అమన్‌ అదరహో - బోణీ కొట్టిన టీమ్ ఇండియా!

జపాన్‌పై భారత్‌ ఘన విజయం - కెప్టెన్ మహ్మద్‌ అమన్‌ సెంచరీ.

U19 Asia Cup Teamindia : అండర్ - 19 ఆసియా కప్‌లో టీమ్ ఇండియా బోణీ కొట్టింది. జపాన్‌పై యువ భారత్ 211 పరుగుల తేడాతో అద్భుత విజయాన్ని అందుకుంది.

ఈ మ్యాచ్​లో మొదట బ్యాటింగ్​కు దిగిన భారత జట్టు నిర్ణీత 50 ఓవర్లలో 6 వికెట్లు కోల్పోయి 339 పరుగుల భారీ స్కోరు చేసింది. అయితే ఈ భారీ ఛేదనలో జపాన్‌ 50 ఓవర్లలో 128/8కే పరిమితమవ్వడంతో ఓటమి తప్పలేదు. దీంతో భారత్‌కు భారీ విజయం దక్కింది.

ఓపెనర్ హ్యూగో కెల్లీ (111 బంతుల్లో 50;) టాప్ స్కోరర్​గా నిలిచింది. ఛార్లెస్‌ హింజ్‌ (35) మంచిగానే రాణించాడు. మిగతా బ్యాటర్లెవరూ పెద్దగా స్కోర్లేమీ చేయలేదు. భారత బౌలర్లలో హార్దిక్ రాజ్‌, కార్తికేయ, చేతన్‌ శర్మ తలో రెండు వికెట్లు పడగొట్టగా, యుధజిత్ ఒక వికెట్ తీశాడు.

అదిరే ప్రదర్శన చేసిన అమన్‌ - టీమ్ ఇండియా కెప్టెన్ మహ్మద్‌ అమన్‌ (118 బంతుల్లో 122*; 7 ఫోర్లు) సెంచరీ బాదడం వల్ల జట్టుకు భారీ స్కోరు లభించింది. ఓపెనర్ ఆయుష్‌ మాత్రే ( 29 బంతుల్లో 54; 6 ఫోర్లు, 4 సిక్స్‌లు) అదిరే ఇన్నింగ్స్ ఆడాడు.

వైభవ్‌ సూర్యవంశీ (23 బంతుల్లో 23; 3 ఫోర్లు, 1 సిక్స్‌) దూకుడుగా ఆడినప్పటికీ ఎక్కువ సేపు క్రీజులో ఉండలేకపోయాడు. కార్తికేయ (50 బంతుల్లో 57; 5 ఫోర్లు, 1 సిక్స్‌) హాఫ్ సెంచరీతో మెరిశాడు. ఆఖర్లో హార్దిక్ రాజ్‌ (12 బంతుల్లో 25*; 1 ఫోర్, 2 సిక్స్‌లు) దూకుడు ప్రదర్శించారు.

ఇకపోతే యంగ్ టీమ్ ఇండియా తన తర్వాతి మ్యాచ్​ను డిసెంబరు 4న యూఏఈతో పోటీ పడనుంది.