ক’ভিড পৰিস্থিতি বুজ ল’বলৈ মঙলদৈত উপস্থিত মন্ত্ৰী অশোক সিংঘাল

ৰাজ্যত ক্ৰমাৎ অধিক ভয়াৱহ হৈ পৰিছে ক’ভিড-19 পৰিস্থিতি ৷ প্ৰতিদিনেই বৃদ্ধি পাইছে ক’ভিডত আক্ৰান্তৰ সংখ্যা ৷ ইয়াৰ মাজতে ক’ভিড পৰিস্থিতিৰ সৈতে মোকাবিলা কৰিবলৈ তথা ক’ভিড পৰিস্থিতি নিয়ন্ত্ৰণ কৰিবৰ বাবে অতি তৎপৰ হৈ পৰিছে মুখ্যমন্ত্ৰী হিমন্ত বিশ্ব শৰ্মাৰ নেতৃত্বত গঠন হোৱা নৱ গঠিত চৰকাৰ খনৰ প্ৰতিজন দায়িত্বশীল মন্ত্ৰী ৷ দৰং জিলাৰ ক’ভিড পৰিস্থিতি বুজ লোৱাৰ উদ্দেশ্যে বৃহস্পতিবাৰে আবেলি দৰং জিলা উপায়ুক্ত সভাকক্ষত উপস্থিত হৈ ক’ভিড পৰিস্থিতিক লৈ জিলাখনৰ উচ্চ পদস্থ বিষয়া সকলৰ সৈতে এখন গুৰুত্বপূৰ্ণ বৈঠকত মিলিত হয় মন্ত্ৰী অশোক সিংঘাল ৷ বৈঠকত উপস্থিত থাকি প্ৰতিগৰাকী বিষয়াক অতি নিষ্ঠাৰে নিজৰ সেৱা আগবঢ়াবলৈ আহ্বান জনায় মন্ত্ৰী গৰাকীয়ে ৷ বৈঠকত উপস্থিত থাকে দৰং জিলাৰ তিনি গৰাকী বিধায়কৰ লগতে জিলা উপায়ুক্ত দিলীপ কুমাৰ বৰা আৰু অন্যান্য শীৰ্ষ বিষয়া সকল ৷