ନୂଆବର୍ଷରେ ପାଇଁ ବୌଦ୍ଧରେ ପର୍ଯ୍ୟଟକଙ୍କ ଭିଡ, ପିକନିକ ସ୍ପଟର ବିକାଶ ପାଇଁ 'ଅକ୍ସି ଟୁରିଜିମ'

Tourist Places In Boudh:

ବୌଦ୍ଧ:  ପର୍ଯ୍ୟଟକଙ୍କୁ ଆକୃଷ୍ଟ କରୁଛି ଜିଲ୍ଲାର ପ୍ରାକୃତିକ ସୌନ୍ଦର୍ଯ୍ୟ । ବିଶେଷ ଭାବରେ ବଣଭୋଜି ପାଇଁ ବୌଦ୍ଧ ଜିଲ୍ଲା ସୀମାନ୍ତରେ ଥିବା ବାଘନଦୀ ଶଯ୍ୟାରେ ଶହ ଶହ ପର୍ଯ୍ୟଟକଙ୍କ ଭିଡ଼ ଜମୁଛି । ନୂଆ ବର୍ଷ ଆସୁଥିବାରୁ ବିଭିନ୍ନ ସ୍ଥାନରେ ଚାଲିଛି ବଣଭୋଜି । ଶୀତୁଆ ସକାଳର କୁହୁଡିଆ ପରିବେଶ ମଧ୍ୟରେ ପ୍ରକୃତିର ଅବର୍ଣ୍ଣନୀୟ ସୌନ୍ଦର୍ଯ୍ୟ ମଧ୍ୟରେ ବଣଭୋଜିର ନିଆରା ଅନୁଭୂତି ନେଉଛନ୍ତି ପର୍ଯ୍ୟଟକ । ଶୀତଳପାଣି, କୁମ୍ଭିଦରହ, ରାମଗଡ଼, ମର୍ଜାକୁଦ, ତାମ୍ବିଦରହ, ନନ୍ଦନବନ, ଡମ୍ବରୁଗଡ, ନାଏକପଡା, ଖରଖରି, ନୂଆପଡ଼ା ଗିରାସିଙ୍ଗା, ରେଘାମୁଣ୍ଡା, ଲତାଝରଣ ଭଳି ସୌନ୍ଦର୍ଯ୍ୟରେ ଭରପୂର ଅଞ୍ଚଳ ବର୍ତ୍ତମାନ ପର୍ଯ୍ୟଟକଙ୍କୁ ଆକୃଷ୍ଟ କରୁଛି ।

ସେହିପରି ସଦର ବ୍ଲକ ଶଗଡ଼ା ପଞ୍ଚାୟତ ଅନ୍ତର୍ଗତ ବାଘନଦୀର ଖଣ୍ଡିକନପାର ନଦୀ ଶଯ୍ୟା ବର୍ତ୍ତମାନ ପ୍ରକୃତି ପ୍ରେମୀ ଓ ପର୍ଯ୍ୟଟକମାନଙ୍କ ପ୍ରଥମ ପସନ୍ଦ ପାଲଟିଛି । ଜିଲ୍ଲା ସମେତ ରାଜ୍ୟ ତଥା ଦେଶର ବିଭିନ୍ନ ଅଞ୍ଚଳର ପର୍ଯ୍ୟଟକମାନେ ପ୍ରତ୍ୟେକ ଦିନ ଏଠାକୁ ବଣଭୋଜି ପାଇଁ ଛୁଟି ଆସୁଛନ୍ତି । ଏଠାରେ ଥିବା ଏକ ଅସ୍ଥାୟୀ କାଠ ପୋଲ ସମସ୍ତଙ୍କ ଆକର୍ଷଣର କେନ୍ଦ୍ର ବିନ୍ଦୁ ହୋଇଥିବାବେଳେ ବାଘନଦୀର ଅପର ପାର୍ଶ୍ୱରେ ଥିବା ଶୈବପୀଠ ଗୁପ୍ତେଶ୍ୱର ମହାଦେବଙ୍କ ଦର୍ଶନ ପାଇଁ ଭକ୍ତଙ୍କ ଭିଡ଼ ପରିଲକ୍ଷିତ ହୋଇଥାଏ । ଏହି ପିକ୍‌ନିକ୍‌ ସ୍ପଟ୍‌ର ବିକାଶ ପାଇଁ ଜିଲ୍ଲା ପ୍ରଶାସନ ପକ୍ଷରୁ 'ଅକ୍ସି ଟୁରିଜିମ୍‌' ମାଧ୍ୟମରେ କାର୍ଯ୍ୟ କରୁଛି ।

ଇଟିଭି ଭାରତ, ବୌଦ୍ଧ