How to Make Vegetable Masala Rice : పిల్లలకు ప్రతిరోజూ రుచికరమైన, పోషకాలతో కూడిన ఆహారాలు తయారు చేయడానికి అమ్మలు వంటింట్లో కుస్తీ పడుతుంటారు. ఇక, ఉద్యోగం చేసే మహిళలకైతో మరింత సవాల్. పిల్లల స్కూల్కి టైమ్ అవుతుందని ఓ పక్కన.. మరో పక్క ఆఫీస్కి వెళ్లాలనే టెన్షన్ ఉంటుంది.
అందుకే.. తక్కువ సమయంలో, పోషకాలు అందేలా ఓ మంచి లంచ్ బాక్స్ రెసిపీ తీసుకొచ్చాం. అదే టేస్టీ 'వెజిటబుల్ మసాలా రైస్'. ఈ స్టోరీలో చెప్పిన విధంగా చేస్తే కేవలం 10 నిమిషాల్లోనే కమ్మటి మసాలా రైస్ తయారైపోతుంది. ఇది చేయడానికి ఇంట్లో ఉండే పదార్థాలు సరిపోతాయి. మరి ఇక ఆలస్యం చేయకుండా సింపుల్గా వెజిటబుల్ మసాలా రైస్ ఎలా చేయాలో ఇప్పుడు చూద్దాం.
కావాల్సిన పదార్థాలు..
- అన్నం- పెద్ద కప్పు
- క్యారెట్-1
- ఉల్లిపాయ-1
- టమాటా-1
- పచ్చిమిర్చి-2
- పచ్చి బఠానీలు-అరకప్పు
- ఉప్పు రుచికి సరిపడా
- నూనె -2 టేబుల్స్పూన్లు
- ఆవాలు-అరటీస్పూన్
- శనగపప్పు-టీస్పూన్
- మినప్పప్పు-టీస్పూన్
- కరివేపాకు-2
- అల్లం వెల్లుల్లి పేస్ట్-అరటీస్పూన్
- కారం-టీస్పూన్
- గరం మసాలా- అరటీస్పూన్
- పసుపు-చిటికెడు
- కొత్తిమీర తరుగు కొద్దిగా
తయారీ విధానం..
- ముందుగా రెసిపీ కోసం టమాటా, ఉల్లిపాయ, పచ్చిమిర్చి, క్యారెట్ సన్నని ముక్కలుగా కట్ చేసుకోవాలి.
- అలాగే పచ్చి బఠానీలను ఉడికించి ఒక చిన్న బౌల్లోకి తీసుకోవాలి.
- ఇప్పుడు మసాలా రైస్ చేయడం కోసం.. స్టౌ పై కడాయి పెట్టండి. ఇందులో ఆయిల్ పోయండి. నూనె వేడైన తర్వాత ఆవాలు, జీలకర్ర, శనగపప్పు, మినప్పప్పు వేసి ఫ్రై చేసుకోవాలి.
- తాలింపు దోరగా వేగిన తర్వాత ఉల్లిపాయ ముక్కలు వేసి వేయించుకోవాలి.
- ఉల్లిపాయ ముక్కలు మెత్తబడిన తర్వాత క్యారెట్ ముక్కలు, ఉడికించిన బఠానీలు వేసి ఫ్రై చేయండి. ఆపై కరివేపాకు, పచ్చిమిర్చి ముక్కలు వేసి వేయించండి.
- కూరగాయలు కాస్త మగ్గిన తర్వాత అల్లం వెల్లుల్లి పేస్ట్ వేసి.. పచ్చి వాసన పోయే వరకు ఫ్రై చేయండి. ఇప్పుడు టమాటా ముక్కలు, కాస్త ఉప్పు వేసి వేయించండి.
- టమాటా ముక్కలు మెత్తగా అయిన తర్వాత కారం, గరం మసాలా, పసుపు వేసి కలపండి.
- ఇప్పుడు పొడిపొడిగా వండుకున్న అన్నం ఇందులో వేసి బాగా మిక్స్ చేయండి.
- ఒక రెండు నిమిషాల తర్వాత కాస్త కొత్తిమీర తరుగు చల్లి స్టౌ ఆఫ్ చేస్తే సరిపోతుంది.
- ఎంతో రుచికరమైన టేస్టీ అండ్ హెల్దీ వెజిటబుల్ మసాలా రైస్ మీ ముందుంటుంది.
- ఈ రెసిపీ నచ్చితే ఓ సారి తప్పక ట్రై చేయండి.
ఇవి కూడా చదవండి :
కేవలం 10 నిమిషాల్లోనే రుచికరమైన "పల్లీల రైస్" - పిల్లల లంచ్ బాక్స్లోకి పర్ఫెక్ట్ రెసిపీ!
లంచ్ బాక్స్ స్పెషల్ కమ్మటి "ఉసిరికాయ అన్నం" - 10 నిమిషాల్లోనే సిద్ధం చేయండిలా!
