టేస్టీ "కొత్తిమీర పులావ్​" - ఇలా చేసి పెడితే పిల్లల లంచ్​బాక్స్​లు ఇట్టే ఖాళీ అయిపోతాయ్​!

-రెగ్యులర్​ పులావ్​ను మించిన టేస్ట్​ -ఇలా చేసి పెడితే పిల్లలు ఒక్క మెతుకు మిగల్చరు!

How to Make Coriander Pulao: పులావ్.. చాలా మంది ఫేవరెట్​ డిష్​. అందుకే వీలు కుదిరినప్పుడల్లా రకరకాలుగా చేసుకుంటుంటారు. కూరగాయలతోపాటు మటన్, చికెన్ లాంటి నాన్ వెజ్​లతోనూ పులావ్ చేసుకుంటుంటారు. అంతేనా.. కూరగాయలు లేనప్పుడు, ఇంటికి అతిథులు వచ్చినప్పుడు, పిల్లలు లంచ్​ బాక్స్​లు తిననప్పుడు వెరైటీగా చేస్తుంటారు. మరి, ఈసారి కూడా వెరైటీగా చేయాలనుకుంటున్నారా? అయితే ఎంతో టేస్టీగా, నిమిషాల్లో ప్రిపేర్​ అయ్యే కొత్తిమీర పులావ్​ను రెడీ చేసుకోండిలా. రుచి అద్దిరిపోతుంది. కలర్​ఫుల్​గా ఉండటం వల్ల పిల్లల లంచ్​ బాక్స్​కి పెడితే మెతుకు కూడా మిగల్చకుండా తినేస్తారు. మరి ఈ పులావ్​కు కావాల్సిన పదార్థాలు, తయారీ విధానం ఈ స్టోరీలో తెలుసుకుందాం..

కావాల్సిన పదార్థాలు:

• అల్లం - కొద్దిగా
• వెల్లుల్లి రెబ్బలు - 6
• పచ్చిమిర్చి - 3
• కొత్తిమీర తరుగు - 1 కప్పు
• నూనె - 2 టేబుల్​ స్పూన్లు
• బిర్యానీ ఆకు - 1
• లవంగాలు - 3
• యాలకులు - 3
• దాల్చిన చెక్క - కొద్దిగా
• ఉల్లిపాయ - 1
• పచ్చిమిర్చి - 3
• కరివేపాకు - 2 రెమ్మలు
• నీళ్లు - 4 కప్పులు
• ఉప్పు - రుచికి సరిపడా
• గరం మసాలా -1 టీ స్పూన్​
• బియ్యం - 2 కప్పులు
• జీడిపప్పు - 10
• కొత్తిమీర - కొద్దిగా

తయారీ విధానం:

• ముందుగా ఉల్లిపాయలు, పచ్చిమిర్చి, కొత్తిమీరను సన్నగా కట్​ చేసుకోవాలి. అలాగే జీడిపప్పును నెయ్యిలో వేయించి పక్కన ఉంచాలి. అదే విధంగా బియ్యాన్ని శుభ్రంగా కడిగి నానబెట్టాలి.
• ఇప్పుడు మిక్సీ జార్​ తీసుకుని అందులోకి అల్లం, వెల్లుల్లి, పచ్చిమిర్చి, కొత్తిమీర వేసి మెత్తగా పేస్ట్​ చేసుకోవాలి.
• ఇప్పుడు స్టవ్​ ఆన్​ చేసి కుక్కర్​ పెట్టి ఆయిల్​ పోసుకోవాలి. నూనె వేడెక్కిన తర్వాత బిర్యానీ ఆకు, లవంగాలు, యాలకులు, దాల్చిన చెక్క, అనాసపువ్వు వేసి ఫ్రై చేసుకోవాలి.
• ఆ తర్వాత కట్​ చేసుకున్న ఉల్లిపాయ ముక్కలు, పచ్చిమిర్చి చీలికలు, కరివేపాకు వేసి గోల్డెన్​ బ్రౌన్​ కలర్​ వచ్చేవరకు వేయించుకోవాలి.
• అనంతరం ముందుగానే ప్రిపేర్​ చేసుకున్న అల్లం కొత్తిమీర పేస్ట్​ వేసి నూనె పైకి తేలేవరకు మగ్గించుకోవాలి.
• నూనె పైకి తేలిన తర్వాత నాలుగు కప్పుల నీళ్లు, రుచికి సరిపడా ఉప్పు, గరం మసాలా వేసి కలపాలి.
• నీళ్లు మరుగుతున్నప్పుడు బియ్యాన్ని వేసి కలిపి కుక్కర్​ మూత పెట్టి మీడియం ఫ్లేమ్​ మీద రెండు విజిల్స్​ వచ్చే వరకు ఉడికించుకోవాలి.
• ఆ తర్వాత కుక్కర్​ స్టీమ్​ పోయేవరకు ఉంచి అనంతరం ఓపెన్​ చేసి వేయించిన జీడిపప్పు, కొత్తిమీర తరుగు వేసి కలిపి వేడివేడిగా సర్వ్​ చేసుకుంటే అద్దిరిపోయే కొత్తిమీర పులావ్​ రెడీ.
• నచ్చితే మీరూ ట్రై చేయండి. టేస్ట్​ అద్దిరిపోతుంది. ఈ రెసిపీని పిల్లల లంచ్​ బాక్స్​లో పెడితే కిక్కురుమనకుండా తినేస్తారు.