ৰামভক্তক লৈ ৰঙিয়াৰ পৰা অযোধ‍্যালৈ যাত্ৰা বিশেষ 'আস্থা' ৰে'লৰ

ৰঙিয়া, ২৯ ফেব্ৰুৱাৰী : ৰামভক্তক লৈ ৰঙিয়া জংচন এৰি অযোধ‍্যা অভিমুখে যাত্ৰা আৰম্ভ বিশেষ 'আস্থা' ৰে'লৰ । বৃহস্পতিবাৰে পুৱা প্ৰায় ৭ বজাত লামডিঙৰ পৰা যাত্ৰা আৰম্ভ কৰা লামডিং-কাটাৰা-লামডিং আস্থা বিশেষ ৰে'লখন অযোধ‍্যাত গৈ শুকুৰবাৰে নিশা উপস্থিত হ'ব । ৰে'লখনৰ জৰিয়তে ৰঙিয়া ষ্টেচনৰ পৰা ৫৫০ গৰাকী ৰামভক্তই অযোধ‍্যাৰ ৰাম মন্দিৰ দৰ্শনৰ বাবে যাত্ৰা কৰিছে ।

উল্লেখযোগ্য যে এইসকল যাত্ৰীক অযোধ‍্যালৈ গৈ ৰাম মন্দিৰ দৰ্শন কৰি পুনৰ উভতি অহালৈকে এই সমগ্ৰ যাত্ৰাৰ ক্ষেত্ৰত সম্পূৰ্ণৰূপে সহায় আগবঢ়াইছে বিজেপিয়ে । আনহাতে, যাত্ৰীসকলে অযোধ‍্যাত উপস্থিত হোৱাৰ পিছত তাত থকাৰ লগতে মন্দিৰ দৰ্শনৰ বাবেও বিজেপিৰ কৰ্মকৰ্তাসকলে সহায় আগবঢ়াব ।

ৰঙিয়াত এই যাত্ৰাৰ পূৰ্বে বিজেপিৰ তৰফৰ পৰা এখন সভাৰ আয়োজন কৰি যাত্ৰীসকলক উষ্ণ আদৰণিৰে বিদায় জনায় । অনুষ্ঠানটোত যাত্ৰীসকলক উদ্দেশ্যি ভাষণ প্ৰদান কৰে বিজেপিৰ উত্তৰ কামৰূপৰ সভাপতি সুবল পালে । আনহাতে, দৰং জিলাৰ সভাপতি অমৰেন্দ্ৰ শৰ্মাও সভাত উপস্থিত থাকি যাত্ৰীসকলক শুভেচ্ছা জ্ঞাপন কৰে ।

লগতে পঢ়ক :মজুৰি দিব নোৱাৰিলে মাননি বৃদ্ধি কৰাৰ দাবী