Udupi Style Pepper Rasam Recipe : వాతావరణం చల్లగా ఉన్నప్పుడు వేడివేడి అన్నంలో కారంకారంగా, ఘాటుఘాటుగా ఏదైనా రసం వేసుకుని తింటే ఆ ఫీలింగ్ సూపర్గా ఉంటుంది. ముఖ్యంగా చలికాలం చాలా మందిని జలుబు, దగ్గు, గొంతునొప్పి, జ్వరం వంటి సమస్యలు ఎక్కువగా ఇబ్బందిపెడుతుంటాయి. దాంతో ఏమి తిన్నా నోటికి అంతగా రుచించదు.
అలాంటి టైమ్లో ఓసారి ఇలా ఉడుపి స్టైల్ మిరియాల రసం చేసుకొని చూడండి. చాలా రుచికరంగా ఉండి తిన్నాకొద్దీ తినాలనిపిస్తుంది! అంతేకాదు ఆయా సమస్యల నుంచి మంచి ఉపశమనం లభిస్తుంది! పైగా దీని తయారీకి టమాటాలు, ఉల్లి, వెల్లుల్లి, పచ్చిమిర్చి ఏవి అవసరం లేదు. మరి, ఈ సూపర్ టేస్టీ అండ్ హెల్దీ రసం తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- మిరియాలు - 1 టేబుల్స్పూన్
- నెయ్యి - అర టేబుల్స్పూన్
- నల్ల పొట్టు మినప్పప్పు - ఒకటిన్నర టేబుల్స్పూన్లు
- ధనియాలు - 1 టేబుల్స్పూన్
- జీలకర్ర - అరటీస్పూన్
- ఎండుకొబ్బరి ముక్కలు/తురుము - 2 టేబుల్స్పూన్లు
- చింతపండు - ఉసిరికాయ సైజంత
- పసుపు - అరటీస్పూన్
- రాళ్ల ఉప్పు - రుచికి సరిపడా
- బెల్లం తురుము - 1 టేబుల్స్పూన్
తాలింపు కోసం :
- నెయ్యి - అర టేబుల్స్పూన్
- ఆవాలు - అరటీస్పూన్
- కరివేపాకు - 2 రెమ్మలు
- ఇంగువ - చిటికెడు
నోటికి కమ్మగా ఉండే "జీలకర్ర రసం" - ఇలా చేసుకుని తిన్నారంటే అజీర్తి, గ్యాస్ సమస్యలు ఔట్!
తయారీ విధానం :
- ఇందుకోసం ముందుగా ఒక చిన్న బౌల్లో చింతపండును శుభ్రంగా కడిగి నానబెట్టుకోవాలి.
- ఇప్పుడు స్టౌపై కడాయి పెట్టుకొని నెయ్యి వేసుకోవాలి. అది కరిగి కాస్త వేడయ్యాక మిరియాలు వేసి వేయించుకోవాలి.
- మిరియాలు చిట్లుతున్నప్పుడు నల్ల పొట్టు మినప్పప్పు, ధనియాలు వేసుకొని లో ఫ్లేమ్ మీద కాసేపు చక్కగా ఫ్రై చేసుకోవాలి.
- అవి వేగాక జీలకర్ర వేసి చిట్లనివ్వాలి. పప్పులన్నీ వేగి మంచి సువాసన వస్తున్నప్పుడు ఆఖరున ఎండుకొబ్బరి ముక్కలు/తురుము వేసుకొని కాస్త ఎర్రగా మారే వరకు వేయించుకొని స్టౌ ఆఫ్ చేసుకోవాలి.
- ఇప్పుడు మిక్సీ జార్ తీసుకొని అందులో వేయించుకున్న మిరియాల మిశ్రమం, కొద్దిగా వాటర్ వేసుకొని కొంచం బరకగా గ్రైండ్ చేసుకొని పక్కనుంచాలి.
- ఆ తర్వాత నానబెట్టుకున్న చింతపండును తీసుకొని చేతితో గట్టిగా పిండుతూ రసాన్ని తీసి పక్కన పెట్టుకోవాలి.
- ఇప్పుడు స్టౌపై మిరియాలు వేయించుకున్న కడాయి పెట్టుకొని చింతపండు రసం పోసుకోవాలి. ఆపై అందులో పసుపు, లీటర్ వాటర్, ఉప్పు వేసి కలిపి హై ఫ్లేమ్ మీద చారు మధ్యలో పొంగు వచ్చేంత వరకు మరిగించుకోవాలి.
- ఆవిధంగా మరిగించుకున్నాక అందులో బెల్లం తురుము, ముందుగా గ్రైండ్ చేసుకున్న మిరియాల పేస్ట్ వేసి ఒకసారి బాగా కలుపుకోవాలి. ఆపై హై ఫ్లేమ్ మీద మరోసారి 3 నుంచి 4 నిమిషాల పాటు బాగా మరిగించుకోవాలి. అనంతరం స్టౌను లో ఫ్లేమ్కి టర్న్ చేసి అలా వదిలేయాలి.
- అనంతరం ఇంకో బర్నర్ మీద చిన్న కడాయి పెట్టుకొని నెయ్యి వేసుకోవాలి. అది కరిగి కాస్త వేడెక్కాక ఆవాలు వేసుకొని చిట్లనివ్వాలి. ఆపై కరివేపాకు, ఇంగువ వేసి కలిపి చక్కగా వేయించుకోవాలి.
- తాలింపు మంచిగా వేగాక దాన్ని తీసుకొని మరో బర్నర్పై లో ఫ్లేమ్ మీద మరిగించుకుంటున్న చారులో వేసి బాగా కలుపుకోవాలి.
- ఆ తర్వాత ఒక నిమిషం పాటు మరిగించుకొని దింపేసుకుంటే చాలు. అంతే, ఎంతో రుచికరంగా ఉండే నోరూరించే "ఉడుపి స్టైల్ మిరియాల రసం" రెడీ!
చలికాలం ఇలా "వాము చారు" చేసుకోండి - జలుబు, దగ్గు, జీర్ణ సమస్యలు ఔట్!
