చలిలో వేడి వేడిగా​ "వెల్లుల్లి రసం" - మాటల్లేవ్.. ఆస్వాదించాల్సిందే!

-ఎప్పుడూ ఒకే రకం చారు చేసుకుంటే రొటీన్​ -వెరైటీగా వెల్లుల్లి చారుతో తింటే అద్దిరిపోతుంది

How To Make Garlic Rasam at Home: అన్నంలోకి కర్రీ ఏది చేసినా.. సైడ్ డిష్​గా వేడివేడి చారు ఉంటే.. ఆ కాంబినేషన్ భలే ఉంటుంది. అంతేనా చలికాలంలో ఏ కూరలు లేకపోయినా కొంచెం చారు పోసుకుని, అప్పడాలను నంజుకుని తింటే కలిగే ఫీలింగ్ వేరే లెవల్​. వేడి వేడిగా గొంతులోకి జారుతుంటే.. అదుర్స్ అనిపిస్తుంది.

అయితే.. చారు అనగానే చాలా మంది టమాటా రసానికి ఇంపార్టెన్స్ ఇస్తుంటారు. కానీ ఎప్పుడూ అదే తినాలంటే బోర్​ కొట్టిద్ది. అందుకే ఈసారికి వెరైటీగా ఘాటైన, ఘుమఘుమలాడే వెల్లుల్లి చారు చేసుకోండి. టేస్ట్​ అద్దిరిపోతుంది. టమాటా చారు మాదిరిగానే దీన్ని ఈజీగా ప్రిపేర్ చేసుకోవచ్చు. పిల్లల నుంచి పెద్దల వరకూ ఎంతో ఇష్టంగా తింటారు. అంతేకాకుండా ఈ చలికాలంలో దీనిని తినడం వల్ల జలుబు, దగ్గు సహా గొంతు సమస్యలు తగ్గిపోతాయి. మరి.. ఈ రసం తయారీకి కావాల్సిన పదార్థాలు? ప్రిపరేషన్​ విధానం ఈ స్టోరీలో తెలుసుకుందాం..

కావాల్సిన పదార్థాలు:

• మిరియాలు - 1 టీ స్పూన్​
• జీలకర్ర - 1 టీ స్పూన్​
• వెల్లుల్లి రెబ్బలు - 25(సుమారు 35 గ్రాములు)
• నూనె - ఒకటిన్నర టీ స్పూన్​
• పచ్చిమిర్చి - 3
• కరివేపాకు - 2 రెమ్మలు
• టమాట - 1
• చింతపండు - 50 గ్రాములు
• పసుపు - అర టీ స్పూన్​
• ఉప్పు - రుచికి సరిపడా
• నీళ్లు - 800 ml

తాలింపు కోసం:

• నూనె - 1 టేబుల్​ స్పూన్​
• ఆవాలు - 1 టీ స్పూన్​
• జీలకర్ర - పావు టీ స్పూన్​
• ఎండుమిర్చి - 4
• కరివేపాకు - 2 రెబ్బలు
• దంచిన వెల్లుల్లి రెబ్బలు - 4
• ఇంగువ - చిటికెడు
• కొత్తిమీర తరుగు - కొద్దిగా

తయారీ విధానం:

• ముందుగా వెల్లుల్లి రెబ్బలను పొట్టు తీసి పక్కన ఉంచాలి. టమాట ముక్కలను సన్నగా కట్​ చేసుకోవాలి. అలాగే పచ్చిమిర్చిని పొడుగ్గా సన్నగా కట్​ చేసుకోవాలి. అదే విధంగా చింతపండును నానబెట్టి రసం తీసి పక్కన పెట్టాలి.
• ఇప్పుడు మిరియాలు, జీలకర్రను రోట్లో వేసి కచ్చాపచ్చాగా దంచాలి. అందులోనే పొట్టు తీసిన వెల్లుల్లి రెబ్బలు వేసి మరోసారి కచ్చాపచ్చగా దంచి ఓ గిన్నెలోకి తీసుకోవాలి.
• ఇప్పుడు స్టవ్​ ఆన్​ చేసి గిన్నె పెట్టి నూనె పోసుకోవాలి. ఆయిల్​ హీటెక్కిన తర్వాత పచ్చిమిర్చి చీలికలు, కాడలతో సహా కరివేపాకు వేసి కొద్దిసేపు ఫ్రై చేయాలి. ఆ తర్వాత దంచిన వెల్లుల్లి మిశ్రమాన్ని వేసి లైట్​ గోల్డెన్​ బ్రౌన్​ కలర్​ వచ్చే వరకు మగ్గించుకోవాలి.
• వెల్లుల్లి వేగిన తర్వాత టమాట ముక్కలు వేసి ఓ నిమిషం పాటు వేయించుకోవాలి. ఆ తర్వాత చింతపండు గుజ్జు పోసి ఓ పొంగు వచ్చే వరకు ఉడికించుకోవాలి.
• అనంతరం పసుపు, రుచికి సరిపడా ఉప్పు వేసి మరో రెండు నిమిషాలు మగ్గించాలి.
• ఆ తర్వాత నీళ్లు పోసి మూత పెట్టి మీడియం ఫ్లేమ్​ మీద ఓ 15 నిమిషాలు ఉడికించుకుని స్టవ్ ఆఫ్​ చేసుకోవాలి.
• తాలింపు కోసం స్టవ్​ ఆన్​ చేసి పాన్​ పెట్టి నూనె వేసుకోవాలి. ఆయిల్​ బాగా కాగిన తర్వాత ఆవాలు, జీలకర్ర వేసి వేయించుకోవాలి.
• ఆ తర్వాత ఎండు మిర్చి, కరివేపాకు, దంచిన వెల్లుల్లి రెబ్బలు, ఇంగువ వేసి వేయించుకోవాలి.
• దింపే ముందు కొద్దిగా కొత్తిమీర తరుగు వేసి కలిపి స్టవ్​ ఆఫ్​ చేసి వెల్లుల్లి రసంలో కలిపితే ఎంతో ఘుమఘుమలాడే వెల్లుల్లి చారు రెడీ. వేడి వేడి అన్నంలో తింటే అమృతమే.