How to Make Tomato Kothimeera Pachadi : చాలా మంది ఇష్టపడే పచ్చళ్లలో టమాటా పచ్చడి ఒకటి. అయితే.. ఈ టమాటా పచ్చడిని మీరు ఇప్పటివరకు రకరకాలుగా ప్రయత్నించి ఉండవచ్చు. కానీ.. ఈసారి కాస్త వెరైటీగా ఇలా కొత్తిమీరతో కలిపి ప్రిపేర్ చేసుకోండి. రుచి అద్దిరిపోతుంది! పైగా ఈ పచ్చడిని తయారు చేసుకోవడం కూడా చాలా సులువు. ఈ విధంగా ఒక్కసారి ప్రిపేర్ చేసుకున్నారంటే ఇంట్లో వాళ్లందరూ దీని టేస్ట్కు ఫిదా అవ్వాల్సిందే! మరి.. ఈ టేస్టీ పచ్చడిని ఎలా ప్రిపేర్ చేసుకోవాలో ఇప్పుడు చూద్దాం.
కావాల్సిన పదార్థాలు :
- టమాటాలు - అరకిలో
- కొత్తిమీర - ఒక చిన్నకట్ట
- ఆయిల్ - తగినంత
- మినప పప్పు - 2 స్పూన్లు
- పచ్చిమిర్చి - 12
- పసుపు - చిటికెడు
- ఉప్పు - రుచికి సరిపడా
- జీలకర్ర - అర టీస్పూన్
- వెల్లుల్లి రెబ్బలు - 5
- చింతపండు - కొద్దిగా
తయారీ విధానం :
- ఇందుకోసం ముందుగా టమాటాలను శుభ్రంగా కడిగి కాస్త పెద్ద సైజ్ ముక్కలుగా కట్ చేసుకోవాలి. అలాగే.. కొత్తిమీరను తరుక్కొని పెట్టుకోవాలి. అయితే.. కొత్తిమీరను మరీ చిన్నగా కాకుండా కాస్త పెద్ద సైజ్లోనే తరుక్కోవాలి.
- ఇప్పుడు స్టౌపై పాన్ పెట్టుకొని కొద్దిగా ఆయిల్ వేసుకోవాలి. నూనె వేడెక్కాక.. పొట్టు మినప పప్పు వేసి రంగు మారేంత వరకు వేయించుకోవాలి. ఆపై దాన్ని మిక్సీ జార్లోకి తీసుకొని పక్కన పెట్టుకోవాలి.
- అనంతరం అదే పాన్లో పచ్చిమిర్చిని మధ్యలోకి చిన్న చిన్న ముక్కలుగా తుంచి వేసుకోవాలి. వీటిని కూడా బాగా వేయించుకొని మిక్సీ జార్లోకి తీసుకోవాలి. అయితే, ఇక్కడ గుర్తుంచుకోవాల్సిన విషయమేమిటంటే.. మీరు తినే కారాన్ని బట్టి కావాల్సిన పరిమాణంలో పచ్చిమిర్చిని తీసుకోవాలి.
- ఇప్పుడు అదే నూనెలో కొత్తిమీర తరుగు వేసి మంటను మీడియంలో ఫ్లేమ్లో ఉంచి పచ్చివాసన పోయే వరకు ఫ్రై చేసుకోవాలి. ఒకవేళ నూనె సరిపోకపోతే ఇంకాస్త యాడ్ చేసుకోవాలి.
- కొత్తిమీర బాగా వేగిందనుకున్నాక దాన్ని ఒక ప్లేట్లోకి తీసుకొని పక్కన ఉంచుకోవాలి.
- అనంతరం అదే పాన్లో.. టమాటా ముక్కలు వేయించడానికి సరిపడా ఆయిల్ వేసుకోవాలి. నూనె వేడెక్కాక ముందుగా కట్ చేసి పెట్టుకున్న టమాటాలు ముక్కలు, కొద్దిగా పసుపు వేసి బాగా కలుపుకోవాలి.
- తర్వాత పాన్పై మూత పెట్టి మంటను మీడియం ఫ్లేమ్లో ఉంచి టమాటాలు బాగా మగ్గే వరకు ఉడికించుకోవాలి. ఉడికించుకునేటప్పుడు మధ్యమధ్యలో మూత తీసి గరిటెతో కలుపుతుండాలి.
- ఇక టమాటా ముక్కలు బాగా మగ్గి సాఫ్ట్గా మారాయనుకున్నాక.. స్టౌ ఆఫ్ చేసుకొని వాటిని పూర్తిగా చల్లార్చుకోవాలి.
- ఇప్పుడు.. ముందుగా వేయించుకొని మిక్సీ జార్లోకి తీసుకున్న పచ్చిమిర్చి, మినప పప్పుతో పాటు ఉప్పు, జీలకర్ర, వెల్లుల్లి రెబ్బలు, చాలా తక్కువ పరిమాణంలో చింతపండు వేసుకొని పేస్ట్లా మిక్సీ పట్టుకోవాలి.
- ఆ తర్వాత అందులోనే చల్లార్చుకున్న టమాటా ముక్కలు, వేయించి పక్కన పెట్టుకున్న కొత్తిమీర వేసి కచ్చాపచ్చాగా గ్రైండ్ చేసుకోవాలి.
- అంతే.. ఎంతో రుచికరంగా ఉండే "కొత్తిమీర టమాటా పచ్చడి" రెడీ!
- ఒకవేళ మీరు కావాలనుకుంటే ఈ పచ్చడికి తాలింపు పెట్టుకొని తినొచ్చు. లేదంటే ఇలానే అన్నం, టిఫెన్స్ దేనిలోకి తిన్నా చాలా టేస్టీగా ఉంటుంది.
ఇవీ చదవండి :
వంకాయ, టమాటా, మెంతిపొడి - ఈ పచ్చడి తిన్నారంటే సామిరంగా అదుర్స్!
నోరూరించే "బీరకాయ టమాట పచ్చడి" - ఇలా ప్రిపేర్ చేస్తే రుచికి రుచీ ఆరోగ్యానికి ఆరోగ్యం!
