How to Make variety Karam Podi in Telegu: కంచంలో విందు భోజనం ఉన్నా .. కారప్పొడులను చూస్తే అలా ప్రాణం లేచివస్తుంది చాలా మందికి! వేడివేడి అన్నంలో కాస్త కారం పొడి వేసుకుని, మరికాస్త నెయ్యి వేసుకుని తింటుంటే ఆ ఫీలింగ్ వేరే లెవల్. అయితే.. కారప్పొడి ప్రిపేర్ చేయడం ఒక ఆర్ట్. హోటల్స్లో తయారు చేసే కారప్పొడి అద్దిరిపోతుంది. దాన్ని ఇంట్లో తయారు చేయాలని చూస్తే.. చాలా మందికి సాధ్యం కాదు! కారణం ఏమంటే.. అందులో పాటించే కొన్ని టిప్స్. అవేంటో మీరూ తెలుసుకోండి.
1. కొబ్బరి కారం:
- ఎండుకొబ్బరి చిప్పలు - రెండు
- ఎండుమిర్చి - పావుకిలో
- వెల్లుల్లి రెబ్బలు - ఆరు
- శనగపప్పు - 3 టేబుల్‌స్పూన్లు
- మినప్పప్పు - టీ స్పూను
- నూనె - అర టీస్పూను
- జీలకర్ర - 3 టేబుల్‌స్పూన్లు
- ఉప్పు - తగినంత
- కరివేపాకు - పది రెబ్బలు
తయారీ విధానం:
- స్టవ్ ఆన్ చేసి బాణలి పెట్టి అందులో నూనె వేసి ఎండుమిర్చి, శనగపప్పు, మినపప్పు వేసి వేయించి తీయాలి.
- ఆ తరవాత అదే బాండీలో ఎండు కొబ్బరిముక్కలు, వెల్లుల్లి, జీలకర్ర, కరివేపాకు కూడా వేసి వేయించి చల్లారనివ్వాలి.
- ఇప్పుడు ఇవన్నీ కలిపి మిక్సీలో వేసి రుచికి సరిపడా ఉప్పు వేసి మెత్తగా గ్రైండ్ చేసి స్టోర్ చేసుకుంటే చాలు.
2. పల్లీల పొడి:
కావలసినవి
- పల్లీలు - కప్పు
- ఎండుమిర్చి - 12
- వెల్లుల్లి రెబ్బలు- ఆరు
- జీలకర్ర- 2 టీస్పూన్లు
- ఎండు కొబ్బరి పొడి- 2 టేబుల్‌స్పూన్లు
- ఉప్పు- రుచికి సరిపడా
- నూనె- టీస్పూను
తయారుచేసే విధానం:
- ముందుగా స్టవ్ ఆన్ చేసి పాన్ పెట్టి పల్లీలు వేయించి, చల్లారాక పొట్టు తీసి పక్కన ఉంచాలి.
- ఇప్పుడు అదే పాన్‌లో నూనె వేసి ఎండుమిర్చి వేసి ఓ నిమిషం వేగాక జీలకర్ర వేసి ఓ నిమిషం వేయించి దించాలి.
- చల్లారాక మిక్సీలో వేయించిన ఎండు మిర్చి మిశ్రమం, కొబ్బరిపొడి వేసి మెత్తగా చేయాలి.
- తరవాత వెల్లుల్లి, వేయించిన పల్లీలు, రుచికి సరిపడా ఉప్పు కూడా వేసి కచ్చాపచ్చాగా పొడి చేసి తీయాలి.
3. పుదీనా కారం పొడి
కావలసినవి
- పుదీనా - రెండు కట్టలు (పెద్దవి)
- నూనె - టీస్పూను
- మినప్పప్పు - 3 టేబుల్‌స్పూన్లు
- శనగపప్పు - పావుకప్పు
- ఎండుమిర్చి - నాలుగు
- ఇంగువ - చిటికెడు
- చింతపండు - కొద్దిగా
- మిరియాలు - అరటీస్పూను
- జీలకర్ర - టీస్పూను
- ఉప్పు - రుచికి సరిపడా
తయారుచేసే విధానం
- ముందుగా పుదీనా ఆకులను కాడలతో సహా శుభ్రంగా కడిగి చిన్నగా కట్ చేసుకుని రాత్రంతా ఫ్యాన్ గాలికి ఆరనివ్వాలి.
- ఆ మరుసటి రోజు స్టవ్ ఆన్ చేసి పాన్ పెట్టి అందులో పుదీనా వేసి దోరగా వేయించి పక్కకు పెట్టాలి.
- ఆ తర్వాత అదే బాండీలో నూనె వేసి మినప్పప్పు, శనగపప్పు, ఎండుమిర్చి, ఇంగువ, చింతపండు వేసి వేయించాలి. తరవాత జీలకర్ర, మిరియాలు కూడా వేసి వేగనివ్వాలి.
- ఇప్పుడు చల్లారిన తరవాత అన్నీ కలిపి మిక్సీలో వేసి, రుచికి సరిపడా ఉప్పు వేసి పొడి చేసుకోవాలి.
వేడివేడి అన్నంలోకి నల్ల కారం పొడి - కాస్త నెయ్యి తగిలిస్తే ఆహా అనాల్సిందే! - ఇలా ప్రిపేర్ చేయండి
వేడి వేడి అన్నంలో పుదీనా తొక్కు పచ్చడి - ఈ రుచి చూడాలంటే అదృష్టం ఉండాలి - ఇలా ప్రిపేర్ చేసుకోండి!
టిఫిన్ సెంటర్ రుచిలో 'టమాట పుదీనా' చట్నీ - ఇలా చేస్తే నిమిషాల్లో రెడీ!
