Gautam Gambhir Meeting: టీమ్ఇండియా కొత్త హెడ్కోచ్ గౌతమ్ గంభీర్ శ్రీలంక పర్యటనకు ముందే సెలక్షన్ కమిటీతో సమావేశం జరపనున్నట్లు తెలుస్తోంది. తాను హెడ్కోచ్ పదవిలో సెలక్షన్ కమిటీతో భేటీ అవ్వడం ఇదే తొలిసారి కానుంది. అయితే ఈ మీటింగ్లో శ్రీలంక పర్యటన, జట్టు టీ20 ఫార్మాట్ కెప్టెన్సీపై చర్చించుకోనున్నట్లు సమాచారం.
అయితే టీమ్ఇండియా త్వరలోనే శ్రీలంక పర్యటనకు వెళ్లనుంది. ఈ టార్లో 3 టీ20, 3 వన్డే మ్యాచ్లు ఆడాల్సి ఉంది. జులై 27 నుంచి ప్రారంభం కానున్న ఈ పర్యటనకు సీనియర్లు రోహిత్ శర్మ, విరాట్ కోహ్లీకి విశ్రాంతి ఇవ్వాలని బీసీసీఐ భావిస్తోంది. ఈ నేపథ్యంలో వీళ్ల గైర్హాజరీలో ఎవరు జట్టను సమర్థంగా నడిపించగలరు? జట్టు ఎంపిక ఎలా ఉండాలన్న అంశాలు సెలక్టర్ల మీటింగ్లో చర్చించే ఛాన్స్ ఉంది.
హార్దిక్ లేదా రాహుల్
ఈ పర్యటనకు కేఎల్ రాహుల్, హార్దిక్ పాండ్య ఎంపిక దాదాపు ఖాయం. అయితే ఈ ఇద్దరిలో ఎవరో ఒకరు జట్టును నడిపించే అవకాశం ఉంది. దీంతో ఎవరికి కెప్టెన్సీ దక్కుతుందోనని ఆసక్తి నెలకొంది. కాగా, వీరిద్దరికి ఇదివరకు టీమ్ఇండియాకు కెప్టెన్గా వ్యవహరించిన అనుభవం ఉంది. ఈ నేపథ్యంలో టీ20 సిరీస్కు హార్దిక్, వన్డే సిరీస్కు కేఎల్ రాహుల్ జట్టను నడిపించే ఛాన్స్ ఉంది.
శ్రీలంక పర్యటన
| తొలి టీ20 | జులై 27 |
| రెండో టీ20 | జులై 28 |
| మూడో టీ20 | జులై 30 |
| తొలి వన్డే | ఆగస్టు 02 |
| రెండో వన్డే | ఆగస్టు 04 |
| మూడో వన్డే | ఆగస్టు 07 |
- ఇక ఈ మ్యాచ్లకు వేదికలు ఇంకా ఖరారు కావాల్సి ఉంది. టీ20 మ్యాచ్లు రాత్రి 7 గంటలకు, వన్డే మ్యాచ్లు 2.30 గంటలకు ప్రారంభం కానున్నాయి. అటు ఇరుజట్లు కూడా ఇంకా జట్లను ప్రకటించలేదు.
శాలరీ ఎంతంటే?
కాగా, గంభీర్ భారీ మొత్తంలో శాలరీ అందుకోనున్నాడని పలు కథనాలు వస్తున్నాయి. ఏడాదికి రూ.12- 15కోట్లు శాలరీ తీసుకోనున్నట్లు తెలుస్తోంది. ఇక విదేశీ పర్యటనలకు రోజుకు రూ. 21వేలు డైలీ అలవెన్స్ రూపంలో బోర్డు చెల్లించనుందని టాక్. మరి ఇందులో నిజమెంతో తెలీదు కానీ, సోషల్ మీడియాలో ఇది చక్కర్లు కొడుతోంది.
లంకతో సిరీస్ - టీమ్ఇండియా టీ20 జట్టు కెప్టెన్ ఎవరంటే? - IND VS Srilanka T20 Series
