Weapon Companies Business : ఉక్రెయిన్, గాజా యుద్ధాలు, ఇతర సంక్షోభాల కారణంగా గతేడాది ఆయుధ వ్యాపార కంపెనీలు బాగా లాభపడ్డాయని స్టాక్‌హోమ్‌ ఇంటర్నేషనల్‌ పీస్‌ రీసెర్చి (సిప్రి) నివేదిక పేర్కొంది. ప్రపంచంలోని 100 ఆయుధ కంపెనీలు 2023లో ఏకంగా 632 బిలియన్‌ డాలర్ల (రూ.53 లక్షల కోట్ల) వ్యాపారం జరిగినట్లు పేర్కొంది. అంతకుముందు ఏడాదితో పోలిస్తే ఇది 4.2శాతం అధికమని తెలిపింది. వాస్తవానికి 2022లో చాలా ఆయుధ కంపెనీలు కనీస డిమాండ్‌ కూడా లేక డీలా పడ్డాయి.
కానీ, ఏడాది తిరిగేసరికి అవి వాటి ఉత్పత్తిని గణనీయంగా పెంచాల్సిన పరిస్థితి తలెత్తింది. తాము పరిశీలించిన 100 ఆయుధ కంపెనీలకు 2023లో కనీసం 1 బిలియన్‌ డాలర్లు (రూ.8.4 వేల కోట్లకు) పైగా వ్యాపారం జరిగినట్లు సిప్రి వెల్లడించింది. 2024లో కూడా అదే తీరు కొనసాగుతోందని సిప్రి ఆయుధ ఉత్పత్తి నిపుణుడు లోరెంజో పేర్కొన్నారు. గాజా, ఉక్రెయిన్, ఇతర సంక్షోభాల కారణంగా పుట్టుకొచ్చిన డిమాండ్‌ను అందుకోవడంలో చిన్న ఉత్పత్తిదారులు ముందున్నారని సిప్రి వెల్లడించింది. వీరు ప్రత్యేకమైన పరికరాలు తయారు చేయడమో, సిస్టమ్స్‌ను నిర్మించడమో చేసేవారని సైనిక వ్యయ-ఆయుధ ఉత్పత్తి కార్యక్రమం నిపుణుడు నాన్‌ టియాన్‌ తెలిపారు.
ప్రపంచంలో భారీ 100 కంపెనీల్లో 41 అమెరికాలోనే ఉన్నాయి. ఇవి గతేడాది 2.3 శాతం వృద్ధి సాధించాయి. ప్రపంచంలోనే అతిపెద్ద ఆయుధ తయారీ సంస్థలైన లాక్‌హీడ్‌ మార్టిన్‌(1.6), రేథియాన్‌ టెక్నాలజీస్‌ (1.3) ఆదాయం మాత్రం తగ్గింది. ఐరోపాలో 27 భారీ సంస్థలు ఉన్నాయి. ఇవి సగటున కేవలం 0.2 శాతమే వృద్ధిని చూశాయి. మరికొన్ని కంపెనీలు ఉక్రెయిన్ యుద్ధానికి అవసరమైన శతఘ్నుల తూటాలు, మందుగుండు వంటివి ఉత్పత్తి చేసి భారీగానే ఆర్జించాయి.
రష్యా కంపెనీలు మొత్తం సగటున 40 శాతం వృద్ధిని చూస్తే ప్రభుత్వ రంగానికి చెందిన రోస్‌టెక్‌ మాత్రం 49 శాతం పెరిగింది. 2023లో అక్టోబరు 7 దాడుల తర్వాత మధ్య ఆసియాలో కంపెనీల విక్రయాలు 18శాతం పుంజుకొన్నాయి. మూడు ఇజ్రాయెల్‌ కంపెనీలు రికార్డు స్థాయిలో 13.6 బిలియన్‌ డాలర్ల విక్రయాలు జరిపాయి. తుర్కియేకు చెందిన డ్రోన్ల తయారీ సంస్థ బేకర్‌ 24 శాతం వృద్ధి నమోదు చేసింది. చైనా సంస్థల విక్రయాల్లో వృద్ధి లేకపోయినా 103 బిలియన్‌ డాలర్ల ఆయుధ వ్యాపారం చేశాయి.
