একেলগে দুৰ্ঘটনাত পতিত ৩ খনকৈ বাহন, আহত কেইবাজনো

দৰং: ছিপাঝাৰৰ শিঙিমাৰীত ভয়ংকৰ পথ দুৰ্ঘটনা । ১৫ নং ৰাষ্ট্ৰীয় ঘাইপথৰ শিঙিমাৰীত একেলগে দুৰ্ঘটনাগ্ৰস্ত তিনিখনকৈ বাহন । মেক্সিম', বলেৰ' পিকআপ আৰু চুইফট বাহনৰ মাজত সংঘটিত হৈছে এই দুৰ্ঘটনা । জানিব পৰা মতে গুৱাহাটীৰ পৰা ছিপাঝাৰৰ দিশে আহি থকা এখন বলেৰ' আৰু বিপৰীত দিশৰ পৰা আহি থকা এখন চুইফটৰ মাজত এই মুখামুখি সংঘৰ্ষ হয় । ইয়াৰ ফলত পুনৰ বলেৰ'খনে ১৫ নং ৰাষ্ট্ৰীয় ঘাইপথেৰে আহি থকা স্কুলীয়া ছাত্ৰ-ছাত্ৰী কঢ়িওৱা এখন মেক্সিম' গাড়ীত খুন্দা মাৰে ।  

ইয়াৰ ফলত মেক্সিম'খনত থকা ১৫ গৰাকী ছাত্ৰ-ছাত্ৰী সামান্য পৰিমাণে আঘাতপ্ৰাপ্ত হয় । বলেৰ' আৰু চুইফটখনৰ দুগৰাকী আৰোহী গুৰুতৰভাৱে আহত হয় । উক্ত দুৰ্ঘটনাৰ ফলত ১৫ নং ৰাষ্ট্ৰীয় ঘাইপথৰে যাতায়ত ব্যৱস্থা প্ৰায় ৪০ মিনিটৰ বাবে ব্যাহত হৈ পৰে । ঘটনা সংঘটিত হোৱাৰ কিছু সময় পিছতে উপস্থিত হয় আৰক্ষী । আহতসকলক প্ৰথম অৱস্থাত ছিপাঝাৰ প্ৰাথমিক স্বাস্থ্যকেন্দ্ৰত ভৰ্ত্তি কৰোৱা হয় । ইয়াৰে সংকটজনক অৱস্থাত থকা কুলজিৎ দাস আৰু দ্বীপজ্যোতি দাসক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰা হৈছে ।

লগতে পঢ়ক: শোকাৱহ দুৰ্ঘটনা; ২৪ ঘণ্টাত ১৪ জনৰ মৃত্যু - KARNATAKA ACCIDENT