Ms Dhoni IPL Retention : 2025 ఐపీఎల్ మెగా వేలానికి సంబంధించి నిబంధనలను ఐపీఎల్ గవర్నింగ్ కౌన్సిల్ శనివారం విడుదల చేసింది. ఐపీఎల్ ఫ్రాంచైజీలు టీమ్లోని ఆరుగురు ఆటగాళ్లను అట్టిపెట్టుకోవడానికి అనుమతినిచ్చింది. ఇందులో ఒక రైట్ టు మ్యాచ్ (RTM) కలిసి ఉంటుందని పేర్కొంది. ఇక కొత్త నిబంధనల ప్రకారం క్యాప్డ్ ప్లేయర్లు, అన్క్యాప్డ్ ప్లేయర్లుగా ఆడటానికి అవకాశం కల్పించింది. ఇలా అన్క్యాప్డ్ ప్లేయర్లుగా వేలంలోకి వస్తే వాళ్ల కనీస ధర రూ. కోటి కంటే తక్కువగా ఉంటుంది. ఈ క్రమంలో దిగ్గజ ఆటగాడు ఎమ్ఎస్ ధోనీని చెన్నై సూపర్ కింగ్స్ ఫ్రాంచైజీ అన్క్యాప్డ్ ప్లేయర్గా RTM ద్వారా రిటైన్ చేసుకునే అవకాశం ఉంది.
అన్ క్యాప్డ్ ప్లేయర్ రూల్ ఏంటి?
గత ఐదేళ్లుగా ఐపీఎల్ ఆడుతూ, ఆ సమయంలో టీమ్ఇండియాకు ఆడని బీసీసీఐ కాంట్రాక్ట్ లేని ఆటగాళ్లను అన్ క్యాప్డ్ ప్లేయర్స్గా పరిగణిస్తారు. ఈ రూల్ టీమ్ఇండియా ఆటగాళ్లకు మాత్రమే వర్తిస్తుంది. అన్ క్యాప్డ్ ప్లేయర్ నియమం ఐపీఎల్లో మొదటి నుంచి ఉంది. కానీ ఏ ప్రాంచైజీ దీనిని ఉపయోగించలేదు. దాంతో 2021లో రద్దు చేశారు. ఇప్పుడు మళ్లీ ఆ నియమాన్ని ప్రారంభించాలని నిర్ణయించారు.
అన్క్యాప్డ్ ప్లేయర్స్గా బరిలోకి!
- ఎంఎస్ ధోనీ : ఐపీఎల్ ప్రారంభం నుంచి ఎంఎస్ ధోనీ చెన్నై సూపర్ కింగ్స్ (సీఎస్కే)కి ప్రాతినిధ్యం వహిస్తున్నాడు. సీఎస్కేను ధోనీ ఐదుసార్లు ఐపీఎల్ ఛాంపియన్గా నిలిపాడు. అయితే ధోని చివరిసారిగా 2019లో న్యూజిలాండ్‌తో జరిగిన ప్రపంచకప్ సెమీ ఫైనల్‌లో టీమ్ఇండియా తరఫున ఆఖరి మ్యాచ్ ఆడాడు. ఆ తర్వాత అంతర్జాతీయ క్రికెట్కు గుడ్ బై చెప్పాడు. అంటే ధోనీని భారత్ తరఫున ప్రాతినిధ్యం వహించి ఐదేళ్లు దాటిపోయింది. ఈ క్రమంలో ఐపీఎల్ కొత్త నిబంధనల ప్రకారం, ఎంఎస్ ధోనీని సీఎస్కే అన్ క్యాప్డ్ ప్లేయర్గా రిటైన్ చేసుకోవచ్చు.
- మోహిత్ శర్మ : టీమ్ఇండియా పేసర్ మోహిత్ శర్మ ఐపీఎల్ సీజన్ 2023లో గుజరాత్ టైటాన్స్ తరఫున ఆడాడు. ఆ సీజన్లో డెత్ ఓవర్లలో అద్భుతంగా బౌలింగ్ చేసి ప్రత్యర్థి టీమ్ బ్యాటర్లను ఇబ్బంది పెట్టాడు. ముఖ్యంగా మోహిత్ వేసిన స్లో బంతులకు బ్యాటర్ల పెద్ద షాట్లను ఆడేందుకు ఇబ్బందిపడ్డారు. హరియాణాకు చెందిన ఈ పేసర్ చివరిసారిగా 2015లో భారత్ తరఫున ఆడాడు. ఆ తర్వాత టీమ్ఇండియా జెర్సీ ధరించలేదు.
- సందీప్ శర్మ : ఈ రైట్ ఆర్మ్ పేసర్ ఐపీఎల్లో గత కొన్నేళ్లుగా కీలకంగా రాణిస్తున్నాడు. కొత్త బంతిని స్వింగ్‌ చేసి ప్రత్యర్థులను బెంబేలెత్తిస్తున్నాడు. గత సీజన్ లో రాజస్థాన్ రాయల్స్ తరఫున ఆడిన సందీప్ శర్మ అదరగొట్టాడు. ఈ ప్లేయర్ కూడా టీమ్ఇండియాకు ప్రాతినిధ్యం వహించి ఐదేళ్లు దాటింది. దీంతో రాజస్థాన్ సందీప్ను అన్ క్యాప్డ్ ప్లేయర్గా తీసుకునే అవకాశం ఉంది.
- పీయూశ్ చావ్లా : టీమ్ఇండియా లెగ్ స్పిన్నర్ పీయూశ్ చావ్లా గత రెండు ఐపీఎల్ సీజన్లలో ముంబయి ఇండియన్స్కు ప్రాతినిధ్యం వహించాడు. అయితే టీమ్ఇండియా తరఫున పీయూశ్ 2012లో తన చివరి మ్యాచ్ ఆడాడు. ఇతడు కూడా అన్ క్యాప్డ్ ప్లేయర్ బరిలో దిగే అవకాశం ఉంది.
- విజయ్ శంకర్ : ఆల్ రౌండర్ విజయ్ శంకర్ గుజరాత్ టైటాన్స్కు ప్రాతినిధ్యం వహిస్తున్నాడు. 2019లో టీమ్ఇండియా తరఫున విజయ్ శంకర్ చివరిసారిగా మ్యాచ్ ఆడాడు. ఆ తర్వాత అతడికి టీమ్ఇండియాలో చోటు దక్కలేదు. దాదాపుగా విజయ్ శంకర్ ఇంటర్నేషనల్ మ్యాచ్ ఆడి 5ఏళ్లు దాటింది. దీంతో అతడిని గుజరాత్ అన్ క్యాప్డ్ ప్లేయర్ కేటగిరీ కింద ఉంచుకోవాలని భావిస్తోంది.
