Office Allowances For Salaried People : ఉద్యోగులు తమ శాలరీపై ఆదాయపు పన్ను మినహాయింపులు పొందేందుకు చాలా ప్రయత్నాలు చేస్తుంటారు. ఇందుకోసం అందుబాటులో ఉన్న అన్ని మార్గాలను వాళ్లు వాడేస్తుంటారు. కానీ తాము జాబ్ చేసే ఆఫీసు నుంచి కొన్ని అలవెన్సులను పొందడం ద్వారా ఆదాయపు పన్ను మినహాయింపులను అతికొద్ది మందే పొందుతుంటారు. అయితే ఈ అలవెన్సులను అన్ని కంపెనీలూ అందించవు. ఒకవేళ అవి లభించాలంటే ఉద్యోగంలో చేరేటప్పుడే వాటి గురించి అడగాలి. అలవెన్సులు ఇచ్చేందుకు కంపెనీ అంగీకరిస్తే ఉద్యోగంలో ఉన్నన్ని నాళ్లు ఆర్థిక ప్రయోజనంతో పాటు ఆదాయపు పన్ను మినహాయింపు లభిస్తుంది. సగటు ఉద్యోగుల పొదుపును పెంచేందుకు దోహదం చేసే 10 ఆఫీస్ అలవెన్సుల గురించి ఇప్పుడు తెలుసుకుందాం.
1. లీవ్ ట్రావెల్ అలవెన్సు (ఎల్‌టీఏ)
ఆర్థికంగా బలంగా ఉన్న కంపెనీలన్నీ తమ ఉద్యోగులకు లీవ్ ట్రావెల్ అలవెన్సును అందిస్తుంటాయి. కుటుంబంతో కలిసి దేశంలో ఎక్కడికైనా టూర్‌కు వెళ్లొస్తే ఆ ప్రయాణ ఖర్చుల బిల్లులను కంపెనీకి సమర్పించి ఉద్యోగులు ఎల్‌టీఏ అలవెన్సును అందుకోవచ్చు. దీనిపై ఆదాయపు పన్ను మినహాయింపును ఉద్యోగి పొందొచ్చు.
2. ఇంటి అద్దె భత్యం (హెచ్‌‌ఆర్ఏ)
ఇంటి అద్దెకు సంబంధించిన అలవెన్సును 'హెచ్‌‌ఆర్ఏ' అంటారు. ఉద్యోగి ఇంటి అద్దెలో కొంత భాగాన్ని కంపెనీ ప్రతినెలా చెల్లిస్తుంది. కంపెనీ నుంచి ఉద్యోగికి ఏటా లభించే హెచ్‌‌ఆర్ఏపై ఆదాయపు పన్ను మినహాయింపు లభిస్తుంది.
3. ఆహార భత్యం (ఎఫ్ఏ)
కొన్ని కంపెనీలు తమ ఉద్యోగులకు ఆహార భత్యం కూడా అందిస్తుంటాయి. పలు సంస్థలు తమ ఎంప్లాయీస్‌కు ప్రీపెయిడ్ ఫుడ్ ఓచర్స్‌/కూపన్లు అందిస్తాయి. ఆ ఆహార కూపన్లను వినియోగించినా ఆదాయపు పన్ను మినహాయింపు లభిస్తుంది. అలాంటి ఫుడ్ కూపన్స్‌ను వాడితే ఒక్కో మీల్పై రూ.50 వరకు పన్ను మినహాయింపు ఇస్తారు.
4. ప్రయాణ భత్యం (టీఏ)
ఇంటి నుంచి ఆఫీసుకు, ఆఫీసు నుంచి ఇంటికి ఉద్యోగి చేసే రాకపోకల ఖర్చులను కూడా పలు కంపెనీలు చెల్లిస్తుంటాయి. దీన్నే ట్రావెలింగ్ అలవెన్సు అంటారు. చాలా కంపెనీలు ఈ భత్యాన్ని శాలరీ స్లిప్‌లో చేర్చి చూపిస్తుంటాయి. ఇలాంటి అలవెన్సులపైనా ఆదాయపు పన్ను మినహాయింపులు లభిస్తాయి.
5. విద్యా భత్యం (ఈఏ)
కొన్ని కంపెనీలు తమ ఉద్యోగుల పిల్లల చదువులకు కూడా అలవెన్సును చెల్లిస్తుంటాయి. దీన్నే విద్యా భత్యం అంటారు. ఈ తరహా అలవెన్సుపై ప్రతినెలా రూ.100 లేదా ఏడాదికి రూ.1200 మేర ఆదాయపు పన్ను మినహాయింపు ఉద్యోగి పొందొచ్చు. అయితే గరిష్ఠంగా ఇద్దరి కంటే ఎక్కువ మంది పిల్లలున్న వారు ఈ మినహాయింపునకు అనర్హులు.
6. వైద్య భత్యం (ఎంఏ)
కొన్ని కంపెనీలు తమ ఉద్యోగులకు వైద్య భత్యం చెల్లిస్తుంటాయి. ఎవరైనా ఉద్యోగి తమ కుటుంబీకులకు వైద్య చికిత్సలు చేయించుకుంటే ఆ బిల్లులను కంపెనీలో సమర్పించి రీయింబర్స్‌మెంట్ పొందొచ్చు. ఈ అలవెన్సుపై కూడా ఆదాయపు పన్ను మినహాయింపు లభిస్తుంది.
7. కారు నిర్వహణ భత్యం (సీఎంఏ)
కొన్ని కంపెనీలు తమ ఉన్నతోద్యోగులకు కారు నిర్వహణ భత్యాన్ని కూడా చెల్లిస్తుంటాయి. ఇందులో భాగంగా కారు మెయింటెనెన్స్, డీజిల్ వ్యయం, పెట్రోల్ వ్యయం బిల్లులను కంపెనీలో సమర్పించి ఉద్యోగి రీయింబర్స్‌మెంట్ చేసుకోవచ్చు. ఈ అలవెన్సుపైనా ఎలాంటి పన్ను లేదు.
8. ఫోన్ బిల్ అలవెన్సు (పీబీఆర్)
ఫోన్ బిల్లుకు సంబంధించిన భత్యాన్ని ఉద్యోగులకు కంపెనీలు ఇస్తుంటాయి. ఉద్యోగులకు సంబంధించిన ప్రీపెయిడ్, పోస్ట్ పెయిడ్, ల్యాండ్ లైన్, బ్రాడ్ బ్యాండ్ ఇంటర్నెట్ కనెక్షన్ల బిల్లులను కంపెనీలు రీయింబర్స్ చేస్తుంటాయి. ఈ బిల్లులపై ఎలాంటి పన్ను మోత ఉండదు.
9. గిఫ్ట్ ఓచర్
కొన్ని కంపెనీలు తమ ఉద్యోగులకు కానుకగా గిఫ్ట్ ఓచర్లు లేదా టోకెన్లను అందిస్తుంటాయి. ఏడాదికి రూ.5వేలలోపు విలువ కలిగిన గిఫ్ట్ ఓచర్లు లేదా టోకెన్లపై పన్నులు విధించరు.
10. యూనిఫామ్ అలవెన్సు (యూఏ)
ఉద్యోగి తాను కంపెనీకి ధరించి వచ్చే యూనిఫామ్‌పైనా అలవెన్సును పొందొచ్చు. యూనిఫామ్‌ను కొనేందుకు, నిర్వహించుకునేందుకు ఈ అలవెన్సును ఉద్యోగులు వాడుకోవచ్చు.
