Simone Arianne Biles Owens Paris Olympics 2024 : ఆమెకు అది తొలి ఒలింపిక్ ఈవెంట్. సాధారణంగా ఎవరైనా సరే ఆ సమయంలో కాస్త ఒత్తిడిలోనే ఉంటారు. కానీ అమెరికాకు చెందిన సిమోన్ అరియన్ బైల్స్ ఓవెన్స్ మాత్రం 19 ఏళ్ల వయసులోనే ఈ విశ్వక్రీడల్లో తన సత్తా చాటిండి. జిమ్నాస్టిక్స్‌లో ఏకంగా 4 స్వర్ణాలు, ఓ కాంస్యం సాధించి తన విన్యాసాలతో అందరినీ అబ్బురపరిచింది. ఈ రికార్డుతో అప్పట్లో ఆమె పేరు ప్రపంచమంతా తెగ మార్మోగిపోయింది. అయితే టోక్యో ఒలింపిక్స్ సమయంలో మానసిక రుగ్మతతో ఇబ్బంది పడ్డ ఆమె ఆ ఈవెంట్లో ఒక్క రజతం, కాంస్యంతోనే సరిపెట్టుకుంది. ఇక ఆ తర్వాత అనారోగ్యంతో పాటు ఇతర కారణాల వల్ల కొద్దికాలం పాటు ఆటకు దూరమైంది.
2023లో జోనాథన్ ఒవెన్స్ అనే క్రీడాకారుడితో ఆమె వివాహబంధంలోకి అడుగుపెట్టింది. కానీ ఆటపై ఉన్న ప్రేమ ఆమెను ఈ క్రీడకు ఎక్కువకాలం పాటు దూరం చేయలేకపోయింది. దీంతో మానసికంగా, శారీరకంగా పుర్తి పరిణతి సాధించి ఈ పారిస్ ఒలింపిక్స్కు సాలిడ్ కమ్బ్యాక్ ఇవ్వనుంది. ఇటీవలే జరిగిన ప్రపంచ ఛాంపియన్‌షిప్‌లో పసిడి పతకాన్ని ముద్దాడింది.
ఇక ఆదివారం జరగనున్న జిమ్నాస్టిక్ టీమ్, ఆల్‌రౌండ్‌ క్వాలిఫికేషన్లో బైల్స్ తన పెర్ఫామెన్స్తో ప్రధాన ఆకర్షణగా నిలవనుంది. క్వాలిఫైయింగ్ రౌండ్లో బ్యాలెన్స్‌ బీమ్, ఫ్లోర్‌ ఎక్సర్‌సైజ్, వాల్ట్, అన్‌ఈవెన్‌ బార్స్‌లో ఈమె తలపడనుంది. అమెరికా జట్టుకు ప్రాతినిథ్యం వహిస్తున్న ఆమె తన పెర్ఫామెన్స్తో ఇక్కడ కూడా కీలకం కానుంది. ఈమెతో పాటు ఈ పోటీలో 16 ఏళ్ల హెజ్లీ రివెరాపై కూడా భారీ అంచనాలే ఉన్నాయి.
ఇదిలా ఉండగా ఈ క్రీడలో టీనేజర్లదే ఆధిపత్యం కొనసాగుతున్న నేపథ్యంలో 27 ఏళ్ల వయసులోనూ వాళ్లకు దీటుగా బైల్స్ సత్తాచాటేందుకు సిద్ధమైంది. అయితే జిమ్నాస్టిక్స్‌లో ఇప్పటికే వివిధ విభాగాల్లోని కొన్ని విన్యాసాలకు బైల్స్ పేరు పెట్టారు. ఇప్పుడు ఈ అన్‌ఈవెన్‌ బార్స్‌లోనూ ఓ విన్యాసానికి ఆమె పేరు పెట్టే అవకాశాలనున్నాయని తెలుస్తోంది.
తండ్రి చివరి కోరిక నేరవేర్చనున్న జార్జియా షూటర్ - ఎవరీ నినో ? - Paris Olympics 2024
