నోట్లో వేసుకోగానే కరిగిపోయే "నువ్వుల బర్ఫీ" - టేస్ట్​ అదుర్స్​ - పైగా ఆరోగ్యం బోనస్​!

-నువ్వులతో కారం పొడి, పచ్చడి రొటీన్​ -ఇలా నువ్వులతో బర్ఫీ చేసుకోండి టేస్ట్​ అద్దిరిపోతుంది

How to Make Nuvvulu Barfi: చాలా మంది బర్ఫీలను ఇష్టంగా తింటుంటారు. వీటి కోసం ప్రత్యేకంగా షాపుకు వెళ్లి మరీ కొని తెచ్చుకుంటూ ఉంటారు. కారణం ఇవి సూపర్​ టేస్టీగా ఉండి నోట్లో వేసుకుంటే కరిగిపోతాయి కాబట్టి. అయితే చాలా మందికి బర్ఫీలు అంటే జీడిపప్పుతో చేసినవి మాత్రమే తెలుసు. కానీ, అందరి ఇళ్లలో లభించే నువ్వులతో కూడా ఈ బర్ఫీలు తయారు చేసుకోవచ్చు. ఇవీ చాలా రుచిగా ఉంటాయి. అలా నోట్లో వేస్తే ఇలా కరిగిపోతాయి. చాలా తక్కువ పదార్థాలతో తక్కువ టైమ్​లో ఈ స్వీట్​ ప్రిపేర్​ చేయవచ్చు. నువ్వులు ఎలానూ ఆరోగ్యానికి మేలు చేస్తాయి కాబట్టి పిల్లల నుంచి పెద్దల వరకు హ్యాపీగా తినొచ్చు. మరి వీటికి కావాల్సిన పదార్థాలు, ప్రిపరేషన్​ ఇప్పుడు చూద్దాం.

కావాల్సిన పదార్థాలు:

• తెల్ల నువ్వులు - ఒకటింపావు కప్పు
• బెల్లం తురుము - ముప్పావు కప్పు
• పాలపొడి - పావు కప్పు
• యాలకుల పొడి - 1 టీ స్పూన్​
• ఉప్పు - చిటికెడు
• పల్లీలు - పావు కప్పు
• జీడిపప్పు - 10
• బాదం - 5
• నెయ్యి - తగినంత

తయారీ విధానం:

• స్టవ్​ ఆన్​ చేసి పాన్​ పెట్టి నువ్వులు పోసుకోవాలి. మంటను సిమ్​లో పెట్టి మంచి వాసన వచ్చే వరకు దోరగా ఫ్రై చేసుకుని ఓ ప్లేట్​లోకి తీసుకోవాలి.
• ఇప్పుడు అదే పాన్​లో పల్లీలు వేసి దోరగా వేయించుకుని మరో ప్లేట్​లోకి తీసుకుని చల్లార్చుకోవాలి.
• మిక్సీజార్​లోకి చల్లార్చిన నువ్వులు వేసి మెత్తగా గ్రైండ్​ చేసుకుని పక్కన పెట్టాలి.
• అదే మిక్సీ జార్​లో వేయించిన పల్లీలను పొట్టు లేకుండా వేసి కచ్చాపచ్చగా గ్రైండ్​ చేసుకోవాలి. లేదంటే రోట్లో దంచుకోవచ్చు.
• మరోసారి స్టవ్​ ఆన్​ చేసి నాన్​స్టిక్​ పాన్​ పెట్టుకోవాలి. మంటను సిమ్​లో పెట్టి బెల్లం తరుము, మూడు స్పూన్ల వాటర్​ పోసి కరిగించుకోవాలి.
• బెల్లం కరిగిన తర్వాత పాలపొడి వేసి ఉండలు లేకుండా కలిపి మిశ్రమం చిక్కబడేవరకు ఉడికించుకోవాలి.
• మూడు నిమిషాల తర్వాత యాలకుల పొడి, ఉప్పు, గ్రైండ్​ చేసుకున్న నువ్వుల పొడి వేసి కలిపి పాన్​కు అంటుకోకుండా మధ్యమధ్యలో నెయ్యి యాడ్​ చేసుకుంటూ ముద్దగా మారే వరకు ఉడికించుకోవాలి.
• మిశ్రమం దగ్గరపడిన తర్వాత నెయ్యి రాసిన ప్లేట్​ లేదా గిన్నెలోకి వేసుకుని సమానంగా స్ప్రెడ్​ చేసుకోవాలి.
• ఆ తర్వాత దంచుకున్న పల్లీలు, సన్నగా కట్​ చేసిన జీడిపప్పు, బాదం పలుకులు వేసి కొద్దిగా లైట్​గా ఒత్తి కొద్దిసేపు పక్కన ఉంచాలి.
• గోరువెచ్చగా ఉన్నప్పుడు నచ్చిన షేప్​లో కట్​ చేసుకుంటే ఎంతో రుచికరమైన, మరెంతో ఆరోగ్యకరమైన నువ్వుల బర్ఫీ రెడీ.
• నచ్చితే మీరూ ఈ రెసిపీ ట్రై చేసి మీ పిల్లలకు పెట్టండి. ఇష్టంగా తింటారు.