TEAM INDIA SECRET TRAINING CAMP : స్వదేశంలో న్యూజిలాండ్తో జరిగిన మూడు టెస్టుల సిరీస్‌లో వైట్‌వాష్‌కు గురైన టీమ్ ఇండియా ఇప్పుడు మరో కీలక సమరానికి సిద్ధమవుతోంది. నవంబర్ 22 నుంచి ప్రతిష్టాత్మక బోర్డర్ - గావస్కర్ ట్రోఫీ కోసం రెడీ అయింది. ఇందుకోసం ఇప్పటికే భారత జట్టు ఆస్ట్రేలియాకు చేరుకుంది. అయితే ఈ ఐదు టెస్టుల సిరీస్‌కు ముందు ఆస్ట్రేలియాలో భారత్ ఒక్క ప్రాక్టీస్ మ్యాచ్ కూడా ఆడట్లేదు. అయినా కూడా ఈ సిరీస్ ఎలాగైనా కైవసం చేసుకోవాలనే పట్టుదలతో ఉన్న టీమ్ఇండియా ఇప్పటికే సన్నాహాలు ప్రారంభించింది.
సీక్రెట్గా క్యాంప్లో - రెండుసార్లు ప్రపంచ టెస్ట్ ఛాంపియన్‌షిప్ (WTC) రన్నరప్‌గా నిలిచిన టీమ్ ఇండియా మరోసారి ఫైనల్‌ చేరాలని కసిగా ఉంది. టెస్ట్ ఛాంపియన్‌షిప్‌కు ముందు కీలక బోర్డర్- గావస్కర్ ట్రోఫీ కోసం ఆస్ట్రేలియాలో అడుగుపెట్టింది. ఆస్ట్రేలియాలో వరుసగా రెండు ట్రోఫీలు గెలిచిన భారత్, హ్యాట్రిక్‌ విజయంపై కన్నేసింది. దీనికోసం ఆస్ట్రేలియాకు రెండు బ్యాచ్‌లుగా వెళ్లిన భారత జట్టు, ఇప్పుడు సీక్రెట్ క్యాంప్లో ట్రైనింగ్‌ ప్రారంభించింది.
ఐదు మ్యాచ్‌ల సిరీస్ భాగంగా తొలి మ్యాచ్ నవంబర్ 22 నుంచి పెర్త్‌లో ప్రారంభం అవుతుంది. అయితే తొలి మ్యాచ్లో గెలుపొందేందుకు భారత క్రికెటర్లు పెర్త్‌లో సీక్రెట్ క్యాంప్లో ట్రైనింగ్‌ పొందుతున్నట్లు 'ది వెస్ట్ ఆస్ట్రేలియన్' నివేదిక పేర్కొంది. ఆప్టస్ స్టేడియం ప్రస్తుతం లాక్‌డౌన్‌లో ఉందని, ప్రాక్టీస్ సెషన్‌లను ప్రజలు వీక్షించేందుకు అవకాశం లేదని వెల్లడించింది.WACA మైదానంలో భారత జట్టు సీక్రెట్ క్యాంప్ ఏర్పాటు చేసుకుని మరీ సిరీస్‌కు సన్నద్దమవుతున్నట్లు ఆస్ట్రేలియా మీడియా తెలిపింది.
కఠినమైన ఆంక్షలు - భారత్ ప్రాక్టీస్ సెషన్‌లను ప్రైవేట్‌గా ఉంచారు. ప్రాక్టీస్ సెషన్లో ఫోన్‌ల వినియోగంపై, సహాయ సిబ్బందికి కఠిన ఆంక్షలు విధించారట. టీమ్ స్ట్రాటజీలు, శిక్షణా పద్ధతులు గోప్యంగా ఉండేందుకు ఈ చర్యలు తీసుకున్నట్లు సమాచారం. బయటి వ్యక్తులు ఫొటోలు, వీడియోలు తీయకుండా ఉండేందుకు నెట్స్‌తో ప్రాక్టీస్ చేస్తున్న ఏరియాను కవర్‌ చేశారు. అయినా కూడా కొంతమంది చాటుగా భారత ఆటగాళ్లు ప్రాక్టీస్ చేస్తున్న ప్రాంతానికి వెళ్లి వీడియో తీసి సోషల్ మీడియాలో పోస్టులు చేస్తున్నారు.
