Road Safety Tips : ప్రస్తుత కాలంలో బైక్, కారు ఇలా ఏదో ఒక వాహనం ప్రతి ఇంట్లోనూ ఉంటోంది. కుటుంబంతో కలిసి విహారయాత్రలు, దూర ప్రాంతాలకు వెళ్లాలంటే కారును వాడుతున్నారు. మార్కెట్, చిన్నచిన్న పనులకు వెళ్లడం కోసం బైక్ను ఉపయోగిస్తున్నారు. అయితే ఇటీవల కాలంలో రోడ్డు ప్రమాదాలు విపరీతంగా పెరిగిపోయాయి. ఎంత జాగ్రత్తగా వెళ్లినా, అవతలి వారు చేసిన తప్పు వల్ల ప్రమాదాలు జరుగుతున్నాయి. ఈ క్రమంలో రోడ్డుపై వాహనం నడిపేటప్పుడు తీసుకోవాల్సిన టాప్-10 జాగ్రత్తలేంటో ఈ స్టోరీలో తెలుసుకుందాం.
1. ఏకాగ్రతగా ఉండండి
మీరు కారు డ్రైవింగ్ చేసినప్పుడు ఏకాగ్రతగా ఉండండి. స్మార్ట్‌ ఫోన్, టాబ్లెట్ లేదా ఏదైనా ఇతర ఎలక్ట్రానిక్ పరికరాన్ని ఉపయోగించకండి. లేదంటే యాక్సిడెంట్లు జరిగే అవకాశం ఉంది. కారు టర్న్ చేస్తున్నప్పుడు వెనుక ఉన్న వాహనాలను గమనించండి.
2. బ్యాడ్ మూడ్లో డ్రైవింగ్ చేయవద్దు
మీరు బ్యాడ్ మూడ్ లో ఉన్నప్పుడు డ్రైవింగ్ చేయవద్దు. మీ మానసిక స్థితి సరిగ్గా లేకపోతే, వెయిటింగ్ లేన్లో కారును కాసేపు ఆపి విశ్రాంతి తీసుకోండి. మీకు ఇష్టమైన పాటలను వినండి. లేదంటే మీ ప్రియ స్నేహితుడికి కాల్ చేసి మాట్లాడండి. అప్పుడు మీ మనసు కుదుటపడుతుంది. ప్రతికూల ఆలోచనలు మీ డ్రైవింగ్పై ప్రభావం చూపుతాయి. దీంతో డ్రైవింగ్ చేసేటప్పుడు మీ ఏకాగ్రత దెబ్బతిని యాక్సిడెంట్లు అయ్యే ప్రమాదం ఉంది. అతివేగం, రాంగ్ రూట్, ఓవర్‌టేక్ చేయడం వంటివి చేస్తున్నప్పుడు మరింత జాగ్రత్తగా ఉండండి.
3. ట్రాఫిక్ సిగ్నల్ దగ్గర జాగ్రత సుమా!
ట్రాఫిక్ సిగ్నల్ దగ్గర రెడ్ లైట్ పడినప్పుడు వాహనాన్ని ఆపండి. మీకు ఎంత అత్యవసరమైనా ఆ సిగ్నల్ పడినప్పుడు జంక్షన్ను క్రాస్ చేయవద్దు. లేదంటే ఫైన్ పడుతుంది. అలాగే ప్రమాదం జరిగే కూడా ఉంది.
4. మద్యం సేవించి డ్రైవ్ చేయవద్దు
మద్యం సేవించి వాహనం నడపరం నేరం, ప్రమాదకరం. అందుకే మద్యం తాగి డ్రైవింగ్ చేయవద్దు. మద్యం మత్తులో డ్రైవింగ్ సరిగ్గా చేయలేకపోవచ్చు. దీంతో ప్రమాదాలు జరిగే అవకాశాలు ఉన్నాయి. డ్రైవింగ్ చేసేటప్పుడు అనుసరించాల్సిన ముఖ్యమైన భద్రతా చిట్కాలలో ఇదొకటి.
