మునగ ఆకులు కోసుకుంటే ఎవ్వరూ వద్దనరు! - చక్కగా "మునగాకు రోటి పచ్చడి" చేసుకోండి! - నోటికి అమృతం, ఆరోగ్యానికి దివ్య ఔషధం! - Munagaku Pachadi Recipe

Munagaku Roti Pachadi : చాలా మంది మునగ కాయలను మాత్రమే తింటారు. కొద్ది మంది మాత్రమే పప్పులో వేసుకుంటారు. కానీ.. మునగ ఆకులతో రోటి పచ్చడి చేస్తే.. అమృతమే అంటే నమ్మాల్సిందే! ఈ పచ్చడి ద్వారా రుచితోపాటు కాల్షియం, ఐరన్, ప్రొటీన్ దండిగా శరీరానికి అందుతాయి. మరి.. ఈ సూపర్ చట్నీ ఎలా తయారు చేయాలో మీకు తెలుసా?

How To Make Munagaku Roti Pachadi : రోటి పచ్చళ్లనగానే మనలో చాలా మందికి టమాటా, దొండకాయ పచ్చళ్లే గుర్తుకొస్తుంటాయి. కానీ.. మునగ ఆకుతోనూ అద్భుతమైన పచ్చడి తయారు చేయొచ్చు. ఇది ఎంతో రుచిగా ఉండడమే కాకుండా.. బాడీకి ఎన్నో విటమిన్లు, పోషకాలు, ఖనిజాలు అందిస్తుంది. అలాగే.. ఈ పచ్చడిని ప్రిపేర్​ చేయడానికి ఎక్కువ సమయం కూడా పట్టదు. చాలా సింపుల్​గా, తక్కువ టైమ్​లోనే ఇంట్లో ఉండే పదార్థాలతో ఈజీగా పచ్చడిని తయారు చేసుకోవచ్చు. మరి ఇంకెందుకు ఆలస్యం? టేస్టీ మునగకాయ రోటి పచ్చడిని ఎలా చేయాలో ఓ లుక్కేయండి!

మునగాకు రోటి పచ్చడికి కావాల్సిన పదార్థాలు :

• మునగాకు- రెండు కప్పులు
• పచ్చిమిర్చి-8
• వెల్లుల్లి రెబ్బలు-8
• పసుపు- చిటికెడు
• ఉప్పు - రుచికి సరిపడా
• నిమ్మకాయ సైజు చింతపండు
• మెంతులు-టీస్పూన్​
• టమాటాలు- 2
• జీలకర్ర-అర స్పూన్

తాళింపు కోసం..

• 2 స్పూన్ల నూనె
• స్పూన్ - ఆవాలు, జీలకర్ర
• ఒక స్పూన్ మినపప్పు
• రెండు ఎండు మిర్చి
• కరివేపాకు

తయారీ విధానం..

• ముందుగా మునగాకులను బాగా శుభ్రంగా కడిగి పక్కన పెట్టుకోవాలి.
• తర్వాత స్టౌ ఆన్​ చేసి పాన్​లో కొద్దిగా ఆయిల్​ వేసి పచ్చిమిర్చిలను వేయించుకోవాలి. వాటిని తీసుకుని పక్కన పెట్టుకోండి. ఇప్పుడు అదే పాన్​లో మునగాకు వేసుకుని పచ్చి వాసన పోయే వరకు రెండు మూడు నిమిషాలు వేయించుకోవాలి.
• మునగాకు వేగిన తర్వాత మెంతులు, జీలకర్ర వేసుకుని కలుపుకోవాలి.
• ఇప్పుడు టమాటా ముక్కలను వేసి కలిపి రెండు నిమిషాలు మూతపెట్టాలి. తర్వాత రుచికి సరిపడా ఉప్పు, పసుపు వేసుకుని కలుపుకోవాలి.
• టమాటాలు కొద్దిగా ఉడికిన తర్వాత స్టౌ ఆఫ్​ చేసి.. చల్లారనివ్వాలి.
• మునగాకు మిశ్రమం పూర్తిగా చల్లారిన తర్వాత వెల్లుల్లి రెబ్బలు, చింతపండు నీటిలో నానబెట్టింది వేసుకోవాలి, అలాగే వేయించిన పచ్చిమిర్చిలను వేసుకుని రోట్లో మెత్తగా రుబ్బుకోవాలి.
• ఇప్పుడు పాన్​లో ఆయిల్​ వేసుకుని ఆవాలు, జీలకర్ర, మినపప్పు, ఎండుమిర్చి వేసుకుని బాగా కలపాలి. అలాగే కరివేపాకు వేసుకుని మనం రుబ్బుకున్న మునగాకు పేస్ట్​ని వేసుకుని బాగా కలుపుకోవాలి. అంతే ఇలా సింపుల్​గా చేసుకుంటే మునగాకు రోటి పచ్చడి మీ ముందు ఉంటుంది.
• ఈ మునగాకు పచ్చడి ఆరోగ్యానికి ఎంతో మంచిది. దీనిని వేడి వేడి అన్నంలోకి చపాతీల్లోకి వేసుకుని తింటే టేస్ట్​ అద్భుతంగా ఉండటంతో పాటు, హెల్త్​ కూడా బాగుంటుంది.
• నచ్చితే మీరు కూడా ఈ సారి ఇంట్లో రోటి పచ్చడిని ట్రై చేయండి!

ఇవి కూడా చదవండి :