25 Paise Reward For Criminal : సాధారణంగా పరారీలో ఉన్న నేరస్థులను పట్టుకునేందుకు రివార్డులు ప్రకటిస్తారు పోలీసులు. అందులో చిన్నాచితకా నేరగాళ్ల గురించి సమాచారం అందించిన వారికి రూ.వేలల్లో రివార్డులు ఇస్తారు. ఇక పేరు మోసిన నేరచరితులకు ఈ రివార్డు రూ.లక్షల్లో ఉంటుంది. దీనికి పూర్తిగా భిన్నంగా ఓ క్రిమినల్పై పావలా(25 పైసలు) రివార్డు ప్రకటించి అందరినీ ఆశ్చర్యపరిచారు రాజస్థాన్ పోలీసులు. అయితే ఆ నేరస్థుడు చిన్నాచితకా నేరాలు చేశాడా- అంటే అదీ కాదు. అతడిపై హత్యాయత్నం, దాడి, ఎస్సీ/ఎస్టీ అట్రాసిటీ చట్టాల కింద కేసులు నమోదయ్యాయి. మరి ఆ నేరస్థుడికి ఇంత తక్కువ రివార్డు ఎందుకు ప్రకటించాల్సి వచ్చింది అనే విషయంపై ఎస్పీ స్పష్టత ఇచ్చారు.
పావలా నేరస్థుడు ఇతడే!
భరత్పుర్ జిల్లా లఖన్పుర్ పోలీస్ స్టేషన్ పరిధిలోని మఈ గ్రామనికి చెందిన ఖుబీ రామ్ జాట్పై(48) హత్యాయత్నం, దాడి, ఎస్సీ/ఎస్టీ అట్రాసిటీ చట్టం ఉల్లంఘన కింద మూడు కేసులు నమోదయ్యాయి. దీనికి సంబంధించి ఖుబీ రామ్కు ఎన్నిసార్లు సమన్లు పంపినా పోలీస్ స్టేషన్కు హాజరు కాలేదు. గత 7-8 నెలలుగా పరారీలో ఉన్నాడు. ఇక లాభం లేదనుకున్న పోలీసులు అతడి కోసం గాలించారు. అయినా ఖుబీ రామ్ ఆచూకీ దొరకలేదు. ఈ నేపథ్యంలో నేరస్థుడిపై రివార్డు ప్రకటించాల్సిందిగా పోలీస్ స్టేషన్ నుంచి సూపరింటెండెంట్ కార్యాలయానికి ప్రతిపాదన వెళ్లింది. దీంతో ఎస్పీ మృదుల్ కచావా నేరస్థుడు ఖుబీ రామ్ జాట్పై 25 పైసలు రివార్డు ప్రకటించారు.
ఎస్పీ క్లారిటీ
తీవ్ర నేరారోపణలు ఉన్న వ్యక్తిపై పావలా రివార్డు ప్రకటించడంపై భరత్పుర్ ఎస్పీ మృదులు కచావా క్లారిటీ ఇచ్చారు. నిబంధనల ప్రకారమే రివార్డు ప్రకటించామని చెప్పారు. ఇది నేరస్థుడిని అవమానించడానికి కాదు అని తెలిపారు. అతడు గత కొన్ని నెలలుగా పరారీలో ఉన్న కారణంగా రివార్డ్ ప్రకటించడం స్టాండర్డ్ ప్రక్రియ అని వెల్లడించారు.
అయితే దీనిపై పోలీసు శాఖలో భిన్నాభిప్రాయాలు వ్యక్తమవుతున్నట్లు సమాచారం. అంతర్గత పోలీసు వర్గాల సమాచారం ప్రకారం- నేరస్థులను తక్కువ చేసి చూపడానికి, వారు కోరుకునే గుర్తింపునకు భంగం కలిగించడానికి ఉద్దేశపూర్వకంగా చేసిన పనిలో భాగమే ఈ ప్రకటన అని తెలుస్తోంది.
