ଢେଙ୍କାନାଳ: ଶିକାର ପାଇଁ ଚଳାଇଥିଲେ ଗୁଳି । ଲକ୍ଷ୍ୟଭ୍ରଷ୍ଟ ହୋଇ ବାଜିଲା ଶାଳକ ଦେହରେ । ଚାଲିଗଲା କୁକୁଡା ଫାର୍ମର ମାଲିକଙ୍କ ଜୀବନ । ସମ୍ପର୍କୀୟ ଭିଣୋଇ ଗିରଫ । ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ଢେଙ୍କାନାଳ ଏସପି । ଘଟଣାର ଖୋଳତାଡ ଜାରି ରହିଛି ।
ଭିଣୋଇ ଗୁଳିରେ ଟଳି ପଡିଲେ ଶାଳକ:
ଗତକାଲି ଢେଙ୍କାନାଳ ସଦର ଥାନା ଅନ୍ତର୍ଗତ ଫାସିଗାଁ ଅଞ୍ଚଳରେ ଥିବା ଏହି ଫାର୍ମରେ ଗୁଳିକାଣ୍ଡ ହୋଇଥିଲା । ମୃତକ ଫାର୍ମର ମାଲିକ ୪୮ ବର୍ଷ ବୟସର ଗୋବିନ୍ଦ ଚନ୍ଦ୍ର ନାୟକ । ସ୍ଥାନୀୟ କଳାଙ୍ଗ ଚାକୁଣ୍ଡାନାଳିରେ ଗୋବିନ୍ଦଙ୍କ ଘର । ଗୋବିନ୍ଦଙ୍କ ଛାତି, ପେଟ ଓ ହାତରେ ଏପରି ତିନି ଜାଗାରେ ଗୁଳି ବାଜିଥିଲା । ଗତକାଲି ବିଳମ୍ବିତ ରାତିରେ ଏହି ଗୁଳିକାଣ୍ଡ ଘଟିଥିବା ବେଳେ ମୁର୍ମୁଷ ଅବସ୍ଥାରେ ତାଙ୍କୁ ପରିବାର ପକ୍ଷରୁ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖନାରେ ଭର୍ତ୍ତି କରାଯାଇଥିଲା । ମାତ୍ର ଜିଲ୍ଲା ମୁଖ୍ୟ ଡାକ୍ତର ଖାନାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଖବର ପାଇଁ ପୋଲିସର ତନାଘନା:
ସେପଟେ ଘଟଣା ସ୍ଥଳ ଫାର୍ମକୁ ସଦର ଥାନା ପୋଲିସ ଓ ଟାଉନ ଥାନା ଅଧିକାରୀ ଓ ଖୋଦ ନିଜେ ଢେଙ୍କାନାଳ ଏସପି ଅଭିନବ ସୋନକର ଯାଇ ତନାଘନା କରିଥିଲେ । ଅନୁସନ୍ଧାନୀ କୁକୁର, ପୋଲିସ ଫରେନସିକ ଟିମ ମାଧ୍ୟମରେ ତଦନ୍ତ କରିଥିଲେ । ଘଟଣା ସମୟରେ ଫାର୍ମ ଗୋବିନ୍ଦଙ୍କ ସହିତ ଥିବା ତାଙ୍କ ଦାଦା ପୁଅ ଭାଇ ଅଭିମନ୍ୟୁ ନାୟକଙ୍କୁ ପ୍ରଥମେ ପୋଲିସ ଅଟକ ରଖି ପଚରା ଉଚରା କରିଥିଲା । ମାତ୍ର ତାଙ୍କ ସମ୍ପର୍କୀୟ ଭିଣୋଇ ଫେରାର ହୋଇଯାଇଥିବା ନେଇ ପୋଲିସ ସନ୍ଦେହକୁ ଆସିଥିଲା । ପରେ ତଦନ୍ତ କରି ଅଭିଯୁକ୍ତ ସମ୍ପର୍କୀୟ ଭିଣୋଇକୁ ଗିରଫ କରିଛି ପୋଲିସ ।
ମୃତକଙ୍କ ପତ୍ନୀ ରିତା ଲେଙ୍କା କହିଛନ୍ତି, ଗତରାତିରେ ଗୋବିନ୍ଦ, ଅଭିମନ୍ୟୁ ଓ ସମ୍ପର୍କୀୟ ଭିଣୋଇ ଫାର୍ମରେ ଥିଲେ । ମାତ୍ର ଭୋର ପ୍ରାୟ ୪ଟା ସମୟରେ ଫାର୍ମରେ ଥିବା ଅଭିମନ୍ୟୁ ଫୋନ କରି ଗୋବିନ୍ଦଙ୍କ ଛାତିରେ ଗୁଳି ବାଜି ଯାଇଛି ବୋଲି ତାଙ୍କୁ ଜଣାଇଥିଲେ ।’
ଏହା ମଧ୍ୟ ପଢନ୍ତୁ: ଆପାର୍ଟମେଣ୍ଟ ଲୁଟବେଳେ ଏନକାଉଣ୍ଟର, ପୋଲିସ ଗୁଳିରେ ଲୁଟେରା ଆହତ ସୁନା ଦୋକାନରୁ ଲୁଟ୍ ଘଟଣା, ଆଉ ଜଣେ ଅଭିଯୁକ୍ତ ଗିରଫ ବଡ଼ଧରଣର ଡକାୟତି ଗ୍ୟାଙ୍ଗ ପର୍ଦ୍ଦାଫାସ, ବନ୍ଧୁକ ସହ 4ଟି ଅଫୁଟା ଗୁଳି ଜବତ |
ଭିଣୋଇ ଗୁଳିରେ ଗଲା ଗୋବିନ୍ଦଙ୍କ ଜୀବନ:
ଢେଙ୍କାନାଳ ଏସପି ଅଭିନବ ସୋନକର ସାମ୍ବାଦିକ ସମ୍ମିଳନୀରେ କହିଛନ୍ତି, ‘ଗତକାଲି(ଶନିବାର) ରାତିରେ ମୃତ ଗୋବିନ୍ଦ ଚନ୍ଦ୍ର ନାୟକ ଓ ତାଙ୍କ ସମ୍ପର୍କୀୟ ଭିଣୋଇ ରମେଶ ନାୟକ କୁକୁଡା ଫାର୍ମକୁ ପ୍ରଥମେ ଯାଇଥିଲେ । ସେଠାରୁ ଉଭୟେ ବାହାରି ପଡିଥିଲେ ଶିକାର ପାଇଁ । ତେବେ ଶିକାର ବେଳେ ଗୁଳି ବାଜିଥିଲା ଗୋବିନ୍ଦଙ୍କ ଦେହରେ । ତାଙ୍କ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଛି । ଆମେ ତଦନ୍ତ କରୁଛୁ ।’
ଇଟିଭି ଭାରତ, ଢେଙ୍କାନାଳ
