BRS MLA Vivekananda Goud Press Meet : హైదరాబాద్ ప్రతిష్ఠ రోజురోజుకూ పడిపోతోందని బీఆర్ఎస్ ఎమ్మెల్యే కేవీ వివేకానంద గౌడ్ ఆందోళన వ్యక్తం చేశారు. ఇతర ప్రాంతాల నుంచి హైదరాబాద్ వచ్చి వ్యాపారం చేస్తారని, స్థిరాస్తి రంగం పడిపోయి వ్యాపారులు ఇబ్బంది పడుతున్నారని ఆరోపించారు. పాలన బాగుందని కాంగ్రెస్ నేతలు గొప్పలు చెప్పుకుంటున్నారని, క్షేత్రస్థాయికి వెళ్లి పరిస్థితులను తెలుసుకోవాలని సూచించారు.
హైదరాబాద్లోని తెలంగాణ భవన్లో ఈ మేరకు మాట్లాడిన ఆయన, కాంగ్రెస్ ప్రభుత్వంపై విమర్శలు చేశారు. హైదరాబాద్ నగర శివారు ప్రాంతాలను జీహెచ్ఎంసీలో విలీనం చేసి హైడ్రా అనే సంస్థను ఏర్పాటు చేస్తామని సీఎం రేవంత్ రెడ్డి అంటున్నారని బీఆర్ఎస్ ఎమ్మెల్యే వివేకానంద గౌడ్ ఆరోపించారు. ఈ హైడ్రా ఏర్పాటును బీఆర్ఎస్ వ్యతిరేకిస్తోందని స్పష్టంగా చెప్పారు.
ప్రభుత్వం కొత్తగా తీసుకొస్తోన్న హైడ్రాను బీఆర్ఎస్ పార్టీ వ్యతిరేకిస్తుందని అన్నారు. 20 మున్సిపాలిటీలు, 7 కార్పొరేషన్ల గడువు ముగుస్తోందని ఈ సందర్భంగా చెప్పారు. 7 కార్పొరేషన్లు, 33 గ్రామ పంచాయతీలకు ఎన్నికలు పెట్టాలన్నారు. మార్పు పేరుతో కాంగ్రెస్ నేతలు పాలనను గాలికొదిలేశారని తీవ్రస్థాయిలో ధ్వజమెత్తారు. స్థానిక సంస్థల స్ఫూర్తికి విరుద్ధంగా రేవంత్ రెడ్డి వ్యవహరిస్తున్నారని మండిపడ్డారు.
శివారు ప్రాంతాల విలీనానికి బీఆర్ఎస్ వ్యతిరేకం : అధికార వికేంద్రీకరణ చేయాల్సింది పోయి అధికార కేంద్రీకరణ వైపు అడుగులు వేస్తున్నారని దుయ్యబట్టారు. హైదరాబాద్ నగర శివారు ప్రాంతాల్లో పెద్ద ఎత్తున భూకబ్జాలు, అవినీతి చేసేందుకు ప్రభుత్వం కుట్ర చేస్తోందని ఎమ్మెల్యే వివేకానంద గౌడ్ ఆరోపణలు చేశారు. మూడు కార్పొరేషన్లు చేసి అధికారం చెలాయించాలని రేవంత్ రెడ్డి భావిస్తున్నారన్నారు. శివారు ప్రాంతాలను విలీనం చేయడం ద్వారా ప్రజలకు నష్టం జరుగుతుందని చెప్పారు. అలాగే శివారు ప్రాంతాల విలీనాన్ని బీఆర్ఎస్ తీవ్రంగా వ్యతిరేకిస్తోందని స్పష్టం చేశారు.
శివారు ప్రాంతాలను విలీనం చేసేటప్పుడు స్థానిక ప్రజాప్రతినిధులు ప్రజల అభిప్రాయాలను తీసుకోవాలని వివేకానంద గౌడ్ చెప్పారు. బీఆర్ఎస్ హయాంలో మంచిగా పనిచేయడం వల్లే గ్రేటర్ పరిధిలో బీఆర్ఎస్ ఎక్కువ సీట్లు గెలుచుకుందని అన్నారు. గ్రేటర్ పరిధిలో పారిశుద్ధ్యం లోపించి, విష జ్వరాలు విజృంభిస్తున్నాయన్నారు. గ్రేటర్ పరిధిలో కాంగ్రెస్ పార్టీకి పట్టు లేదు అందుకే ఎన్నికలను కాలయాపన చేసేందుకు కుట్ర చేస్తున్నారని మండిపడ్డారు.
నేను బీఆర్ఎస్లోనే ఉంటాను : బీఆర్ఎస్ చేసిన అభివృద్ధిని కొనసాగించడంలో రేవంత్ రెడ్డి విఫలమయ్యారని ఎమ్మెల్యే వివేకానంద ధ్వజమెత్తారు. తానే కడియం శ్రీహరిపై అనర్హత వేటు వేయాలని పిటిషన్ వేశానని ఎమ్మెల్యేలపై కచ్చితంగా అనర్హత వేటు పడుతుందని ఆశాభావం వ్యక్తం చేశారు. బీఆర్ఎస్ ఎమ్మెల్యేలను చేర్చుకుని సీఎం రేవంత్ రెడ్డి రాజకీయంగా ఆత్మహత్య చేసుకుంటున్నారన్నారు. తాను కేసీఆర్ నాయకత్వంలోనే పని చేస్తానని చెప్పి, విమర్శకులకు బదులిచ్చారు.
