ଭୁବନେଶ୍ୱର: ଉପସ୍ଥାପନ ହୋଇଛି ୯୦ତମ ରାଜ୍ୟ ବଜେଟ । 2025-26 ଆର୍ଥିକ ବର୍ଷ ପାଇଁ 2 ଲକ୍ଷ 90 ହଜାର କୋଟି ଟଙ୍କାର ବ୍ୟୟ ବରାଦ ଆଗତ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୁଖ୍ୟମନ୍ତ୍ରୀଙ୍କ ବଜେଟ ଘୋଷଣା ପରେ ସାମ୍ନାକୁ ଆସିଛି ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତିକ୍ରିୟା । ଡବଲ ଇଞ୍ଜିନ ସରକାରରେ ଅର୍ଥନୈତିକ ଅଭିବୃଦ୍ଧି ହ୍ରାସ ପାଉଛି ବୋଲି ନବୀନ କହିଛନ୍ତି ।
'ଡବଲ ଇଞ୍ଜିନ ସରକାରରେ ଅର୍ଥନୈତିକ ଅଭିବୃଦ୍ଧି ହ୍ରାସ ପାଉଛି':
ବିରୋଧୀ ଦଳ ନେତା ନବୀନ ପଟ୍ଟନାୟକ କହିଛନ୍ତି, "ଡବଲ ଇଞ୍ଜିନ ସରକାରରେ ଅର୍ଥନୈତିକ ଅଭିବୃଦ୍ଧି ହ୍ରାସ ପାଉଛି । ଶିଳ୍ପ ଅଭିବୃଦ୍ଧି ମଧ୍ୟ ହ୍ରାସ ପାଉଛି । ରିଭର୍ସ ଗିୟରରେ ଡବଲ ଇଞ୍ଜିନ ସରକାର । ଡବଲ ଇଞ୍ଜିନ ସରକାରରେ ବିକାଶ ବିପରୀତ ଦିଗରେ ଯାଉଥିବା ଦେଖାଯାଉଛି । ରାଜ୍ୟରେ କୌଣସି ଉନ୍ନୟନମୂଳକ କାର୍ଯ୍ୟ ଚାଲୁ ନାହିଁ । ସବୁ ଠପ ହୋଇ ପଡିଛି । ରାଜ୍ୟର ସବୁ ବର୍ଗର ଲୋକ ପ୍ରଭାବିତ ହୋଇଛନ୍ତି । ବିଶେଷ କରି ଚାଷୀ, ମୂଲିଆ ଓ ଗରିବ ଲୋକ ହଇରାଣରେ ପଡିଛନ୍ତି । ସେମାନେ ଆତ୍ମହତ୍ୟା ମଧ୍ୟ କରୁଛନ୍ତି । ଦରଦାମ ବୃଦ୍ଧି ଯୋଗୁଁ ସାଧାରଣ ଲୋକ ପ୍ରଭାବିତ ହୋଇଛନ୍ତି । ବେକାରୀ ସମସ୍ୟା ବୃଦ୍ଧି ପାଇବାରେ ଲାଗିଛି ।"
'ଟଙ୍କା ଘୋଷଣା କରିବା ବଡ଼ କଥା ନୁହେଁ, କାର୍ଯ୍ୟକାରୀ କରିବା ଦରକାର':
ସେ ଆଉ ମଧ୍ୟ କହିଛନ୍ତି, "ଗତ ବଜେଟର ଅନେକ ଅନୁଦାନ ଏଯାଏଁ ଖର୍ଚ୍ଚ ହୋଇପାରିନାହିଁ । ଶିଳ୍ପ ବିକାଶ ସହ ଅର୍ଥନୀତି ଖସୁଛି । ଅତ୍ୟାବଶକୀୟ ସାମଗ୍ରୀର ଦରଦାମ ବୃଦ୍ଧି ସମସ୍ତଙ୍କୁ ପ୍ରଭାବିତ କରୁଛି । ଚାଷୀ ହଇରାଣ, ମହିଳାମାନେ ମିଶନ ଶକ୍ତିରେ କାମ ପାଉନାହାନ୍ତି । ବେରୋଜଗାରୀ ବଢୁଛି । ବଜେଟରେ ଏତେ ଟଙ୍କା ଘୋଷଣା କରିବା ବଡ଼ କଥା ନୁହେଁ, ଏହା କାର୍ଯ୍ୟକାରୀ କରିବା ଦରକାର । ଯାହା ଆମ ରାଜ୍ୟର ବିକାଶରେ କାମ ଆସିବ । ଏହି ବଜେଟ ଖର୍ଚ୍ଚ ହେବା ଦରକାର । ଆମେ ଏହା ଉପରେ ନଜର ରଖିବୁ ।
ଇଟିଭି ଭାରତ, ଭୁବନେଶ୍ୱର