5. రెస్ట్ తీసుకోండి
మీరు సుదూర ప్రాంతాలకు ప్రయాణం చేసేటప్పుడు కారును కాసేపు ఆపి రెస్ట్ తీసుకొండి. ప్రతి రెండు గంటలకు ఒకసారి స్టాప్ ఓవర్(ప్రయాణ విరామం) ఉండేలా ప్లాన్ చేసుకోండి. లేదంటే బాగా అలసిపోతారు. దీని వల్ల కునుకుపాట్లు లాంటివి పడి రోడ్డు ప్రమాదాలు జరిగే అవకాశం ఉంది.
6. ఫాగ్ లైట్స్ను ఆన్ చేయండి
వర్షం, మంచు లేదా పొగమంచు వంటి వాతావరణ పరిస్థితుల్లో డ్రైవింగ్ చేసేటప్పుడు చాలా జాగ్రత్తగా ఉండాలి. ఉదాహరణకు, మీరు డ్రైవింగ్ చేస్తున్న ప్రదేశంలో మంచు లేదా వర్షం కురుస్తుంటే రోడ్డుపై మీ ఫాగ్ లైట్లను ఆన్ చేయండి. అదే సమయంలో నెమ్మదిగా వెళ్తూ మీ ముందు వెళ్తున్న వాహనానికి తగినంత దూరం పాటించండి.
7. ప్రయాణాన్ని ముందే ప్లాన్ చేసుకోండి
ఏదైనా ప్రదేశానికి వెళ్లాలనుకున్నప్పుడు రూట్ను ముందే ప్లాన్ చేసుకోండి. గూగుల్ మ్యాప్స్ వంటి యాప్స్ను మీ ఫోన్ లో ఇన్ స్టాల్ చేసుకోండి. ఇంటర్నెట్ అందుబాటులో లేనప్పుడు కూడా పనిచేసే ఆఫ్‌ లైన్ మ్యాప్లను డౌన్లోడ్ చేసుకోండి.
8. ముందున్న వాహనాన్ని గమనించండి
వాహనాన్ని స్లో చేయాలనుకున్నప్పుడు, లేన్ మారాలనుకున్నప్పుడు మీ ముందు వెళ్తున్న వాహనాన్ని గమనించండి. డ్రైవింగ్ చేసేటప్పుడు అనుసరించాల్సిన ముఖ్యమైన భద్రతా చిట్కాలలో ఇదొకటి.
9. సీటు బెల్ట్ తప్పనిసరిగా పెట్టుకోండి
మీరు కారును డ్రైవ్ చేస్తున్నప్పుడు తప్పనిసరిగా సీటు బెల్ట్ పెట్టుకోంది. ఇలా సీటు బెల్ట్ పెట్టుకోవడం వల్ల అనుకోని ప్రమాదం జరిగినా ప్రాణాపాయం నుంచి తప్పించుకోవచ్చు. అలాగే సీటు బెల్ట్ పెట్టుకోకపోవడం చట్టరీత్యా నేరం అని గుర్తుంచుకోండి. సీటు బెల్ట్ ధరించడం తప్పనిసరి అని గుర్తుంచుకోండి.
10. ఓపికగా ఉండండి
డ్రైవింగ్ చేసినప్పుడు ఓపికగా ఉండండి. గమ్యాన్ని వేగంగా చేరుకోవాలని ఆత్రుతతో కారును అతివేగంగా నడపొద్దు. ఓవర్ స్పీడ్ వల్ల రోడ్డు యాక్సిడెంట్లు అయ్యే అవకాశం ఉంది జాగ్రత్త.
రూ.5 లక్షల్లో మంచి కారు కొనాలా? టాప్-6 మోడల్స్ ఇవే! - Best Cars Under 5 Lakh
