ଭୁବନେଶ୍ବର: ଘରୋଇ ବିଶ୍ବ ବିଦ୍ୟାଳୟରେ ନେପାଳୀ ଛାତ୍ରୀଙ୍କ ମୃତ୍ୟୁ ଘଟଣା ଓ ବିଶ୍ବବିଦ୍ୟାଳୟରୁ ନେପାଳ ଛାତ୍ରଛାତ୍ରୀଙ୍କୁ ବିଦା କରିବା ଘଟଣାରେ ହସ୍ତକ୍ଷେପ କଲେ ରାଜ୍ୟ ସରକାର । ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କୁ ଘଟଣା ବାବଦରେ ସବିଶେଷ ରିପୋର୍ଟ ମାଗିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସେପଟେ ମୁଖ୍ୟମନ୍ତ୍ରୀଙ୍କୁ ବିଧାନସଭାରେ ଭେଟିଛନ୍ତି ଭୁବନେଶ୍ୱର ଡିସିପି ପିନାକ ମିଶ୍ର । ମୁଖ୍ୟମନ୍ତ୍ରୀଙ୍କୁ ଘଟଣା ବାବଦରେ ଡ଼ିସିପି ଅବଗତ କରିବା ସହ ମାମଲାରେ କାର୍ଯ୍ୟାନୁଷ୍ଠାନ ବାବଦରେ ମଧ୍ୟ ସୂଚନା ଦେଇଥିବା ଜଣାପଡିଛି । ଅନ୍ୟପଟେ ସାଇନ ଡାଏ ନିଷ୍ପତ୍ତିକୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଫେରାଇ ନେଇଛନ୍ତି । ନେପାଳ ଛାତ୍ରଛାତ୍ରୀଙ୍କୁ ରାଜ୍ୟ ସରକାରଙ୍କ ଓଏସଆରଟିସି ବସ ବ୍ୟବସ୍ଥା କରି ଫେରାଇ ଆଣିବା ଲାଗି ବ୍ୟବସ୍ଥା ହୋଇଛି । କଲେଜ ପକ୍ଷରୁ ଛାତ୍ରଛାତ୍ରୀଙ୍କୁ ଫେରି ଆସିବାକୁ ନିବେଦନ କରାଯାଇଛି ।
'ଆମେ ଏହି ଘଟଣାକୁ ଗୁରୁତର ସହ ନେଇଛୁ':
ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୁରଜ କରିଛନ୍ତି, "ନେପାଳ ସହିତ ଭାରତର ସମ୍ପର୍କ ଅତ୍ୟନ୍ତ ଗଭୀର ରହି ଆସିଛି । ନେପାଳ ସହ ଓଡିଶାର ସମ୍ପର୍କ ଦୀର୍ଘ ବର୍ଷରୁ ରହିଆସିଛି । ପ୍ରଭୁ ଜଗନ୍ନାଥ ଆଧାର ସାଜିଛନ୍ତି । ଘରୋଇ ବିଶ୍ବ ବିଦ୍ୟାଳୟରେ ଘଟିଥିବା ଘଟଣା ଅତ୍ୟନ୍ତ ଦୁଃଖଦ । ପରିବାର ପ୍ରତି ସମବେଦନା ଜ୍ଞାପନ କରୁଛୁ । ଘଟଣା ପରେ ରାଜ୍ୟ ସରକାରଙ୍କ ଗୃହ ବିଭାଗ ତ୍ୱରିତ ପଦକ୍ଷେପ ନେଇଛି । ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି । ମୃତକଙ୍କ ଲ୍ୟାପଟପ, ନୋଟ, ମୋବାଇଲ ଜବତ କରାଯାଇଛି । ବିଶ୍ବବିଦ୍ୟାଳୟରେ ଏକ କାର୍ଯ୍ୟକ୍ରମ ଚାଲିଥିବା ସମୟରେ ପାଖାପାଖି 1000 ନେପାଳି ଛାତ୍ରଛାତ୍ରୀ ଆନ୍ଦୋଳନକୁ ଓହ୍ଲାଇ ଥିଲେ । ପୋଲିସ ସେଠାରେ ପହଞ୍ଚି ଛାତ୍ରଛାତ୍ରୀଙ୍କୁ ବୁଝାସୁଝା କରିଛି । ସମ୍ବେଦନଶୀଳ ଭାବେ ଘଟଣାକୁ ଆମେ ଗୁରୁତର ସହ ନେଇଛୁ । ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଓ ବୈଦେଶିକ ବ୍ୟାପାର ବିଭାଗ ସହ ଆମେ ଯୋଗାଯୋଗରେ ଅଛୁ । ନିରପେକ୍ଷ ତଦନ୍ତ ହେଉଛି । ଘଟଣା ବାବଦରେ ଅବଗତ କରିବାକୁ ମୁଖ୍ୟମନ୍ତ୍ରୀ ମୋତେ ନିର୍ଦ୍ଦେଶ ଦେଇଛନ୍ତି । ଦୋଷୀ ନିଶ୍ଚୟ ଦଣ୍ଡିତ ହେବ । ଜଣେ ଗିରଫ ହୋଇଛନ୍ତି । ଯଦି ଅନ୍ୟ କେହି ସାମିଲ ଥିବେ ତାଙ୍କୁ ଧରିବାକୁ ଗୁରୁତ୍ୱ ଦିଆଯିବ ।"
ସାଇନ ଡାଏ ନିଷ୍ପତ୍ତିକୁ ଫେରାଇଲେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ:
ଉଚ୍ଚଶିକ୍ଷା ମନ୍ତ୍ରୀ ଆହୁରି ମଧ୍ୟ କହିଛନ୍ତି, "କଟକ ରେଳ ଷ୍ଟେସନରେ ମଧ୍ୟ ଅଭାବନୀୟ ଘଟଣା ଘଟିଛି । କଲେଜରେ ସାଇନ ଡାଏ କରାଗଲା ବୋଲି କହି ନେପାଳ ଛାତ୍ରଙ୍କୁ ବାହାର କରିଦିଆଯାଇଛି । ଏହାକୁ ରାଜ୍ୟ ସରକାର ଗୁରୁତର ସହ ନେଇଛନ୍ତି । ରାଜ୍ୟ ସରକାର ହସ୍ତକ୍ଷେପ କରିବା ପରେ ସାଇନ ଡାଏ ନିଷ୍ପତ୍ତିକୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଫେରାଇ ନେଇଛନ୍ତି । ନେପାଳ ଛାତ୍ରଛାତ୍ରୀଙ୍କୁ ରାଜ୍ୟ ସରକାରଙ୍କ ଓଏସଆରଟିସି ବସ ବ୍ୟବସ୍ଥା କରି ଫେରାଇ ଆଣିବା ଲାଗି ବ୍ୟବସ୍ଥା ହୋଇଛି । ନେପାଳ ଛାତ୍ରଛାତ୍ରୀଙ୍କୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ପ୍ରକାର ମାନସିକ ନିର୍ଯାତନା, ଧମକ ଚମକ ନମିଳିବ ସରକାର ନଜର ରଖିବେ । ଓଡିଶା-ନେପାଳ ମଧ୍ୟରେ ସୁସମ୍ପର୍କ ବଜାୟ ରଖିବା ଲାଗି ବ୍ୟବସ୍ଥା କରୁଛୁ । ବେସରକାରୀ ବିଶ୍ୱବିଦ୍ୟାଳୟ ଉପରେ ସରକାରଙ୍କର ବିଶେଷ କର୍ତ୍ତୃତ୍ୱ ନଥିଲେ ମଧ୍ୟ ଏହି ସ୍ପର୍ଶକାତର ଘଟଣାରେ ରାଜ୍ୟ ସରକାର ନିରପେକ୍ଷତାର ସହ ବିଚାର କରିବେ ।
On the incident at KIIT University, Nepal PM KP Sharma Oli posts on social media, says " it has come to our attention through media and social media that a nepali student has died in the hostel of kalinga institute of industrial technology (kiit) university in odisha and that… pic.twitter.com/pUuaI96KDt
