్లో దిల్లీ క్యాపిటల్స్ను చిత్తుగా ఓడించి ఆర్సీబీ టైటిల్ ముద్దాడింది. అయితే ఈ విజయంలో ఆర్సీబీ యువ స్పిన్నర్ శ్రేయాంక పాటిల్దే కీలక పాత్ర అని చెప్పవచ్చు.
ఫైనల్లో నాలుగు వికెట్లు తీసి దిల్లీని దెబ్బకొట్టింది. పాటిల్ 3.3 ఓవర్లలో 12 పరుగులిచ్చి నాలుగు వికెట్లు తీసింది. డబ్ల్యూపీఎల్ చరిత్రలో ఒక సీజన్‌లో రెండుసార్లు నాలుగు వికెట్ల ప్రదర్శన చేసిన తొలి మహిళా క్రికెటర్గా శ్రేయాంక పాటిల్ రికార్డ్ కొట్టింది. ఇంతకుముందు ముందు మార్చి 10న దిల్లీ క్యాపిటల్స్‌తోనే జరిగిన మ్యాచ్‌లో శ్రేయాంక పాటిల్ 4 ఓవర్లలో 26 పరుగులిచ్చి నాలుగు వికెట్లు పడగొట్టింది. మరి తన అద్భుత ప్రదర్శనతో ఆర్సీబీ తొలి టైటిల్ గెలవడంలో కీలక పాత్ర పోషించిన శ్రేయంకా ఎవరంటే? 2024 డబ్ల్యూపీఎల్లో 21 ఏళ్ల శ్రేయాంకా పాటిల్‌కు ఎప్పటికీ గుర్తుండిపోతుందనే చెప్పవచ్చు
శ్రేయాంక బెంగుళూరులో జన్మించింది. దేశవాళీ క్రికెట్లో కర్నాటక జట్టుకు ప్రాతినిథ్యం వహిస్తుంది. దేశవాళీ క్రికెట్లో మెరుగ్గా రాణించడం వల్ల ఆమెకు టీమ్ఇండియాలోకి ఎంట్రీ లభించింది. గతేడాది ఆస్ట్రేలియా మహిళల జట్టుతో జరిగినే వన్డేతో ఇంటర్నేషనల్ క్రికెట్లోకి అడుగుపెట్టింది శ్రేయాంకా పాటిల్. ఇప్పటి వరకు భారత్ తరపున 2 వన్డేలు, 6 టీ20లు ఆడింది. వరుసగా 4,8 వికెట్లు పడగొట్టి సంచలనం నమోదు చేసింది. డబ్య్లూపీఎల్ 2023 వేలంలో ఆర్సీబీ శ్రేయాంకను రూ.10 లక్షలకు కొనుగోలు చేసింది.
ఇక ఈ సీజన్‌లో మొత్తం 8 మ్యాచ్‌లు ఆడిన పాటిల్ 13 వికెట్లు పడగొట్టింది. టోర్నీలో అత్యధిక వికెట్లు తీసిన బౌలర్‌గా కూడా శ్రేయాంక పాటిల్ నిలిచింది. దీంతో పర్పుల్ క్యాప్ను సొంతం చేసుకుంది. ఇది మాత్రమే కాదు, పాటిల్‌కు డబ్య్లూపీఎల్ ఎమర్జింగ్ ప్లేయర్ 2024 అవార్డు కూడా లభించింది. ఇక శ్రేయాంక మహిళ కరీబియన్ ప్రీమియర్ లీగ్ లోనూ పాల్గొంది. ఈ లీగ్లో గయానా అమెజాన్ వారియర్స్కు ప్రాతినిథ్యం వహిస్తుంది.
