'బుమ్రా లేకపోతే వార్ వన్​సైడే'- ఆసీస్ లెజెండ్ కామెంట్స్

బుమ్రాపై ఆసీస్ మాజీ క్రికెటర్ కామెంట్స్- అతడే కీలకం అని వ్యాఖ్య

Bumrah Border Gavaskar Trophy : టీమ్ఇండియా పేసర్ జస్ప్రీత్ బుమ్రాపై ఆసీస్ మాజీ ఆటగాడు మెక్ గ్రాత్ ప్రశంసల వర్షం కురిపించాడు. బుమ్రాకు తానొక పెద్ద అభిమానినని తెలిపాడు. బోర్డర్- గావస్కర్ ట్రోఫీలో బుమ్రా అద్భుతమైన బౌలింగ్ ప్రదర్శన చేయకపోతే, సిరీస్ ఆసీస్​కు అనుకూలంగా ఉండేదని అభిప్రాయపడ్డాడు. జనవరి 3నుంచి సిడ్నీలో ఐదో టెస్టు జరగనున్న నేపథ్యంలో మెక్ గ్రాత్ మీడియాతో ముచ్చటించారు. ఈ క్రమంలో కీలక వ్యాఖ్యలు చేశారు.

'భారత జట్టులో జస్ప్రీత్ బుమ్రా కీలక ప్లేయర్. బుమ్రా లేకపోతే బోర్డర్-గావస్కర్ ట్రోఫీ ఏకపక్షంగా సాగేది. బుమ్రా ఒక అద్భుతమైన బౌలర్. బుమ్రా బౌలింగ్​లో కొంచెం హైపర్‌ ఎక్స్‌ టెన్షన్ ఉంటుంది. అది నా బౌలింగ్​లో కూడా ఉండేది. బుమ్రా తన బౌలింగ్​లో నియంత్రణను కలిగి ఉన్నాడు. నేను బుమ్రాకు పెద్ద ఫ్యాన్' అని మెక్ గ్రాత్ మీడియా సమావేశంలో బుమ్రాపై ప్రశంసలు కురిపించాడు.

ఆధిక్యంలో ఆసీస్
రీసెంట్​గా మెల్‌ బోర్న్ క్రికెట్ గ్రౌండ్ వేదికగా జరిగిన బాక్సింగ్ డే టెస్టులో భారత్​పై ఆసీస్ విజయం సాధించడంతో సిరీస్ లో పైచేయి సాధించింది. బోర్డర్-గవాస్కర్ ట్రోఫీలో 2-1 ఆధిక్యంలో ఉంది. సిడ్నీ వేదికగా జరిగే ఐదో టెస్టులో ఎలాగైనా గెలిచి సిరీస్ సమం చేయాలని భారత్ ఉవ్విళ్లూరుతోంది.

వెన్నుముకగా బుమ్రా
బోర్డర్‌- గావస్కర్‌ ట్రోఫీలో టీమ్ఇండియాకు వెన్నుముకగా పేసర్ బుమ్రా నిలుస్తున్నాడు. ఇప్పటివరకు జరిగిన 4 టెస్టుల్లో 30 వికెట్లు తీసి ఈ సిరీస్​లో అత్యధిక వికెట్ల తీసిన బౌలర్​గా కొనసాగుతున్నాడు. కీలక సమయాల్లో వికెట్లు తీసి రాణిస్తున్నాడు. అలాగే బోర్డర్- గావస్కర్ ట్రోఫీలో బుమ్రా కెప్టెన్సీలోనే ఏకైక టెస్టు టీమ్ఇండియా గెలుపొందడం విశేషం.

MIDDLE STUMP! Jasprit Bumrah gets Sam Konstas with a pearler. #AUSvIND | #DeliveredWithSpeed | @NBN_Australia pic.twitter.com/A1BzrcHJB8

— cricket.com.au (@cricketcomau) December 29, 2024

మరో రికార్డు
కాగా, బుధవారం ఐసీసీ విడుదల చేసిన టెస్టు ర్యాంకింగ్స్​లో అత్యుత్తమ రేటింగ్స్ సాధించిన భారత బౌలర్​గా బుమ్రా రికార్డ్ సృష్టించాడు. తాజా ర్యాంకింగ్స్​లో బుమ్రా 907 రేటింగ్స్ తో ఫస్ట్ ప్లేస్ లో నిలిచాడు. టెస్టు ర్యాంకింగ్స్​లో టీమ్ఇండియా బౌలర్ సాధించిన అత్యధిక రేటింగ్స్ ఇవే. ఈ క్రమంలో మాజీ స్పిన్నర్ అశ్విన్​ను వెనక్కినెట్టేశాడు. గతంలో అశ్విన్ 904 రేటింగ్స్ సాధించాడు.