How to Make Jowar Idli at Home: బ్రేక్ఫాస్ట్‌ అనగానే చాలా మందికి ముందుగా గుర్తుకొచ్చేది ఇడ్లీనే. ఆరోగ్యానికి మంచిదనీ, తేలికగా ప్రిపేర్ చేసుకోవచ్చని అమ్మలంతా వారంలో మూడు నాలుగు రోజులు ఇడ్లీనే చేస్తుంటారు. ఇక ఇడ్లీలు చేయాలంటే మినపప్పుతో పాటు ఇడ్లీ రవ్వ కూడా ఇంపార్టెంట్. అయితే ఇడ్లీ రవ్వ లేకుండా కేవలం జొన్నలతో ఎంతో రుచికరమైన ఇడ్లీలు తయారు చేసుకోవచ్చు. జొన్నలతో చేసిన ఇవీ సూపర్ సాఫ్ట్గా వస్తాయి. పైగా బరువు తగ్గాలనుకునేవారికి, డయాబెటిస్ పేషెంట్లకు ఈ సూపర్ ఛాయిస్. మరి లేట్ చేయకుండా జొన్న ఇడ్లీలు ఎలా చేసుకోవాలో ఈ స్టోరీలో తెలుసుకుందాం.
కావాల్సిన పదార్థాలు:
- జొన్నలు - 2 కప్పులు
- మినపప్పు - అర కప్పు
- మెంతులు - 1 టీ స్పూన్
- అటుకులు - పావు కప్పు
- ఉప్పు - రుచికి సరిపడా
తయారీ విధానం:
- సాధారణంగా ఇడ్లీలు చేయాలంటే ముందు రోజు రాత్రే పిండిని ప్రిపేర్ చేసుకోవాలి. ఎందుకంటే పిండి పులిస్తేనే ఇడ్లీలు చాలా మృదువుగా, టేస్టీగా ఉంటాయి. కాబట్టి పిండిని ముందే సిద్ధం చేసుకోవాలి. అందుకోసం ఓ బౌల్లోకి మినపప్పు, మెంతులు వేసి రెండు మూడు సార్లు శుభ్రంగా కడిగాలి. ఆ తర్వాత నీళ్లు పోసి 5 గంటల పాటు నానబెట్టుకోవాలి.
- మరో గిన్నెలోకి తెల్ల జొన్నలు వేసి రెండు మూడు సార్లు కడిగి నీళ్లు పోసుకుని 5 గంటలు నానబెట్టాలి.
- పప్పు, జొన్నలు నానిన తర్వాత వీటిని గ్రైండ్ చేసే 5 నిమిషాల ముందు అటుకులు నానబెట్టుకోవాలి. అందుకోసం ఓ గిన్నెలోకి అటుకులు వేసి ఓసారి కడిగి నీళ్లు పోసుకుని నానబెట్టాలి.
- 5 నిమిషాల తర్వాత మిక్సీజార్ తీసుకుని అందులోకి మినపప్పు, అటుకులు వేసి గ్రైండ్ చేయాలి. ఆ తర్వాత కొద్దికొద్దిగా నీళ్లు పోసుకుంటూ పిండిని చాలా మెత్తగా రుబ్బుకోవాలి.
- పిండి మెదిగిన తర్వాత ఓ గిన్నెలోకి తీసుకోవాలి. ఇప్పుడు అదే మిక్సీజార్లోకి కొద్దికొద్దిగా జొన్నలు వేసుకుంటూ రవ్వగా గ్రైండ్ చేసుకోవాలి. ఇలా జొన్నలు మొత్తాన్ని గ్రైండ్ చేసుకుని మినపప్పు గిన్నెలోకి తీసుకోండి.
- ఆ తర్వాత మినపప్పు, జొన్నల మిశ్రమం పూర్తిగా కలిసేలా ఓ 5 నిమిషాల పాటు కలపి మూత పెట్టి రాత్రంతా పిండిని పులియబెట్టాలి.
- మరుసటి రోజు ఉదయం పిండి పులిసి చక్కగా పొంగుతుంది. అప్పుడు పిండిని ఓసారి కలిపి రుచికి సరిపడా ఉప్పు వేసుకోవాలి.
- ఇప్పుడు స్టవ్ ఆన్ చేసి ఇడ్లీ పాత్ర పెట్టి గ్లాసున్నర నీళ్లు పోసి మరిగించుకోవాలి. ఈ లోపు ఇడ్లీ ప్లేట్స్కు నూనె లేదా నెయ్యి అప్లై చేసి జొన్న మిశ్రమాన్ని వేసుకోవాలి. ఇలా అన్ని ప్లేట్స్లోకి ఇడ్లీ పిండిని వేసుకోవాలి.
- ఇడ్లీ పాత్రలోని నీళ్లు మరుగుతున్నప్పుడు ప్లేట్స్ పెట్టి మూత పెట్టి 10 నుంచి 12 నిమిషాల పాటు హై ఫ్లేమ్లో ఉడికించాలి.
- ఇడ్లీలు ఉడికిన 5 నిమిషాల తర్వాత తీసి ప్లేట్లోకి సర్వ్ చేసుకుంటే ఎంతో హెల్దీ అయిన జొన్న ఇడ్లీ రెడీ. దీనికి పల్లీ చట్నీ సూపర్గా ఉంటుంది. నచ్చితే మీరూ ట్రై చేయండి.
బంగాళదుంపతో సూపర్ టేస్టీ "ఇడ్లీలు" - పప్పు రుబ్బే పనిలేకుండా నిమిషాల్లో రెడీ!
పచ్చి బఠాణీలతో "ఇడ్లీలు, గుంట పొంగనాలు" - రుచికి రుచి, ఆరోగ్యానికి ఆరోగ్యం!
