ఆ ఫుడ్ తింటే పెద్దపేగు క్యాన్సర్‌ వస్తుందట జాగ్రత్త! ఈ డైట్ పాటిస్తే సేఫ్!

-వెస్ట్రన్‌ డైట్‌తో పెరుగుతున్న పెద్ద పేగు క్యాన్సర్ ముప్పు -మంచి తిండితో విరుగుడు అని శాస్త్రవేత్తల వెల్లడి

Colon Cancer Causes Food: ప్రపంచవ్యాప్తంగా వేగంగా పెరుగుతున్న పెద్ద పేగు క్యాన్సర్లకు మారుతున్న ఆహార అలవాట్లే కారణమవుతునట్లు అమెరికా శాస్త్రవేత్తల పరిశోధన తేల్చింది. దీర్ఘకాల ఇన్‌ఫ్లమేషన్‌కు ఇది తోడు కావడం వల్ల ఈ వ్యాధి తీవ్రమవుతుందని వెల్లడించింది. అల్ట్రా-ప్రాసెస్డ్‌ ఆహారాలతో కూడిన వెస్ట్రన్‌ డైట్‌, దీర్ఘకాల ఇన్‌ఫ్లమేషన్‌.. కణితి వృద్ధికి కారణం కావొచ్చని అభిప్రాయపడింది. ఈ నేపథ్యంలో ఆరోగ్యకర ఆహారంతో పరిస్థితిని చక్కదిద్దే అంశంపై శాస్త్రవేత్తలు పరిశోధనలు చేపట్టారు. ఈ పద్ధతిలో ఇన్‌ఫ్లమేషన్‌ను, తద్వారా పెద్దపేగు క్యాన్సర్‌ను నియంత్రించొచ్చని పరిశోధకులు భావిస్తున్నారు.

ప్రస్తుతం ప్రపంచవ్యాప్తంగా నమోదవుతున్న క్యాన్సర్‌ కేసుల్లో పెద్దపేగు క్యాన్సర్‌ మూడోస్థానంలో ఉంది. అన్ని క్యాన్సర్‌ కేసుల్లో దీని వాటా 10 శాతంగా ఉందని.. క్యాన్సర్‌ సంబంధ మరణాల్లో ఇది రెండో స్థానంలో ఉందని గణాంకాలు చెబుతున్నాయి. అయితే, చాలాకేసుల్లో దీన్ని ముదిరిపోయిన దశలోనే గుర్తిస్తున్నారు. ఫలితంగా ఆ స్థితిలో చికిత్సకు అవకాశాలు పరిమితంగానే ఉంటున్నాయని నిపుణులు అంటున్నారు. అందువల్ల ముందునుంచే జాగ్రత్తలు తీసుకోవాల్సిన అవసరం ఉందని అమెరికాలోని దక్షిణ ఫ్లోరిడా విశ్వవిద్యాలయ శాస్త్రవేత్తలు వివరిస్తున్నారు. ఈ రుగ్మతపై వెస్ట్రన్‌ డైట్‌ ప్రభావం గురించి How ultra-processed foods may drive colorectal cancer risk అంశంపై వీరు లోతైన పరిశోధన చేపట్టారు.

ఏమిటీ డైట్‌?
ఈ వెస్ట్రన్‌ డైట్‌లో భారీగా చక్కెరలు, అల్ట్రాప్రాసెస్డ్‌ తినుబండారాలు, సంతృప్త కొవ్వులు, రసాయనాలు, ఇన్‌ఫ్లమేషన్‌ కలిగించే విత్తన నూనెలు ఎక్కువగా ఉంటాయని పరిశోధకులు చెబుతున్నారు.

ముఖ్యంగా అనారోగ్యకరమైన ఆహారం తీసుకునేవారి శరీరంలో ఇన్‌ఫ్లమేషన్‌ ఎక్కువగా ఉంటుందని ఇప్పటికే అధ్యయనంలో వెల్లడైందని వెల్లడించారు. ఈ ఇన్‌ఫ్లమేషన్‌ పెద్దపేగు కణుతుల్లో కనిపిస్తోందని శాస్త్రవేత్తలు చెబుతున్నారు. క్యాన్సర్‌ అనేది దీర్ఘకాల గాయం లాంటిదని, ఒక పట్టాన నయం కాదని వివరిస్తున్నారు. నిత్యం అల్ట్రా-ప్రాసెస్డ్‌ ఆహారంతో వెస్ట్రన్‌ డైట్‌ ఎక్కువగా తీసుకుంటుంటే.. ఆ గాయంలో నయమయ్యే గుణం తగ్గిపోతుందని హెచ్చరిస్తున్నారు. ఫలితంగా ఇన్‌ఫ్లమేషన్‌ పెరగడం, రోగనిరోధక వ్యవస్థ సామర్థ్యం తగ్గిపోవడం వల్ల అంతిమంగా క్యాన్సర్‌ వృద్ధి చెందుతుందని అంటున్నారు.

