Ratha Yatra 2023: ରଥକୁ ବିଜେ କଲେ ମଦନମୋହନ ଓ ରାମକୃଷ୍ଣ

ପୁରୀ: ଶ୍ରୀମନ୍ଦିରରୁ ବାହାରି ଆସି ବଡଦାଣ୍ଡରେ ଭକ୍ତଙ୍କୁ ଦର୍ଶନ ଦେଉଛନ୍ତି ଚତୁର୍ଦ୍ଧାମୂର୍ତ୍ତି । ଭକ୍ତ ଓ ଭଗବାନଙ୍କ ହୋଇଛି ଅପୂର୍ବ ମିଳନ।ନୀତି ନିର୍ଘଣ୍ଟ ଅନୁଯାୟୀ ଶେଷ ହୋଇଛି ତିନି ଠାକୁର ଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରାଙ୍କ ପହଣ୍ଡି ବିଜେ ନୀତି। ଧାଡ଼ି ପହଣ୍ଡିରେ ଆସି ରଥାରୂଢ ହୋଇଛନ୍ତି ତିନି ଠାକୁର । ଏହା ପରେ ରଥକୁ ଆସୁଛନ୍ତି ମଦନମୋହନ ଓ ରାମକୃଷ୍ଣ । ନନ୍ଦିଘୋଷ ରଥରେ ବିଜେ କରିବେ ମଦନ ମୋହନ ଓ ବଳଭଦ୍ରଙ୍କ ରଥରେ ବିଜେ କରିବେ ରାମକୃଷ୍ଣ । ବର୍ଷକୁ ଥରେ ରତ୍ନସିଂହାସନରୁ ଓହ୍ଳାଇ ଭକ୍ତଙ୍କୁ ବଡଦାଣ୍ଡରେ ଦର୍ଶନ ଦେବା ସହ ଜନ୍ମବେଦୀକୁ ନବଦିନାତ୍ମକ ଯାତ୍ରାରେ ଯିବେ ମହାବାହୁ । ରଥଯାତ୍ରା ପାଇଁ ଘଣ୍ଟ କାହାଳୀରେ ଦୁଲୁକୁଛି ବଡଦାଣ୍ଡ । ବଡ଼ଦାଣ୍ଡରେ ନୃତ୍ୟ ପରିବେଷଣ କରୁଛନ୍ତି ନୃତ୍ୟଶିଳ୍ପୀ । ଆଉ ମାତ୍ର କିଛି ସମୟର ଅପେକ୍ଷା । ରଥରେ ପୂଜାର୍ଚ୍ଚନା ପରେ ଅପରାହ୍ନରେ ଆରମ୍ଭ ହେବା ରଥଟଣା ।

ଇଟିଭି ଭାରତ, ପୁରୀ