Jake Fraser IPL 2024: 2024 ఐపీఎల్లో దిల్లీ క్యాపిటల్స్ యంగ్ ప్లేయర్ జేక్ ఫ్రేజర్-మెక్‌గుర్క్ రఫ్పాడిస్తున్నాడు. ఇప్పటికే దిల్లీ తరఫున ఫాస్టెస్ట్ హాఫ్ సెంచరీ ఖాతాలో వేసుకోగా, తాజాగా ముంబయితో మ్యాచ్లోనూ రెచ్చిపోయాడు. ఈ మ్యాచ్లో 15 బంతుల్లోనే హాఫ్ సెంచరీ మార్క్ అందుకున్నాడు.
ఈ క్రమంలో ఐపీఎల్ చరిత్రలో 15 లేదా అంతకంటే తక్కువ బంతుల్లో ఒకటి కన్నా ఎక్కువ అర్ధశతకాలు (2) నమోదు చేసిన తొలి క్రికెటర్‌గా రికార్డు సృష్టించాడు. ఫ్రేజర్ మెరుపు బ్యాటింగ్తో దిల్లీ కూడా తన పవర్ప్లే రికార్డు మెరుగుపర్చుకుంది. ఈ మ్యాచ్లో దిల్లీ తొలి 6 ఓవర్లలో 92-0 తో నిలిచి, గత రికార్డు (88-2)ను అధిగమించింది. అయితే ఫ్రేజర్ ఇన్నింగ్స్తో ఇన్ని ఘనతలు అందుకున్నా, ఒక్క రికార్డు మాత్రం బ్రేక్ చేయలేదు. అదేంటంటే?
ఐపీఎల్లో చెన్నై సూపర్ కింగ్స్ మాజీ ప్లేయర్ సురేశ్ రైనా సెట్ చేసిన ఓ అరుదైన రికార్డును మాత్రం ఫ్రేజర్ బద్దలుకొట్టలేకపోయాడు. దాదాపు 10ఏళ్లుగా ఆ రికార్డు పదిలంగా రైనా పేరిటే ఉంది. 2014 సీజన్లో అతడు పంజాబ్ కింగ్స్ (అప్పటి కింగ్స్ ఎలెవెన్ పంజాబ్)పై బీభత్సం సృష్టించాడు. ఆ మ్యాచ్లో భారీ లక్ష్య ఛేదనలో రైనా పంజాబ్ బౌలర్లను ఊచకోత కోశాడు. కేవలం 25 బంతుల్లోనే 87 పరుగులు సాధించాడు. రైనా దెబ్బకు చెన్నై స్కోర్ 6 ఓవర్లకే 100 దాటింది. అప్పట్లో అదే అత్యధిక పవర్ప్లే స్కోర్ కూడా.
అయితే ముంబయితో మ్యాచ్లో ఫ్రేజర్ దూకుడు చూస్తే రైనా రికార్డు ఈసారి బద్దలవుతుందని అనుకున్నారంతా. కానీ, ఫ్రేజర్ 84 (27 బంతుల్లో) వ్యక్తిగత పరుగుల వద్దే ఇన్నింగ్స్ ముగించాడు. దీంతో మరోసారి మరో బ్యాటర్ రైనా రికార్డు దగ్గర వరకు వచ్చినా బ్రేక్ చేయలేకపోయాడు. ఈ నేపథ్యంలో 'రైనా రికార్డు ఎప్పటికీ చెదరనిది' అంటూ నెటిజన్లు సోషల్ మీడియాలో మీమ్స్ చేస్తున్నారు.
అందులోనూ రైనాను దాటలేదు
ఇక 80+ స్కోర్ చేసి అత్యధిక స్ట్రైక్ రేట్ సాధించిన రికార్డు కూడా రైనా పేరిటే ఉంది. ఆ మ్యాచ్లో రైనా 348.00 స్ట్రైక్రేట్తో పరుగులు సాధించాడు. తాజాగా జేక్ ఫ్రేజర్ 311.11 స్టైక్రేట్ నమోదు చేశాడు. ఈ క్రమంలో స్ట్రైక్ రేట్ విషయంలోనూ ఫ్రేజర్, రైనా రికార్డు బ్రేక్ చేయలేకపోయాడు.
మరోవైపు ఫ్రేజర్ బాదిన 84 పరుగుల్లో 80 రన్స్ బౌండరీల ద్వారానే రావడం విశేషం. అంటే 95.23 శాతం పరుగులు బౌండరీల ద్వారా సాధించాడు. అయినప్పటికీ ఈ జాబితాలోనూ రైనానే ముందున్నాడు. అతడి ఇన్నింగ్స్ (87, 25 బంతుల్లో)తో 84 పరుగులు బౌండరీలతో వచ్చినవే. అది 96.55 శాతం. ఈ లెక్కన ఫ్రేజర్ 1.32 శాతం తక్కువతో ఉన్నాడు.
జేక్ ఫ్రేజర్ ఊచకోత - 310కిపైగా స్ట్రైక్రేట్తో ముంబయిపై విరుచుకుపడుతూ! - IPL 2024 DV VS MI
పోరాడి ఓడిన ముంబయి - దిల్లీ ఖాతాలో ఐదో విజయం - IPL 2024 DC VS MI
