మోదీ టూర్​ ఎఫెక్ట్!​- మాల్దీవుల టూరిజం ఢమాల్​- 3వారాల్లో భారీగా తగ్గిన ఇండియన్​ టూరిస్టులు!

Maldives Tourism Loss : ప్రధాని మోదీ జనవరి 2న లక్షద్వీప్‌ పర్యటన తర్వాత మాల్దీవులతో తలెత్తిన దౌత్యపరమైన వివాదం ఆ దేశ పర్యటక రంగంపై తీవ్ర ప్రభావం చూపుతోంది. భారత్‌ నుంచి మాల్దీవుల పర్యటనకు వెళ్తున్న వారి సంఖ్య 3 వారాల్లోనే భారీగా తగ్గింది. గతేడాది మాల్దీవులకు వెళ్లిన విదేశీ పర్యాటకుల్లో 2లక్షలకు పైగా మందితో భారత్‌ అగ్ర స్థానంలో నిలవగా తాజా వివాదంతో ఆ ర్యాంకింగ్ ఐదో స్థానానికి పడిపోయింది. ఈ విషయాన్ని మాల్దీవుల పర్యాటక మంత్రిత్వశాఖ స్వయంగా వెల్లడించింది.

Maldives Tourism Loss : ప్రధాని నరేంద్ర మోదీ లక్షద్వీప్‌ పర్యటన తర్వాత మాల్దీవులతో నెలకొన్న వివాదం ఆ దేశ పర్యాటకంపై చూపుతున్న తీవ్ర ప్రభావం అధికారిక లెక్కల్లో స్పష్టంగా కనిపిస్తోంది. భారత్ నుంచి మాల్దీవుల పర్యటనకు వెళ్లే వారి సంఖ్య మూడు వారాల వ్యవధిలో 8 శాతానికి తగ్గింది. గతేడాది మాల్దీవులకు విదేశీ ప‌ర్యటకుల రాకలో భారత్‌ అగ్రస్థానంలో ఉండగా, ఇప్పుడు ఐదో స్థానానికి పడిపోయింది. భారత సెలెబ్రెటీలు, ప్రముఖులు, సామాన్యుల నుంచి ఎదురైన వ్యతిరేకతే ఇందుకు కారణమైంది. ప్రధాని మోదీపై మాల్దీవుల మంత్రులు వివాదాస్పద వ్యాఖ్యల తర్వాత ఇరు దేశాల మధ్య దౌత్యపరమైన వివాదం నెలకొనగా, మాల్దీవుల పర్యటకంలో అనూహ్య మార్పులు జరుగుతున్నాయి.

టాప్​ నుంచి ఐదో స్థానానికి భారత్​!
Maldives Tourism Statistics : మాల్దీవుల పర్యటక శాఖ తాజాగా విడుదల చేసిన లెక్కలను పరిశీలిస్తే గతేడాది డిసెంబర్‌ 31 నాటికి 2,09,198 మంది పర్యటకులతో భారత్‌ అగ్రస్థానంలో ఉండేది. అప్పుడు మాల్దీవుల్లో భారత సంద్శకుల వాటా దాదాపు 11 శాతంగా ఉంది. వివాదం తర్వాత ఈనెల 28 వరకు మాల్దీవుల టూరిజంలో భారత్‌ వాటా 8 శాతానికి పడిపోయింది. ఈ ఏడాది ఇప్పటివరకు కేవలం 13,989 మంది భారతీయులు మాత్రమే మాల్దీవుల్లో పర్యటించారు. 2024 జనవరి నెలలో అత్యధిక మంది పర్యటకులను మాల్దీవులకు పంపిన దేశాల్లో 18,561 మందితో రష్యా తొలి స్థానంలో నిలిచింది. 18,111 మంది టూరిస్టులతో రెండో స్థానంలో ఇటలీ, 16,529 మంది సందర్శకులతో మూడోస్థానంలో చైనా నిలిచింది. 14,588 మంది టూరిస్టులతో నాలుగో స్థానంలో బ్రిటన్‌ ఉంది.

'భారత్​కు క్షమాపణలు చెప్పాలి'
మరోవైపు రెండు దేశాల మధ్య నెలకొన్న వివాదంపై మాల్దీవుల ప్రతిపక్ష పార్టీ జేపీ(జుమ్‌హూరీ పార్టీ) నేత ఖాసిం ఇబ్రహీం స్పందించారు. తమ అధ్యక్షుడు మహమ్మద్‌ ముయిజ్జు భారత ప్రజలకు, ప్రధాని నరేంద్ర మోదీకి అధికారికంగా క్షమాపణలు చెప్పాలని కోరారు. ఈ మేరకు ఆ దేశ స్థానిక మీడియా వాయిస్​ ఆఫ్​ మాల్దీవ్స్​ నివేదించింది. కాగా, ఈ వార్తలపై మాల్దీవుల ప్రభుత్వం ఇంకా స్పందించలేదు.

"ఏ దేశానికి సంబంధించైనా, ముఖ్యంగా పొరుగు దేశానికి సంబంధించి ఈ విధంగా మాట్లాడకూడదు. రెండు దేశాల మధ్య సత్సంబంధాలు దెబ్బతీసేట్లుగా వ్యాఖ్యలు చేయకూడదు. మన దేశంపై మనకూ ఓ బాధ్యత ఉంది. మాట్లాడేముందు కొన్ని అంశాలను పరిగణనలోకి తీసుకోవాలి."
- ఖాసిం ఇబ్రహీం, మాల్దీవుల విపక్ష నేత

అసలెందుకీ వివాదం?
కేంద్రపాలిత ప్రాంతం లక్షద్వీప్‌లో ప్రధాని మోదీ జనవరి 2న పర్యటించారు. కొంతసేపు సముద్రం ఒడ్డున సేద తీరి అనంతరం అక్కడి నీటిలో స్నార్కెలింగ్‌ చేశారు. సాహసాలు చేయాలనుకునే వారు తమ లిస్ట్‌లో లక్షద్వీప్‌ను కూడా చేర్చుకోవాలని కోరుతూ అక్కడి ఫొటోలను ప్రధాని సామాజిక మాధ్యమాల్లో పోస్ట్ చేశారు. దీనిపై మాల్దీవుల ఎంపీ జహీద్‌ రమీజ్‌ అక్కసు వెళ్లగక్కారు. పర్యటక రంగంలో మాల్దీవులతో పోలిస్తే లక్షద్వీప్‌ ఎన్నో సమస్యలను ఎదుర్కొంటోందని ట్వీట్ చేశారు. తర్వాత మాల్దీవుల మంత్రులు ప్రధాని మోదీపై వివాదాస్పద వ్యాఖ్యలు చేశారు. దీనిపై భారత నెటిజెన్ల నుంచి తీవ్ర విమర్శలు వచ్చాయి. మాల్దీవుల పర్యటనను మానుకోవాలని పోస్టులు ట్రెండ్ అయ్యాయి. ఈ పరిణామాలు తాజాగా ఆ దేశ పర్యాటక రంగంపై తీవ్ర ప్రభావం చూపిస్తున్నాయి.