୭ରେ ଚଳଚ୍ଚିତ୍ର ଜଗତ ପ୍ରତିଭା ସମ୍ମାନ ଉତ୍ସବ, ସମ୍ମାନିତ ହେବେ ବରିଷ୍ଠ କଳାକାର

Pratibha Sanman 2023: କଟକ: ଆସନ୍ତା ୭ ତାରିଖରେ ଅନୁଷ୍ଠିତ ହେବାକୁ ଯାଉଛି "ଚଳଚ୍ଚିତ୍ର ଜଗତ"ର ୪୮ତମ ବାର୍ଷିକ ଉତ୍ସବ ଓ ଚଳଚ୍ଚିତ୍ର ଜଗତ ପ୍ରତିଭା ସମ୍ମାନ-୨୦୨୩ ।  ଏନେଇ ଆଜି ଆୟୋଜକଙ୍କ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା । ଏଥିରେ କାର୍ଯ୍ୟକ୍ରମ ନେଇ ସମ୍ପୂର୍ଣ୍ଣ ବିବରଣୀ ଦିଆଯାଇଥିଲା । ତେବେ ଏହି କାର୍ଯ୍ୟକ୍ରମ କଟକ ସାରଳା ଭବନଠାରେ ଅନୁଷ୍ଠିତ ହେବ । ୨୦୨୩ ମସିହାରେ ମୁକ୍ତିଲାଭ କରିଥିବା ଚଳଚ୍ଚିତ୍ରଗୁଡିକରେ ବିଭିନ୍ନ କ୍ଷେତ୍ରରେ ଶ୍ରେଷ୍ଠ ବିବେଚିତ ୨୫ ଜଣ କଳାକାର ଓ ଟେକ୍ନିସିଆନଙ୍କୁ ଏହି ସମାରୋହରେ "ଚଳଚ୍ଚିତ୍ର ଜଗତ ପ୍ରତିଭା ସମ୍ମାନ-୨୦୨୩" ପ୍ରଦାନ କରାଯିବ । ଏଥିସହିତ ଶିକ୍ଷା, ସ୍ବାସ୍ଥ୍ୟ, ସାହିତ୍ୟ, କୃଷି, ବିଜ୍ଞାନ ଆଦି ବିଭିନ୍ନ କ୍ଷେତ୍ରରେ ଉତ୍କର୍ଷତା ଲାଭ କରିଥିବା ୧୦ ଜଣ ପ୍ରତିଭାବାନ ବ୍ୟକ୍ତିବିଶେଷଙ୍କୁ ସ୍ବତନ୍ତ୍ର ଭାବରେ ସମ୍ମାନିତ କରାଯିବ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି । 

ଏହି କାର୍ଯ୍ୟକ୍ରମରେ ବରିଷ୍ଠ ଅଭିନେତ୍ରୀ ସରସ୍ବତୀ ଦେବୀଙ୍କୁ "ନିତାଇ ପାଲିତ" ସମ୍ମାନ ଓ ବିଶିଷ୍ଟ ନାଟ୍ୟକାର ପ୍ରମୋଦ ରଞ୍ଜନ ମହାନ୍ତିଙ୍କୁ "ଭୀମ ସିଂ ସ୍ମାରକୀ ସମ୍ମାନ" ପ୍ରଦାନ କରାଯିବ ବୋଲି ଆୟୋଜକ ସୂଚନା ଦେଇଛନ୍ତି । ସମ୍ମାନିତ ହେବାକୁ ଥିବା ସମସ୍ତ ପ୍ରତିଭାଙ୍କୁ ୧୦ ହଜାର ଟଙ୍କାର ପୁରସ୍କାର ରାଶି ପ୍ରଦାନ କରାଯିବ । ଏହି ସାମ୍ବାଦିକ ସମ୍ମିଳନୀରେ ଚଳଚ୍ଚିତ୍ର ଜଗତର ସମ୍ପାଦକ ଆଦିକନ୍ଦ ରାଉତ, ଡକ୍ଟର ଶକ୍ତି ପ୍ରସାଦ ଦାସ, ଡକ୍ଟର ଅଜିତ୍ ଜେନା, ବିଜୟ ମଲ୍ଲ ପ୍ରମୁଖ ବ୍ୟକ୍ତିବିଶେଷ ଉପସ୍ଥିତ ଥିଲେ ।

ଏହା ମଧ୍ୟ ପଢନ୍ତୁ: ଜୟଦେବ ଗୌରବ ସମ୍ମାନ ଉଦଯାପିତ: ଡାଏଲଗରେ ଦିୱାନା କଲେ ଅଭିନେତା ସୁନୀଲ ଶେଟ୍ଟୀ, ରଙ୍ଗାରଙ୍ଗ କାର୍ଯ୍ୟକ୍ରମରେ ଝୁମିଲେ ଦର୍ଶକ

ଇଟିଭି ଭାରତ, କଟକ