VISAKHAPATNAM BELLAM VINAYAKUDU : ఆంధ్రప్రదేశ్లోని విశాఖపట్నం సముద్రతీరాన ఉన్న జాలరి పేటలో ఈ బెల్లం గణపతి ఆలయం ఉంది. ఈ దేవాలయాన్ని 11వ శతాబ్దంలో చోళరాజులు కట్టినట్లుగా ఆలయ చరిత్ర ద్వారా మనకు తెలుస్తోంది. ఈ వినాయకుడి విగ్రహాన్ని స్వయంగా చంద్రుడు ప్రతిష్ఠించారని చెబుతారు.
చంద్రుడు ప్రతిష్ఠించిన గణపతి
బెల్లం గణపతి దేవాలయానికి ఎదురుగా సముద్రం ఉంటుంది. ఈ సముద్ర గర్భంలో వైశాఖేశ్వరుడు పేరుతో దేవతలు శివుని ప్రతిష్ఠించి పూజించారంట. అయితే కాలక్రమేణా సముద్రం ముందుకు వచ్చి శివాలయం సముద్రంలో కలిసిపోయింది. దీనికి కలత చెందిన చంద్రుడు శివుని కోసం ఘోర తపస్సు చేయగా శివుడు ప్రత్యక్షమయ్యాడట! అప్పుడు చంద్రుడు, శివుని ఆలయం సముద్రంలో కలిసిపోయింది కాబట్టి అక్కడ తిరిగి వెలసి భక్తులను అనుగ్రహించాలని కోరాడు. అంతట శివుడు ప్రస్తుతం వినాయకుడు దేవాలయం ఉన్న ప్రదేశం వద్ద స్వయంభువుగా వెలిశాడు. అప్పుడు శివుడికి గుడి కట్టిన చంద్రుడే వినాయకుని కూడా ప్రతిష్ఠించాడంట!
విభిన్న రూపంతో అలరించే బెల్లం వినాయకుడు
మామూలుగా దేవాలయంలో మనం చూసే గణపయ్య విగ్రహం తొండం ఎడమ వైపు తిరిగి ఉంటే, బెల్లం వినాయకుని తొండం మాత్రం కుడి వైపుకు తిరిగి ఉంటుంది. ఈ బెల్లం వినాయక స్వామిని దర్శించుకుంటే ఆనందాలు కలుగుతాయని భక్తుల విశ్వాసం. గణపతి ఉపాసకులు కూడా ఈ విషయాన్ని నమ్ముతారు. అందుకే ఈ బెల్లం గణపతిని అంతా ఆనంద గణపతి అని కూడా పిలుస్తారు.
బెల్లం గణపతి అని ఎందుకు అంటారు
వినాయకుడికి ఎన్నో పేర్లు ఉన్నాయి. కానీ బెల్లం గణపతి అనే పేరు కొంత విచిత్రంగా ఉన్నా ఇది నిజం. ఇక్కడ వినాయకుడు బెల్లం గణపతిగా పూజలందుకుంటాడు. ఇక్కడి వినాయకుని అసలు పేరు ఆనంద గణపతి. కానీ ఇక్కడ భక్తులు తమ మొక్కులు తీర్చుకోడానికి స్వామికి బెల్లం దిమ్మెలను నైవేద్యంగా సమర్పిస్తారు. అందుకే స్వామికి బెల్లం వినాయకుడు అని పేరు వచ్చింది.
భక్తుల పాలిట కొంగు బంగారం బెల్లం గణపతి
ఈ ఆలయాన్ని సందర్శించిన భక్తులు తమ మనసులోని కోరికను స్వామికి చెప్పి తమ శక్తి మేరకు ఇన్ని కిలోల బెల్లాన్ని స్వామికి నివేదిస్తామని మొక్కుకుంటారు. కోరిక తీరిన తర్వాత మొక్కు మేరకు స్వామికి 1, 3 లేదా 5 కిలోల బెల్లాన్ని సమర్పిస్తారు. ఇది ఈ ఆలయంలో అనాదిగా వస్తున్న ఆచారం. ఇక్కడ భక్తులకు ప్రసాదంగా కూడా బెల్లం పంచిపెడతారు. ఇంతటి గొప్ప విశేషాలున్న ఈ బెల్లం వినాయకుని మనమందరం కూడా దర్శించుకుందాం. మన మనోభీష్టాలను నెరవేర్చుకుందాం. శుభం భూయాత్
ముఖ్యగమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. అంతే కానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.