— ANI (@ANI) February 17, 2025
ଏହି ଘଟଣାରେ ନେପାଳ ପ୍ରଧାନମନ୍ତ୍ରୀଙ୍କ ଉଦବେଗ:
ସୋସିଆଲ ମିଡିଆରେ ନେପାଳ ପ୍ରଧାନମନ୍ତ୍ରୀ କେପି ଶର୍ମା ଓଲି କହିଛନ୍ତି, ''ଓଡ଼ିଶାରେ ଥିବା ଏକ ଘରୋଇ ବିଶ୍ୱବିଦ୍ୟାଳୟର ଏକ ହଷ୍ଟେଲରେ ଜଣେ ନେପାଳୀ ଛାତ୍ରୀଙ୍କ ମୃତ୍ୟୁ ଏବଂ ହଷ୍ଟେଲରୁ ନେପାଳୀ ଛାତ୍ରମାନଙ୍କୁ ଜୋରଜବରଦସ୍ତ ବାହାର କରାଯିବା ଘଟଣା ଗଣମାଧ୍ୟମ ଓ ସାମାଜିକ ଗଣମାଧ୍ୟମରେ ପ୍ରକାଶ ପାଇଛି । ଏହି ପ୍ରସଙ୍ଗରେ ଆମ ସରକାର କୂଟନୈତିକ ଆଧାରରେ କାମ କରୁଛନ୍ତି ଏବଂ ଯୋଗାଯୋଗରେ ଅଛନ୍ତି ।''
Embassy of India, Kathmandu, is deeply saddened by the tragic death of a Nepali student at the Kalinga Institute of Industrial Technology (KIIT) in Bhubaneswar, Odisha. The Embassy extends its heartfelt condolences to the family of the deceased during this difficult time. The… pic.twitter.com/wAkRl2NMRQ
— ANI (@ANI) February 17, 2025
ଦୁଃଖ ପ୍ରକାଶ କଲା ଭାରତୀୟ ଦୂତାବାସ:
ଏହି ଘଟଣାରେ ନେପାଳ କାଣ୍ଡମାଣ୍ଡୁରେ ଥିବା ଭାରତୀୟ ଦୂତାବାସ ଦୁଃଖ ପ୍ରକାଶ କରିଛି । ଏକ ନୋଟରେ କୁହାଯାଇଛି ଯେ, ଏପରି ଦୁଃଖଦ ସମୟରେ ଦୂତାବାସ ମୃତକଙ୍କ ପରିବାର ପ୍ରତି ଗଭୀର ସମବେଦନା ଜଣାଉଛି । ବିଶ୍ବବିଦ୍ୟାଳୟରେ କର୍ତ୍ତୃପକ୍ଷ ଏବଂ ଓଡ଼ିଶା ରାଜ୍ୟ ସରକାରଙ୍କ ସହିତ ଆମେ ଯୋଗାଯୋଗରେ ଅଛୁ । ସ୍ଥାନୀୟ କର୍ତ୍ତୃପକ୍ଷ ଏହି ଦୁର୍ଭାଗ୍ୟଜନକ ଘଟଣାର ତଦନ୍ତ ଆରମ୍ଭ ହୋଇଥିବା ଦୂତାବାସକୁ ସୂଚନା ଦିଆଯାଇଛି । କଲେଜ ପକ୍ଷରୁ ନେପାଳ ଛାତ୍ରଙ୍କୁ ଫେରି ଆସିବାକୁ ନିବେଦନ କରାଯାଇଛି । ''
ଜବରଦସ୍ତି ବାହାର କରିଦେଲେ କଲେଜରୁ:
