ସରିଲା ନାମାଙ୍କନ ପତ୍ର ଯାଞ୍ଚ, ଆସିଲା ପ୍ରାର୍ଥୀ ତାଲିକା - Nomination Verification

Nomination verification Completed in Bhubaneswar: ଖୋର୍ଦ୍ଧା: 2024 ସାଧାରଣ ନିର୍ବାଚନରେ ଭୁବନେଶ୍ୱର ଲୋକସଭା କ୍ଷେତ୍ର ପାଇଁ ପ୍ରାର୍ଥୀମାନଙ୍କ ନାମାଙ୍କନ ପତ୍ର ଯାଞ୍ଚ କାର୍ଯ୍ୟ ସାରିଛି । 6 ତାରିଖ ପର୍ଯ୍ୟନ୍ତ ବିଭିନ୍ନ ଦଳୀୟ ଏବଂ ସ୍ୱାଧୀନ ପ୍ରାର୍ଥୀମାନେ ଖୋର୍ଦ୍ଧା ଜିଲ୍ଲାପାଳଙ୍କ ନିକଟରେ ନାମାଙ୍କନ ପତ୍ର ଦାଖଲ କରିଥିଲେ । ଆଜି ଯାଞ୍ଚ ସମୟରେ ମୋଟ 23 ଜଣ ପ୍ରାର୍ଥୀ ଭୁବନେଶ୍ୱର ସଂସଦୀୟ କ୍ଷେତ୍ର ପାଇଁ ନାମାଙ୍କନ ଦାଖଲ କରିଥିବା ଜଣାପଡିଥିଲା । ସେଥି ମଧ୍ୟରୁ ନାମାଙ୍କନ ସମୟରେ ପ୍ରମାଣପତ୍ର ଅଭାବରୁ ଛଅ ଜଣ ପ୍ରାର୍ଥୀଙ୍କର ନାମାଙ୍କନ ପତ୍ର ବାଦ ପଡ଼ିଥିବା ବେଳେ ଆଜି ଯାଞ୍ଚ ସମୟରେ ଆଉ ପାଞ୍ଚ ଜଣ ପ୍ରାର୍ଥୀ ଅବୈଧ ଘୋଷିତ ହୋଇଛନ୍ତି । ତେଣୁ ଚଳିତ ସାଧାରଣ ନିର୍ବାଚନରେ ଭୁବନେଶ୍ୱର ସଂସଦୀୟ କ୍ଷେତ୍ରରେ ମୋଟ 12ଜଣ ପ୍ରାର୍ଥୀ ପ୍ରତିଦ୍ବନ୍ଦୀତାରେ ରହିଥିବା ନେଇ ଖୋର୍ଦ୍ଧା ଜିଲ୍ଲାପାଳ ତଥା ରିଟର୍ଣିଂ ଅଫିସର ସୂଚନା ଦେଇଛନ୍ତି । 

ସେହିପରି ବେଗୁନିଆ ବିଧାନସଭା କ୍ଷେତ୍ରରୁ ସର୍ବାଧିକ 12 ଜଣ ପ୍ରାର୍ଥୀଙ୍କ ନାମାଙ୍କନ କାୟମ ରହିଥିବା ବେଳେ ଖୋର୍ଦ୍ଧା ବିଧାନସଭା କ୍ଷେତ୍ରରେ 10 ଜଣ ପ୍ରାର୍ଥୀଙ୍କ ନାମାଙ୍କନ ବୈଧ ରହିଛି । ସେହିପରି ଚିଲିକା ନିର୍ବାଚନ ମଣ୍ଡଳୀରେ 9 ଜଣ ପ୍ରାର୍ଥୀ ପ୍ରତିଦ୍ବନ୍ଦୀତା କରିବା ପାଇଁ ରହିଛନ୍ତି । ସେହିଭଳି ଆସନ୍ତାକାଲି ନାମାଙ୍କନ ପ୍ରତ୍ୟାହାର ପାଇଁ ଦିନ ଧାର୍ଯ୍ୟ ହୋଇଥିବା ବେଳେ ପ୍ରାର୍ଥୀପତ୍ର ପ୍ରତ୍ୟାହାର ପରେ ମୈଦାନରେ କେତେ ପ୍ରାର୍ଥୀ ପ୍ରତିଦ୍ବନ୍ଦୀତା କରିବେ ତାହା ଜଣାପଡିବ ।

ଇଟିଭି ଭାରତ, ଖୋର୍ଦ୍ଧା