ଗୁରୁ-ଶିଷ୍ୟ ସମ୍ପର୍କ: ଶିକ୍ଷକଙ୍କ ବଦଳିକୁ ନେଇ କାନ୍ଦିଲେ ଛାତ୍ରଛାତ୍ରୀ, ଖାଇଲେନି ମଧ୍ୟାହ୍ନ ଭୋଜନ

କଟକ: ଶିକ୍ଷକଙ୍କ ଅନ୍ୟତ୍ର ବଦଳିକୁ ନେଇ ଭାବବିହ୍ୱଳ ହେଲେ ଛାତ୍ରଛାତ୍ରୀ । "ସାରଙ୍କୁ ଆମ ପାଖକୁ ଫେରାଇ ଦିଅ । ଆମ ସାରଙ୍କୁ ଆମେ ଛାଡିବୁ ନାହିଁ କି ସ୍କୁଲର ମଧ୍ୟାହ୍ନ ଭୋଜନ ଖାଇବୁ ନାହିଁ ।" ଶିକ୍ଷକଙ୍କ ବଦଳି ପରେ ଏମିତି କିଛି କହି ନେହୁରା ହେଉଛନ୍ତି ଛାତ୍ରଛାତ୍ରୀ । କିଏ ଗେଟ୍ ଆଗରେ ଠିଆ ହୋଇ ବାଟ ବନ୍ଦ କରୁଛି ତ ଆଉ କିଏ ଗୋଡ଼କୁ ଧରି କାନ୍ଦୁଛି । ଜଣେ କି ଦୁଇ ଜଣ ନୁହେଁ , ସ୍କୁଲର ସମସ୍ତ ପିଲାଙ୍କ ଆଖିରେ ଲୁହ ଦେଖିବାକୁ ମିଳିଛି । କଟକ ଜିଲ୍ଲା ଆଠଗଡ଼ ବ୍ଲକ ଘଣ୍ଟିଖାଲ ଉଚ୍ଚ ପ୍ରାଥମିକ ବିଦ୍ୟାଳୟରେ ଏଭଳି ଦୃଶ୍ୟ ଦେଖିବାକୁ ମିଳିଛି।

ସୂଚନା ଅନୁସାରେ, ବିଦ୍ୟାଳୟର ଗଣିତ ଶିକ୍ଷକ ସୁକାନ୍ତ କୁମାର ସାହୁଙ୍କର ଅନ୍ୟ ଏକ ବିଦ୍ୟାଳୟକୁ ବଦଳି ହୋଇଛି । ସେ ସ୍କୁଲରୁ ବିଦାୟ ନେଇ ଯିବା ସମୟରେ ଏଭଳି ଭାବ ବିହ୍ୱଳ ଦୃଶ୍ୟ ଦେଖିବାକୁ ମିଳିଛି । ଛାତ୍ରଛାତ୍ରୀମାନେ ଏହାର ପ୍ରତିବାଦ କରି ମଧ୍ୟାହ୍ନ ଭୋଜନ ବର୍ଜନ କରିଛନ୍ତି । ଏଭଳି ଦୃଶ୍ୟ ସମସ୍ତଙ୍କୁ ଯେତିକି ଚକିତ କରିଛି, କୁନି କୁନି ପିଲାଙ୍କ ଏପରି ଆକୁଳ ନିବେଦନ ସେତିକି ଦୁଃଖ ମଧ୍ୟ ଦେଇଛି । 
 

ଇଟିଭି ଭାରତ, କଟକ