ଭୁବନେଶ୍ଵରର ରେଳ ଷ୍ଟେସନରେ ଅପେକ୍ଷା କରିଥିବା ଘରୋଇ କଲେଜର ନେପାଳ ଛାତ୍ରଛାତ୍ରୀ କହିଛନ୍ତି ଯେ, ଆମକୁ ଜବରଦସ୍ତି କଲେଜରୁ ବାହାର କରିଦେଇଛନ୍ତି । ଯେଉଁ ଛାତ୍ରୀ ଜଣଙ୍କ ଜୀବନ ହାରିଛି ସେ କିଛି ଦିନ ପୂର୍ବରୁ ଅଭିଯୋଗ ମଧ୍ୟ କରିଥିଲା । ଯାହା ଫଳରେ କୌଣସି କିଛି ଆକ୍ସନ ନିଆଯାଇନଥିଲା । ଗତକାଲି ଛାତ୍ରୀ ଜଣଙ୍କ ଜୀବନ ହାରିଥିଲେ। ଏହି ଘଟଣାକୁ ନେଇ ଯେତେବେଳେ ସମସ୍ତ ନ୍ୟାୟ ପାଇଁ ଯାଇଥିଲୁ ସେଠାରେ କିଛି ଷ୍ଟାପ୍ ଖରାପ ବ୍ୟବହାର କରିବାକୁ ଲାଗିଥିଲେ। ଏପରିକି ମାଡ ମଧ୍ୟ ମାରିଥିଲେ । ଏପରିକି ବର୍ତ୍ତମାନ କେଉଁଆଡେ ଯିବେ କଣ କାରିବେ କିଛି ଜାଣିନାହାନ୍ତି ଛାତ୍ର ଛାତ୍ରୀମାନେ ବୋଲି କହିଛନ୍ତି ଜଣେ ନେପାଳ ଛାତ୍ରଛାତ୍ରୀ ।
ନେପାଳ ଛାତ୍ର ସତିଶ କହିଛନ୍ତି, ‘ଛାତ୍ରୀଙ୍କ ମୃତ୍ଯୁ ଘଟଣାକୁ ନେଇ ଯେତେବେଳେ ପ୍ରୋଟେଷ୍ଟ୍ କରାଗଲା ଆମକୁ ମାଡ ମାରିଥିଲେ। ଏପରିକି ସୁରକ୍ଷା କର୍ମୀ ମାନେ ପିଲାଙ୍କୁ ମାଡ ମାରିବା ସହ କହିଥିଲେ ତୁମେ ଏଠୁ ପଳାଓ । କଲେଜ ପକ୍ଷରୁ ତୁରନ୍ତ ସମସ୍ତ ପିଲାଙ୍କୁ କଲେଜ ଛାଡ଼ିବା ପାଇଁ ନୋଟିସ ଦିଆଯାଇଥିଲା ।’
ରେଳ ଷ୍ଟେସନରେ ପଡ଼ି ରହିଛନ୍ତି ଛାତ୍ରଛାତ୍ରୀ:
କଲେଜ ବିଦା କରିବା ପରେ କେଉଁ ଆଡେ ଯିବେ ଛାତ୍ରଛାତ୍ରୀ ଭୟଭୀତ ଅଛନ୍ତି । କିଛି ଛାତ୍ର ଛାତ୍ରୀଙ୍କୁ ବସ୍ ଯୋଗେ ରେଳ ଷ୍ଟେସନରେ ଛାଡି ଦିଆଯାଇଛି । ସେମାନେ ସକାଳୁ ସେଠାରେ ରହିଛନ୍ତି । କେଉଁ ଟ୍ରେନରେ ଯିବେ, କଣ ଖାଇବେ ସେନେଇ ଭୟରେ ରହିଛନ୍ତି । ଏପଟେ ଟିକେଟ ମିଳୁନଥିବାରୁ ଆହୁରି ଭୟ ବଢ଼ାଇଛି । ଏପଟେ ଭୁବନେଶ୍ବର ରେଳ ଷ୍ଟେସନରେ ପାଖାପାଖି ୩୦୦ରୁ ଅଧିକ ପିଲାମାନେ ଟ୍ରେନକୁ ଅପେକ୍ଷା କରିଛନ୍ତି। ସମସ୍ତଙ୍କ ମନରେ ଭୟ ଭାରି ରହିଛି ।
ଘରୋଇ ବିଶ୍ବବିଦ୍ୟାଳୟ ରେଜିଷ୍ଟାରଙ୍କ ଦୁଃଖ ପ୍ରକାଶ:-
ଏପଟେ ଘରୋଇ ବିଶ୍ଵବିଦ୍ୟାଳୟର ରେଜିଷ୍ଟାର ଜ୍ଞାନ ରଞ୍ଜନ ମହାନ୍ତି କହିଛନ୍ତି ଯେ, ବିଟେକ ତୃତୀୟ ବର୍ଷର ଛାତ୍ରୀ ଜୀବନ ହାରିଛି । ଯାହା ସମସ୍ତଙ୍କ ପାଇଁ ଦୁଃଖର ବିଷୟ ଅଟେ । ବିଟେକର ଜଣେ ଯୁବକଙ୍କ ସହ ପ୍ରେମ ସମ୍ପର୍କ ରହିଥିଲା । କିଛି କଥାକୁ ନେଇ ଛାତ୍ରୀ ଜଣଙ୍କ ଡିପ୍ରେସରେ ରହିଥିଲେ ଯାହା ଫଳରେ ଜୀବନ ହାରିଛନ୍ତି । ଏନେଇ ସମସ୍ତ ନେପାଳର ଛାତ୍ରଛାତ୍ରୀ ମାନେ ଦୁଃଖ ପ୍ରକାଶ କରିବା ସହିତ ସେମାନଙ୍କୁ ସମସ୍ତଙ୍କୁ ଘରକୁ ପଠାଇ ଦିଆଯାଇଛି । ''
ଇଟିଭି ଭାରତ, ଭୁବନେଶ୍ବର