అవకాడో తదితరాల్లో ఉండే ఆరోగ్యకర కొవ్వుల ద్వారా లభ్యమయ్యే బయోయాక్టివ్‌ లిపిడ్‌ పదార్థాలు శరీరానికి మేలు చేస్తాయని నిపుణులు చెబుతున్నారు. వీటి సాయంతో మన శరీరం ఇన్‌ఫ్లమేషన్‌ను తగ్గించుకుంటుందని వివరిస్తున్నారు. ప్రాసెస్డ్‌ ఆహార పదార్థాల్లోనూ ఇలాంటివి ఉంటాయని.. ఇవి మాత్రం శరీరానికి హానికరమని హెచ్చరిస్తున్నారు. ఇవి శరీరంలోకి ప్రవేశిస్తే.. రోగనిరోధక వ్యవస్థలో సమతౌల్యత దెబ్బతిని దీర్ఘకాల ఇన్‌ఫ్లమేషన్‌ ఉత్పన్నమవుతుందని అంటున్నారు.

బయోయాక్టివ్‌ లిపిడ్‌లు చాలా చిన్న రేణువులని.. శరీరంలో వాటిని గుర్తించడం చాలా కష్టమని నిపుణులు అంటున్నారు. అయితే దక్షిణ ఫ్లోరిడా విశ్వవిద్యాలయ శాస్త్రవేత్తలు మాత్రం.. సున్నితమైన ఎనలిటికల్‌ విధానాలను ఉపయోగించి 162 ట్యూమర్‌ నమూనాల్లో వీటి జాడను పట్టుకున్నారు. ఈ కణుతుల్లో ఇన్‌ఫ్లమేషన్‌ను ప్రేరేపించే రేణువులు ఎక్కువగా ఉన్నాయని గుర్తించారు. ఇన్‌ఫ్లమేషన్‌ను తగ్గించే, కణుతులను నయం చేసే రేణువులు తక్కువగా ఉన్నాయని.. ఫలితంగా అనారోగ్యకర ఆహారంలో కనిపించే లిపిడ్‌లు ఎక్కువగా ఉన్నాయని వివరించారు.

కొత్త చికిత్సకు బాటలు
అమెరికాలో దక్షిణ ఫ్లోరిడా యూనివర్సిటీ తాజా పరిశోధనలో తేలిన అంశాల ఆధారంగా.. పెద్దపేగు క్యాన్సర్‌ చికిత్సకు ‘రిజల్యూషన్‌ మెడిసిన్‌’ అనే కొత్త, సహజసిద్ధ విధానాన్ని శాస్త్రవేత్తలు తెరపైకి తెచ్చారు. ఇందులో ఇన్‌ఫ్లమేషన్‌ను తగ్గించేలా రోగి ఆహారాన్ని సమతౌల్యం చేస్తారని పరిశోధకులు వివరిస్తున్నారు. ఇందుకోసం ఒమేగా-3 ఫ్యాటీ ఆమ్లాలు, ఫిష్‌ ఆయిల్‌ నుంచి సేకరించిన ‘స్పెషలైజ్డ్‌ ప్రో-రిజాల్వింగ్‌ మీడియేటర్లు’తో కూడిన ఆరోగ్యకర అన్‌ప్రాసెస్డ్‌ ఆహారాన్ని అందిస్తారని చెబుతున్నారు. దీనిద్వారా శరీరంలోని చికిత్స యంత్రాంగాలను పునరుద్ధరించొచ్చని పరిశోధకులు అభిప్రాయపడుతున్నారు. ఇంకా సరిపడా నిద్ర, వ్యాయామం కూడా ఈ విధానంలో ఉంటుందని వివరిస్తున్నారు. ముఖ్యంగా ఫిష్‌ ఆయిల్‌లోని పదార్థాలతో నిర్వహించిన ప్రాథమిక ప్రయోగాలు సైతం మంచి ఫలితాలను ఇచ్చినట్లు శాస్త్రవేత్తలు వెల్లడిస్తున్నారు. ఇన్‌ఫ్లమేషన్‌ను మూలాల వద్దే నిరోధించే సత్తా వీటికి ఉన్నట్లు తేలిందని అంటున్నారు. తద్వారా.. అనేక వ్యాధులకు అడ్డుకట్ట వేయవచ్చని నిపుణులు పేర్కొన్నారు. దీనిపై తదుపరి పరిశోధనలు జరుగుతున్నాయని వివరించారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.