ప్రాక్టీస్ మ్యాచ్ రద్దుపై రోహిత్ - రుతురాజ్ గైక్వాడ్ నేతృత్వంలోని ఇండియా-ఎ జట్టుతో భారత జట్టు ఇంట్రా స్క్వాడ్ మ్యాచ్ ఆడాల్సింది. అయితే న్యూజిలాండ్తో హోమ్ టెస్ట్ సిరీస్ వైట్‌వాష్ తర్వాత బీసీసీఐ ఈ మ్యాచ్‌ను రద్దు చేసింది. చివరి నిమిషంలో గాయాలపాలు కాకుండా ఈ నిర్ణయం తీసుకున్నట్లు తెలిసింది. భారత్ కెప్టెన్ రోహిత్ శర్మ ఈ విషయంపై మాట్లాడుతూ "ప్రాక్టీస్ మ్యాచ్ కాకుండా, మేము ఇండియా-ఎతో మ్యాచ్ సిమ్యులేషన్‌ లాంటిది ప్లాన్ చేశాం. మేం 19 మంది ఆటగాళ్లతో కూడిన జట్టుతో ప్రయాణిస్తున్నాం. మాకు కేవలం మూడు రోజులు మాత్రమే కేటాయించారు. ప్రతి ఒక్కరినీ సిద్ధం చేసే విషయంలో ఆ మూడు రోజుల్లో ఎంత పనిభారం మీద పడుతుందో తెలీదు. కాబట్టి ప్రాక్టీస్ మ్యాచ్ కన్నా మ్యాచ్ సిమ్యులేషన్‌ అనువుగా ఉంటుందని భావించాం. ఇలా అయితే ప్లేయర్‌లు ఎక్కువ సేపు బ్యాటింగ్‌ చేయగలరు, బౌలింగ్‌ చేయగలరు. ఆట సమయం సమస్య కాదు కాబట్టి ఇదే కంఫర్టబుల్‌గా ఉంటుంది." అని వివరించాడు.
తొలి టెస్ట్ పిచ్ ఇదే - పెర్త్, ఆప్టస్ స్టేడియంలో మొదటి టెస్ట్ కోసం సిద్ధం చేసిన పిచ్ ఐకానిక్ WACA మైదానం పిచ్ తరహాలో ఉంది. WACA మైదానంలోని పిచ్‌లు పేస్, బౌన్స్‌కు అనుకూలిస్తాయి. ఆప్టస్ మ్యాచ్ కోసం ఎప్పటిలానే సంప్రదాయ బౌన్సీ పిచ్‌ను రూపొందించినట్లు ఆప్టస్ స్టేడియం హెడ్ క్యూరేటర్ ఐజాక్ మెక్డొనాల్డ్ తెలిపారు.
గత ఏడాది ఇదే స్టేడియంలో పాకిస్థాన్‌తో జరిగిన టెస్ట్‌ను గుర్తు చేసుకున్నాడు మెక్డొనాల్డ్. అనూహ్యంగా బంతి బౌన్స్‌ అవ్వడం, పిచ్‌పై పగుళ్లు రెండు జట్లకు పరిస్థితులను కష్టతరం చేశాయి. ఇప్పుడు జరగబోయే మొదటి టెస్టులో ఇలాంటి పరిస్థితులనే మెక్డొనాల్డ్ అంచనా వేస్తున్నాడు. పిచ్‌లు పేస్, బౌన్స్‌కు అనుకూలిస్తుందని పేర్కొన్నాడు.
టీమ్ ఇండియా ఫ్యాన్స్కు గుడ్ న్యూస్ - ఆ స్టార్ ప్లేయర్ రీఎంట్రీ!
ఆస్ట్రేలియాలోనూ 'కింగ్' మేనియా - న్యూస్ పేపర్ ఫ్రంట్ పేజీపై విరాట్ స్పెషల్ కవరేజ్!
