ఇది సార్ ప్రభాస్​ బ్రాండ్​ - ఈ సినిమాల వసూళ్లన్నీ రూ.500 కోట్లుపైనే! - Kalki 2898 AD Collections

Kalki 2898 AD 500 Crores Collections : ప్రభాస్ కల్కి 2898 ఏడీ నాలుగు రోజుల్లో రూ.500కోట్లు దాటేసింది. ఈ నేపథ్యంలో రూ.500 కోట్లకు పైగా వసూళ్లను సాధించిన ప్రభాస్ సినిమాలేంటో చూద్దాం.

Kalki 2898 AD 500 Crores Collections : ప్రభాస్ 'కల్కి' - ప్రస్తుతం ఈ పేరు దేశవ్యాప్తంగా మార్మోగిపోతోంది. 'బాహుబలి'తో పాన్ ఇండియా స్టార్​గా మారిన ప్రభాస్​ ప్రస్తుతం 'కల్కి 2898 ఏడీ' చిత్రంతో మరో లెవల్​కు ఎదిగిపోయారనే చెప్పాలి. ఇండియన్ ఫిల్మ్ హిస్టరీలో ఏ హీరో సాధ్యం కానీ రికార్డులను సృష్టిస్తున్నారు.

తాజాగా కల్కి చిత్రమైతే ఏకంగా నాలుగు రోజుల్లో రూ.500 కోట్లకుపైగా వసూళ్లను సాధించి బాక్సాఫీస్ షేక్ చేసింది. ఏకంగా రూ.555 కోట్లు సాధించినట్లు మూవీ టీమ్ అఫీషియల్​గా అనౌన్స్​ చేసింది. అయితే ఆయన నటించిన 'కల్కి' మాత్రమే కాదు గతంలోనూ మరో మూడు చిత్రాలు కూడా రూ.500 కోట్లకు పైగా వసూళ్లను సాధించి కలెక్షన్ల సునామీ సృష్టించాయి. తెలుగు ఇండస్ట్రీలో ఇప్పటి వరకు ఏ హీరోకు ఈ రేంజ్​ రికార్డ్​ సాధ్యం కాలేదనే చెప్పాలి.

రూ.500 కోట్లు వసూలు చేసిన ప్రభాస్ చిత్రాలు ఇవే
1. బాహుబలి 2 - దర్శకధీరుడు రాజమౌళి తెరకెక్కించిన ఈ విజువల్ వండర్ హిస్టారికల్ ఎపిక్​ డ్రామాలో ప్రభాస్​తో పాటు అనుష్క, రానా, రమ్యకృష్ణ, సత్యరాజ్, సుదీప్ కీలక పాత్రలు పోషించారు. దాదాపు రూ. 250 కోట్ల బడ్జెట్​తో తెరకెక్కిన ఈ చిత్రం ప్రపంచ వ్యాప్తంగా రూ. 1814 కోట్ల గ్రాస్ వసూళ్లను సాధించింది. విడుదలకు ముందే రూ. 350 కోట్ల ప్రీ రిలీజ్ బిజినెస్ కూడా చేసింది.

2.బాహుబలి - ఈ చిత్రంతోనే తెలుగు సినిమా సత్తాను ప్రపంచానికి చాటి చెప్పారు దర్శకధీరుడు రాజమౌళి. హాలీవుడ్ ప్రముఖులు కూడా సినిమా అద్భుతం అంటూ ప్రశంసల వర్షం కురిపించారు. దాదాపు రూ. 180 కోట్ల బడ్జెట్​తో తెరకెక్కిన ఈ సినిమా ప్రపంచవ్యాప్తంగా రూ. 632 కోట్ల గ్రాస్ వసూళ్లను సాధించింది. ఇండియన్ ఫిల్మ్ హిస్టరీలో అప్పటి వరకు ఉన్న రికార్డులను బ్రేక్ చేసింది.

3. సలార్ - 'బాహుబలి' తర్వాత ప్రభాస్ నటించిన 'సాహో', 'రాధేశ్యామ్'​, 'ఆదిపురుష్' సక్సెస్​ కాకపోయినప్పటికీ మంచి వసూళ్లనే సాధించాయి. కానీ రూ.500 కోట్లు దాటలేదు! అనంతరం భారీ అంచనాలతో వచ్చిన 'సలార్' మళ్లీ ప్రభాస్​ను సక్సెస్​ ట్రాక్ ఎక్కించింది. మలయాళ స్టార్ పృథ్వీరాజ్ సుకుమారన్ కీలక పాత్రలో నటించారు. దాదాపు రూ. 300 కోట్ల బడ్జెట్​తో తెరకెక్కిన ఈ చిత్రం ప్రపంచ వ్యాప్తంగా రూ. 623.5 కోట్ల గ్రాస్ వసూళ్లను సాధించింది.

4. కల్కి 2898 ఏడీ - ఇప్పుడు 'కల్కి' ప్రభంజనం సృష్టిస్తోంది. అమితాబ్ బచ్చన్, కమల్ హాసన్, దీపికా పదుకొణె, దిశాపటానీ వంటి వారు కీలక పాత్రల్లో నటించారు. హాలీవుడ్ రేంజ్​లో ఉన్న ఈ చిత్రం కేవలం నాలుగు రోజుల్లో రూ.550 కోట్లు వసూళ్లు చేసింది. దాదాపు రూ. 600 కోట్ల బడ్జెట్​తో రూపొందించిన ఈ సినిమా లాంగ్ రన్​ టైమ్​లో రూ.1000 కోట్ల నుంచి రూ.1500 కోట్ల వరకు వసూళ్లను అందుకుంటుందని ట్రేడ్ వర్గాల నిపుణులు అంచనాలు వేస్తున్నారు.