কাৰ্বি আংলংত বৰষুণৰ পানীয়ে উটুৱাই নিলে ফ'ৰলেন ,বন্ধ যাতায়াত - Storm In Karbi Anglong

ডিফু, ১৮ আগষ্ট : কাৰ্বি আংলংত দেওবাৰে বিয়লি তিনিঘণ্টা ধৰি প্ৰবল বৃষ্টিপাত হোৱাত স্তব্ধ হৈ পৰে জনজীৱন । জিলাখনৰ ঠায়ে ঠায়ে হয় ধুমুহা ৷ এই বৃষ্টিপাতৰ ফলত জিলাখনৰ বিভিন্ন এলেকা কিছুসময়ৰ বাবে প্লাবিত হৈ পৰে ৷ ইয়াৰ মাজতে ডবকা-ডিমাপুৰৰ মাজত নিৰ্মাণ চলি থকা ফ'ৰলেন পথৰ এছোৱা পানীয়ে উটুৱাই নিয়ে ৷ বৰষুণৰ প্ৰৱল্য অধিক হোৱা বাবে পাহাৰৰ পৰা পানীৰ ঢল নামি আহি মানজা-বকলীয়াৰ মাজৰ লাংপাৰপাঙত পথটোৰ কিছু অংশ চিঙি নিয়ে ৷

উল্লেখ্য় যে লাংপাৰপাং এলেকাত যি স্থানত পথটো বৰষুণৰ পানীয়ে চিঙি নিলে সেই স্থানতেই নিৰ্মাণ হৈ আছিল পকী দলং ৷ সেয়ে এছোৱা পথ বন্ধ থকাৰ বিপৰীতে আনছোৱা পথেৰে যাতায়াত চলি আছিল ৷ কিন্তু খনবামন পাহাৰৰ পৰা নামি অহা পানীয়ে পথছোৱা উটুৱাই নিয়াৰ ফলত ৰাষ্ট্ৰীয় ঘাইপথটোৰে যাতায়াত বন্ধ হৈ পৰে  ৷  

ডিফুলৈ অহা আৰু ডিফুৰ পৰা গুৱাহাটী অভিমুখে যোৱা গাড়ীসমূহ তাৰালাংচ’ হৈ যাবলৈ দিয়া হৈছে  ৷ সন্ধিয়ালৈ পথটো কিছু মেৰামতি কৰি লঘু বাহন অহা-যোৱা কৰিব পৰা কৰিছে যদিও লঘু বাহনসমূহো ঠেলি ঠেলিহে পাৰ কৰিব লগা হৈছে  ৷ গধুৰ বাহনৰ চলাচল আজি নিশা বন্ধ হৈ থাকিব ৷ কাইলৈ পথটো মেৰামতি কৰাৰ পিছতহে যাতায়ত সুচল হ’ব ৷  

লগতে পঢ়ক:এজাক বৰষুণতেই খহিল শিলচৰ-কুম্ভীৰগ্ৰাম বিমানকোঠ সংযোগী পথ - Silchar Airport VIP road damage